Yeremiya 16:1-21
16 Yehova wangulongoro nani so ndipu wangukamba kuti:
2 “Ungatonga munthukazi cha ndipuso ungabalanga ŵana anthulumi pamwenga ŵana anthukazi cha mumalu yanga.
3 Pakuti ivi ndivu Yehova wakamba vakukwaskana ndi ŵana anthulumi kweniso ŵana anthukazi wo abalika mucharu ichi, kweniso vakukwaskana ndi anyinawu ndi awusewu wo akuŵabala:
4 ‘Yiwu azamukufwa ndi matenda ngakubaya,+ kweni palivi yo wazakuŵaliya pamwenga kuŵaŵika mudindi; mathupi ngawu ngazamuja manyowa pacharu.+ Yiwu azamubayika ndi lipanga kweniso nja,+ ndipu mathupi ngawu ngazamuja chakurya cha viyuni vamude kweniso vinyama va pacharu chapasi.’
5 Pakuti Yehova wakamba kuti,‘Ungaserenga cha munyumba yo ŵanthu akuliya achitiyamu phwandu,Ndipu ungalutanga cha kuchiliya nawu pamwenga kuchiŵapembuzga.’+
‘Pakuti ndatuzgaku chimangu changu ku ŵanthu yaŵa,’ Yehova ndiyu wakamba,‘Ndatuzgaku so chanju changu chambula kumala kweniso lisungu.+
6 Ŵanthu akuzirwa kweniso ambula kuzirwa, wosi azamufwiya mucharu ichi.
Mathupi ngawu ngazamuŵikika mudindi cha,Palivi yo wazakuŵaliya,Ndipuso palivi yo wazakujicheka pamwenga kumeta phala chifukwa chaku yiwu.*
7 Ndipu palivi yo wazamupereka chakurya ku ŵanthu wo aliya,Kuti waŵapembuzgi chifukwa cha ŵanthu ŵawu wo afwa;Ndipuso palivi yo wazakuŵapaska kapu yakupembuzgaKuti amwi chifukwa cha nyifwa ya awusewu pamwenga anyinawu.
8 Ndipu ungaserenga cha munyumba ya ŵanthu wo achita phwanduKuti uje nawu limoza, kurya nawu ndi kumwa nawu.’
9 “Pakuti Yehova wa mizinda, Chiuta waku Isirayeli wakamba kuti, ‘Mumalu yanga, mu mazuŵa nginu kweniso yimwi muchilereska, ndazamumalisa chiwawa cha kuzaya, chiwawa cha likondwa, mazu nga munthulumi mweneku wa nthengwa kweniso mazu nga mwali.’+
10 “Asani ŵanthu yaŵa waziŵakambiya mazu ngosi yanga, azakukufumba kuti, ‘Ntchifukwa wuli Yehova wakamba kuti watiwisiyengi soka likulu lenili? Kumbi tananganji kweniso tamubudiyanji Yehova Chiuta widu?’+
11 Yiwi uziŵamuki kuti, ‘“Ntchifukwa chakuti apapi ŵinu akali angundijowo,”+ Yehova ndiyu wakamba, “ndipu alondonga achiuta anyaki, kuŵateŵete ndi kuŵasindamiya.+ Angundijowo ndipuso angusunga cha dangu langu.+
12 Ndipu yimwi mwachita vinthu viheni ukongwa kuluska apapi ŵinu akali,+ weyosi waku yimwi wachita mtafu ndi kulondo mtima waki uheni, mumalu mwakundivwiya.+
13 Mwaviyo, ndazakukutuzganimu mucharu ichi ndi kuluta namwi mucharu cho yimwi ndi apapi ŵinu akali mukuchiziŵapu cha,+ ndipu kweniko mwamuteŵete achiuta anyaki msana ndi usiku,+ chifukwa chakuti ndazakukuchitiyani lisungu cha.”’
14 “‘Kweni mazuŵa ngatuza,’ Yehova ndiyu wakamba, ‘po azamukamba so cha kuti: “Ndilapizga mu zina laku Yehova Chiuta wamoyu, yo wakutuzga Ayisirayeli mucharu cha Ijipiti!”+
15 kweni azamukamba kuti: “Ndilapizga mu zina laku Yehova Chiuta wamoyu, yo wakutuzga Ayisirayeli mucharu cha kunkhondi* kweniso muvyaru vosi vo wanguŵambininiskiyaku!” ndipu ndazakuŵaweze mucharu chawu cho ndinguchipereka kwa apapi ŵawu akali.’+
16 ‘Awonani, ndidana alovi anandi,’ Yehova ndiyu wakamba,‘Ndipu azakuŵapenja ndi kuŵako.
Pavuli paki ndazamudana achiŵinda anandi,Ndipu azakuŵaŵinga muphiri lelosi, mumtunthu wewosiKweniso mumphaku za majalawi.
17 Pakuti masu ngangu ngawona vosi vo achita.*
Vabisika cha kwaku ini,Ndipuso kunanga kwawu kwabisika cha kwaku ini.
18 Chakwamba, ndazakuŵaweze mwakukwana chifukwa cha kunanga kwawu kweniso ubudi wawu,+Pakuti afipiska charu changu ndi vikozgu vawu vambula umoyu kweniso vakuseruskaNdipuso azaza chihara changu ndi vinthu vawu vaukazuzi.’”+
19 Yimwi Yehova, nthazi yangu kweniso malu ngangu ngakuvikilirika,Malu ngangu ngakuthaŵiyaku pa nyengu ya suzgu,+Mitundu ya ŵanthu yazamukuza kwaku yimwi kutuliya kuvigoti va charu chapasi,Ndipu azamukamba kuti: “Apapi ŵidu akali anguhara boza pe,Vinthu vaŵakaŵaka kweniso vinthu vambula ntchitu vo vingawovya cha.”+
20 Kumbi munthu wangajipangiya achiutaPenipo mbachiuta chayiwu cha?+
21 “Mwaviyo, ndiŵaziŵisengi,Pa nyengu iyi, ndiŵachitiskengi kuti aziŵi janja langu kweniso nthazi zangu,Ndipu aziŵengi kuti zina langu ndini Yehova.”
Mazu Ngam'mphata
^ Iyi ndi midawuku ya kuliya maliru ya ŵanthu wo asopanga achiuta aboza, ndipu viwoneka kuti Ayisirayeli akugaruka achitanga midawuku yeniyi.
^ Anyaki akamba kuti, “kumpotu.”
^ Mazu ngaki chayingu, “ngawona nthowa zawu zosi.”
