Yeremiya 14:1-22
14 Yehova wangukambiya Yeremiya vakukwaskana ndi chilala kuti:+
2 Yuda waliya,+ ndipu mageti ngaki ngawa.
Ngabira pasi ndipu nganangika,Ndipu kuliya kukwera kuchanya kutuliya ku Yerusalemu.
3 Ambuyawu atuma ateŵeti ŵawu kuti akaneŵi maji.
Yiwu aluta kuvisimi kweni asaniyaku maji cha.
Aweku ndi viyaŵi vambula maji.
Achita soni kweniso akwiya,Ndipu adika vinthu kumutu.
4 Chifukwa chakuti charu chachita malumwa,Pakuti palivi vuwa pacharu,+Alimi afipa mtima ndipu abenekere mitu yawu.
5 Chinanga ndi mbaŵa yinthukazi kudondu yileka mwana waki yo wawaku ŵaka sonuChifukwa chakuti kulivi uteka.
6 Abulu amudondu ama pamitunthu yambula kanthu.
Yiwu aŵeŵefuka nge akambwi;Masu ngawu ngawona cha chifukwa chakuti kulivi vakume.+
7 Chinanga kuti maubudi ngidu ngasimikiziya kuti te akunanga,Yimwi Yehova, chitanipu kanthu chifukwa cha zina linu.+
Pakuti tachita vinthu vinandi mwambula kugomezgeka,+Ndipu tabudiya yimwi.
8 Yimwi chilindizga chaku Isirayeli, Mtaski waki+ mu nyengu ya masuzgu,Ntchifukwa wuli muja nge mulendu mucharu ichi,Nge mulendu yo wama kuti wagoni usiku umoza pe?
9 Ntchifukwa wuli mwe nge munthu yo wazizwa,Nge chinkhara cho chingataska cha?
Pakuti mwe pakati pidu, yimwi Yehova,+Ndipuso tidanika ndi zina linu.+
Kutijowo cha.
10 Ivi ndivu Yehova wakamba vakukwaskana ndi ŵanthu yaŵa: “Yiwu atanja kwendakwenda;+ awezaku cha maphazi ngawu.+ Mwaviyo Yehova wakondwa nawu cha.+ Sonu wakumbukengi kunanga kwawu ndipuso waŵambengi mulandu chifukwa cha maubudi ngawu.”+
11 Pavuli paki, Yehova wangundikambiya kuti: “Ungaŵapempheriyanga cha ŵanthu yaŵa kuti vinthu viŵayende umampha.+
12 Asani afunga, ndivwisiya cha kuŵeyere kwawu,+ ndipu asani apereka sembi zakupiriza zamphumphu kweniso sembi za mbewu, ndikondwa nazu cha,+ pakuti ndimalanengi nawu ndi lipanga, nja kweniso mulili.”*+
13 Ndati ndavwa venivi ndingukamba kuti: “A Yehova, Ambuya Fumu Yikulu! Awonani, achimi akambiya ŵanthu yaŵa kuti, ‘Muwonengi lipanga cha, ndipu nja yikuwiyeningi cha, kweni ndikupaskeningi chimangu chayichu mucharu ichi.’”+
14 Sonu Yehova wangundikambiya kuti: “Achimi akamba mauchimi ngaboza mu zina langu.+ Ini ndaŵatuma cha pamwenga kuŵalamula pamwenga kulongoro nawu.+ Achimi wo, atikukambiyani viwona vaboza, vinthu vaboza vo vichitikengi kunthazi ndipuso maboza nga mumtima mwawu.+
15 Mwaviyo, ivi ndivu Yehova wakamba vakukwaskana ndi achimi wo akamba mauchimi mu zina langu chinanga kuti ndikuŵatuma cha, ndipuso wo akamba kuti lipanga pamwenga nja vizengi cha mucharu ichi: ‘Achimi ŵenaŵa azamumala ndi lipanga kweniso nja.+
16 Ndipu mathupi nga ŵanthu wo atiŵakambiya mauchimi, ngazamuponyeka mumisewu ya mu Yerusalemu chifukwa cha nja kweniso lipanga, mwakuti pazamuŵavi wakuŵaŵika mudindi,+ yiwu, awolu ŵawu, ŵana ŵawu anthulumi ndipuso ŵana ŵawu anthukazi, pakuti ndazakuŵapunguliya soka lo atenere kulonde.’+
17 “Uŵakambiyi mazu ngakuti,‘Masu ngangu ngapopomi masozi usiku ndi msana, ngangalekanga cha kudika,+Pakuti mwana munthukazi wa ŵanthu ŵangu yo ndi mwali, wapwetekeka ukongwa kweniso wafyoka,+Ndipu we ndi chilonda chikulu ukongwa.
18 Asani ndaluta mudondu ndi kulereska,Ndiwona ŵanthu wo abayika ndi lipanga!+
Ndipu asani ndasere mutawuni,Ndiwona matenda ngo ngaza chifukwa cha nja!+
Pakuti achimi ndi asembi atendatenda mucharu cho atichiziŵa cha.’”+
19 Kumbi mwamukaniya limu Yuda, pamwenga kumbi mwamutinkha Ziyoni?+
Ntchifukwa wuli mwatipweteka, mwakuti tingachizgika cha?+
Talindizganga chimangu, kweni pengavi chamampha cho chinguza,Talindizganga nyengu ya kuchizgika, kweni kwe mantha!+
20 Taziŵa uheni widu, yimwi Yehova,Ndipuso taziŵa kunanga kwa apapi ŵidu akali,Pakuti takubudiyani.+
21 Mungatijowonga cha chifukwa cha zina linu;+Mpandu winu waufumu waunkhankhu mungawuyuyuwanga cha.
Kumbukani, ndipu mungaswanga cha phanganu linu lo munguchita ndi isi.+
22 Kumbi angoza ambula fundu a mitundu ya ŵanthu angapereka vuwa,Pamwenga kumbi kuchanya kungatumiza kwija vuwa?
Asi ndimwi pe mwija, yimwi Yehova Chiuta widu?+
Ndipu isi tilindizga yimwi,Pakuti yimwi pe mwija ndimwi mwachita vinthu vosi venivi.
Mazu Ngam'mphata
^ Pamwenga kuti, “nthenda.”
