Yeremiya 26:1-24
26 Kukwamba kwa ulamuliru waku Yehoyakimu+ mwana waku Yosiya, fumu yaku Yuda, Yehova wangukamba mazu ngakuti:
2 “Yehova wakamba kuti, ‘Umi mubalaza la nyumba yaku Yehova ndipu ukambi vakukwaskana ndi* ŵanthu wosi a mumatawuni nga ku Yuda wo atuza kuzisopa* pa nyumba yaku Yehova. Uŵakambiyi chechosi cho ndikulamulengi, ungalekangaku chinanga ndi mazu ngamoza cha.
3 Panyaki amuvwisiya ndi kutuwaku ku nthowa zawu ziheni, ndipu ndisinthengi maŵanaŵanu ngangu pa* soka lo ndakhumbanga kuŵawisiya chifukwa cha vinthu viheni vo achita.+
4 Uŵakambiyi kuti: “Yehova wakamba kuti, ‘Asani mundivwiyengi cha ndi kuleka kulondo dangu lo ndaŵika pa masu pinu,
5 ndipuso asani mulekengi kuvwiya mazu nga ateŵeti ŵangu achimi, wo nditikutumiyani mwakuwerezawereza,* wo mutiŵavwiya cha,+
6 mbwenu ndichitiskengi kuti nyumba iyi yije nge Shilo,+ ndipu tawuni iyi ndiyisambusengi chinthu chakutembe ku mitundu yosi ya pacharu chapasi.’”’”+
7 Asembi, achimi kweniso ŵanthu wosi anguvwa Yeremiya wachikamba mazu ngenanga munyumba yaku Yehova.+
8 Yeremiya wati wamaliza kukamba mazu ngosi ngo Yehova wangumulamula kuti wakambiyi ŵanthu wosi, pavuli paki asembi, achimi kweniso ŵanthu wosi angumuko ndipu angukamba kuti: “Ufwengi kwambula kutondeka.
9 Ntchifukwa wuli wakamba uchimi mu zina laku Yehova kuti, ‘Nyumba iyi yijengi nge Shilo, ndipuso kuti tawuni iyi yibwangandulikengi ndipu yijengi yambula ŵanthu’?” Ŵanthu wosi angumuwumbiriya Yeremiya munyumba yaku Yehova.
10 Alongozgi a ku Yuda ŵati avwa mazu ngenanga, angukwere kunyumba yaku Yehova kutuliya kunyumba ya fumu ndipu anguja pasi pakhomu la geti lifya laku Yehova.+
11 Asembi kweniso achimi angukambiya alongozgi kweniso ŵanthu wosi kuti: “Munthu uyu watenere kupaskika chilangu cha nyifwa,+ chifukwa chakuti wakamba vinthu viheni vo vichitikiyengi tawuni iyi nge mo namwi mwavwiya ndi makutu nginu.”+
12 Pavuli paki, Yeremiya wangukambiya alongozgi wosi kweniso ŵanthu wosi kuti: “Yehova ndiyu wandituma kuti ndikambi mazu ngosi ngo mwavwa ngakukwaskana ndi vinthu vo vichitikiyengi nyumba iyi kweniso tawuni iyi.+
13 Mwaviyo, sinthani nthowa zinu kweniso vakuchita vinu ndipu vwiyani mazu ngaku Yehova Chiuta winu, ndipu Yehova wasinthengi maŵanaŵanu ngaki pa* soka lo wakhumbanga kukuwisiyani.+
14 Kweni ini nde mu manja mwinu. Chitani nani chechosi cho muwona kuti ntchamampha kweniso ntchakwenere mu masu mwinu.
15 Kweni ziŵani kuti asani mwandibaya, yimwi, tawuni iyi ndipuso ŵanthu wo ajamu, muŵengi ndi mulandu wakudira ndopa zambula kunanga, pakuti ndineneska kuti Yehova ndiyu wandituma kuti ndikukambiyeni mazu ngosi ngo mwavwa.”
16 Pavuli paki, alongozgi ndipuso ŵanthu wosi angukambiya asembi ndipuso achimi kuti: “Munthu uyu watenere kupaskika chilangu cha nyifwa cha, pakuti wakamba nasi mu zina laku Yehova Chiuta widu.”
17 Kweniso, ŵara ŵa mucharu cho angusoka ndi kwamba kukambiya mpingu wosi kuti:
18 “Mika+ wa ku Moresheti wakambanga mauchimi mu mazuŵa nga Fumu Hezekiya+ ya ku Yuda, ndipu wangukambiya ŵanthu wosi a ku Yuda kuti, ‘Yehova wa mizinda wakamba kuti:
“Ziyoni wazamulimika nge munda,Yerusalemu wazamusambuka ndundu za mahami,+Ndipu phiri la Nyumba* lazamukuŵa nge malu ngapachanya nga mulisuwa.”’+
19 “Kumbi Fumu Hezekiya ya ku Yuda ndipuso ŵanthu wosi a ku Yuda, angumubaya? Asi wangopa Yehova ndi kupempha kuti Yehova waŵachitiyi lisungu,* mwakuti Yehova wangusintha maŵanaŵanu ngaki pa* soka lo wangukamba kuti waŵawisiyengi?+ Mwaviyo, tijidaniyengi soka likulu.
20 “Ndipuso kwenga munthu munyaki yo wakambanga mauchimi mu zina laku Yehova, zina laki lenga Uriya mwana waku Shemaya wa ku Kiriyati-yearimu.+ Iyu wangukamba mazu ngakuyanana ndi ngaku Yeremiya, nga vinthu vo vichitikiyengi tawuni iyi kweniso charu ichi.
21 Fumu Yehoyakimu,+ ŵanthu ŵaki wosi anthazi kweniso alongozgi wosi, anguvwa mazu ngo wangukamba, ndipu fumu yapenjanga kumubaya.+ Uriya wati wavwa venivi, wanguchita mantha ndipu wanguthaŵiya ku Ijipiti.
22 Pavuli paki, Fumu Yehoyakimu, yingutuma Elinatani+ mwana waku Akibori ndi ŵanthu anyaki kuti aluti ku Ijipiti.
23 Yiwu anguto Uriya ku Ijipiti ndi kuchimupereka kwa Fumu Yehoyakimu, ndipu yingumubaya ndi lipanga+ ndi kutaya thupi laki mumasanu nga ŵanthu bweka.”
24 Kweni Ahikamu+ mwana waku Shafani+ wanguvikiliya Yeremiya, mwakuti wanguperekeka cha mu manja mwa ŵanthu kuti amubayi.+
Mazu Ngam'mphata
^ Pamwenga kuti, “ukambi ku.”
^ Pamwenga kuti, “kuzisindama.”
^ Pamwenga kuti, “ndipu ndichitengi chitima chifukwa cha.”
^ Mazu ngaki chayingu, “wo ndayukanga mlenjilenji kuti ndiŵatumi.”
^ Pamwenga kuti, “wachitengi chitima chifukwa cha.”
^ Pamwenga kuti, “phiri la nyumba yakusopiyamu.”
^ Pamwenga kuti, “wanguchita chitima chifukwa cha.”
^ Pamwenga kuti, “ndi kuwoloŵesa chisku chaku Yehova.”
