Yeremiya 24:1-10
-
Vipasu va mkuyu vamampha kweniso viheni (1-10)
24 Pavuli paki, Yehova wangundilongo sokola ziŵi za vipasu va mkuyu zo zenga panthazi pa nyumba yakusopiyamu yaku Yehova, Fumu Nebukadinezara* ya ku Babiloni yati yatole ku ukapolu Yekoniya,*+ mwana waku Yehoyakimu,+ fumu ya ku Yuda, limoza ndi alongozgi akuzirwa a ku Yuda, ŵanthu alusu ndipuso akusula visulu.* Yinguŵato ku Yerusalemu ndi kuluta nawu ku Babiloni.+
2 Musokola yimoza mwenga vipasu va mkuyu vamampha ukongwa, nge vipasu vakwamba kucha, kweni musokola yinyaki mwenga vipasu va mkuyu viheni ukongwa, venga viheni ukongwa vakuti vingaryika cha.
3 Pavuli paki, Yehova wangundifumba kuti: “Yeremiya, kumbi uwonanji?” Ini ndingumuka kuti: “Ndiwona vipasu va mkuyu. Vipasu vamampha va mkuyu, vamampha ukongwa. Kweni vipasu viheni va mkuyu, viheni ukongwa. Viheni ukongwa ndipu vingaryika cha.”+
4 Pavuli paki, Yehova wangundikambiya kuti:
5 “Yehova, Chiuta waku Isirayeli wakamba kuti, ‘Ŵanthu a ku Yuda wo atoleke ku ukapolu, wo ndaŵatuzgamu mucharu ichi ndi kuluta nawu mucharu cha Akadiya, ndiŵawonengi nge vipasu vamampha va mkuyu.
6 Masu ngangu ngaŵengi paku yiwu kuti ndiŵachitiyi vinthu vamampha ndipu ndazakuŵaweze mucharu ichi.+ Ndazakuŵazenga, ndazakuŵapapasuwa cha; ndazakuŵapanda, ndazakuŵachesuwa cha.+
7 Ndipu ndazakuŵapaska mtima wakuti andiziŵi, kuti ndini Yehova.+ Azamuja ŵanthu ŵangu ndipu ini ndazamuja Chiuta wawu,+ pakuti azamuwere kwaku ini ndi mtima wawu wosi.+
8 “‘Pa nkhani ya vipasu va mkuyu vo viheni ukongwa vakuti vingaryika cha,+ Yehova wakamba kuti: “Ndimu so ndiwoniyengi Fumu Zedekiya+ ya ku Yuda, alongozgi ŵaki akuzirwa, ŵanthu a mu Yerusalemu wo apona, wo ŵeche mucharu ichi ndipuso wo aja mucharu cha Ijipiti.+
9 Ndazakuŵasambusa chinthu chakuchitiska mantha kweniso soka ku maufumu ngosi nga pacharu chapasi.+ Mumalu ngosi ngo ndaŵambininiskiyamu, ŵanthu azakuŵanyoza,+ azakuŵazumbuwa mu nthanthi zawu, azakuŵanena ndipuso azamuja akutembeka.+
10 Ndipu ndazakuŵatumiya lipanga,+ nja kweniso milili*+ mpaka po amaliya limu mucharu cho ndikuchipereka kwaku yiwu kweniso kwa apapi ŵawu akali.”’”
Mazu Ngam'mphata
^ Zina ili lilembeka so kuti, “Nebukadirezara.”
^ Wadanika so kuti Yehoyakini kweniso Yekoniya.
^ Yapa pangafwatulikiya so kuti, “akuzenga ndi kunozga mipanda.”
^ Pamwenga kuti, “nthenda.”