Yeremiya 18:1-23
18 Yehova wangukambiya Yeremiya kuti:
2 “Soka, sikiya kunyumba ya wakuwumba viŵiya+ ndipu ndamulongoro nawi kweniko.”
3 Mwaviyo, ndingusikiya kunyumba ya wakuwumba viŵiya ndipu iyu wawumbanga viŵiya pachakuwumbiyapu viŵiya.
4 Kweni chiŵiya cho wawumbanga chingunangika mu manja mwaki. Mwaviyo, wanguwumba chiŵiya chinyaki ndi dongu leniliya, nge mo mweneku wangukhumbiya.
5 Pavuli paki, Yehova wangundikambiya kuti:
6 “‘Nge mo wakuwumba viŵiya uyu wanguchitiya, kumbi ini ndingachita namwi viyo cha, yimwi a munyumba yaku Isirayeli?’ Yehova ndiyu wakamba. ‘Awonani! Nge dongu mu manja mwa wakuwumba, ndimu so yimwi muliri mu manja ngangu, yimwi a munyumba yaku Isirayeli.+
7 Asani ndakamba kuti ndichesuwengi, ndiwisiyengi pasi ndipuso ndinangengi mtundu wa ŵanthu pamwenga ufumu,+
8 ndipu mtundu wo waleka uheni waki wo ndinguwuchenya nawu, mbwenu ndisinthengi maŵanaŵanu ngangu pa soka lo ndakhumbanga kuwuwisiya.+
9 Kweni asani ndakamba kuti ndizengengi kweniso kupanda mtundu wa ŵanthu pamwenga ufumu,
10 ndipu mtundu wo uchita vinthu viheni pa masu pangu, kweniso uvwiya cha mazu ngangu, mbwenu ndisinthengi maŵanaŵanu ngangu pa vinthu vamampha vo ndakhumbanga kuwuchitiya.’
11 “Sonu kambiya ŵanthu a ku Yuda kweniso ŵanthu a mu Yerusalemu kuti, ‘Yehova wakamba kuti: “Nditikunozgiyani* soka kweniso chiŵembu. Chondi, tuwaniku ku nthowa zinu ziheni ndipu sinthani nthowa zinu kweniso vo muchita.”’”+
12 Kweni yiwu angukamba kuti: “Vilivi kanthu!+ Pakuti tiyendiyengi maŵanaŵanu ngidu, ndipu weyosi waku isi, wachitengi vinthu mwakukoliyana ndi mtima waki unononu kweniso uheni.”+
13 Mwaviyo, Yehova wakamba kuti:
“Fumbani pakati pa mitundu ya ŵanthu.
Ndiyani yo wakuvwapu vinthu va nge venivi?
Mwali waku Isirayeli wachita chinthu chiheni ukongwa.+
14 Kumbi sinoo* wa ku Lebanoni wasongonoka mumajalawi nga mumapiri ngaki?
Pamwenga kumbi maji ngakuzizira ngakutuliya kutali ngamira?
15 Kweni ŵanthu ŵangu andiluwa.+
Pakuti apereka sembi* ku chinthu chaŵakaŵaka,+Ndipu aguŵiska ŵanthu mu nthowa zawu, nthowa zamwaka,+Kuti ayendengi mu nthowa zinyaki zavibokuboku kweniso zambula kulimika,
16 Kuti asambusi charu chawu kuja chinthu chakuchitiska mantha+Ndipuso chinthu cho ŵanthu achimbiyengi khwelu kwamuyaya.+
Munthu weyosi yo wazamujumpha pafupi wazakuchilereseska mwamantha ndi kupukunya mutu waki.+
17 Ndiŵambininiskengi pa masu pa arwani ŵawu nge mphepu ya kuvuma,*
Mu zuŵa la soka lawu, ndiŵalazgiyengi msana mumalu mwakuŵalazgiya chisku.”+
18 Ndipu yiwu angukamba kuti: “Zani, tiyeni timunozge chiŵembu Yeremiya,+ pakuti asembi ŵidu alutirizgengi kusambiza dangu, ŵanthu azeru alutirizgengi kupereka ulongozgi ndipuso achimi alutirizgengi kupereka uthenga waku Chiuta. Sonu zani, tiyeni tisuskani nayu* ndipu tingaŵikangaku maŵanaŵanu cha ku vo wakamba.”
19 Ndivwisiyeni, yimwi Yehova.Ndipu vwisiyani vo arwani ŵangu akamba.
20 Kumbi mbumampha kuweze chiheni pa chamampha?
Pakuti umoyu wangu awukumbiya mbuna.+
Kumbukani mo ndingumiya pa masu pinu kuti ndilongoro vamampha vakukwaskana ndi yiwu.Kuti ukali winu utuweku kwaku yiwu.
21 Mwaviyo, perekani ŵana ŵawu ku nja,Ndipuso aperekeni ku nthazi ya lipanga.+
Awolu ŵawu aje vyoko ndipu ŵana ŵawu afwi.+
Ŵanthu ŵawu afwi ndi mulili wakubaya,Anyamata ŵawu afwi ndi lipanga ku nkhondu.+
22 Munyumba zawu muvwiki kuliyaAsani mwaŵatumiya magulu nga vigeŵenga mwamabuchibuchi.
Pakuti akumba mbuna kuti andikoNdipuso andithyiya viŵana kuti maphazi ngangu ngawiri.+
23 Kweni yimwi Yehova,Muziŵa umampha viŵembu vosi vo anozga kuti andibayi.+
Mungabenekeriyanga cha kunanga kwawu,Ndipu mungasisitanga cha ubudi wawu pa masu pinu.
Yiwu aguŵi pa masu pinu+Pa nyengu yo mutiŵalanga chifukwa cha ukali winu.+
Mazu Ngam'mphata
^ Mazu ngaki chayingu, “Nditikupangiyani.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Pamwenga kuti, “sembi za josi.”
^ Pamwenga kuti, “ko kutuliya lumwi.”
^ Mazu ngaki chayingu, “tiyeni timupweteki ndi lilimi.”
