Yeremiya 27:1-22
27 Kukwamba kwa ulamuliru waku Yehoyakimu mwana waku Yosiya, fumu ya ku Yuda, Yehova wangulongoro ndi Yeremiya.
2 Pavuli paki, Yeremiya wangukambiya ŵanthu kuti: “Yehova wandikambiya kuti, ‘Upangi vingwi kweniso magoli, ndipu ujivwaliki mukhosi.
3 Pavuli paki ungatumizi kwa fumu ya ku Edomu,+ fumu ya ku Mowabu,+ fumu ya Aamoni,+ fumu ya ku Turo+ kweniso kwa fumu ya ku Sidoni.+ Upaski mathenga ngo ngaza ku Yerusalemu kwaku Zedekiya fumu ya ku Yuda.
4 Uŵalamuli kuti akakambiyi ambuyawu kuti:
“‘“Yehova wa mizinda, Chiuta waku Isirayeli wakamba kuti mukakambiyi ambuyamwi kuti,
5 ‘Ini ndini ndikupanga charu chapasi, ŵanthu ndi vinyama va pacharu chapasi mwakugwiriskiya ntchitu nthazi zangu zikulu kweniso janja langu lakutambasuka; ndipu charu cho, nditichipereka kwaku weyosi yo ndakhumba.*+
6 Mwaviyo, ndapereka vyaru vosi ivi kwa mteŵeti wangu Nebukadinezara,+ fumu ya ku Babiloni; ndamupaska chinanga ndi vinyama vamudondu kuti vimuteŵetiyengi.
7 Mitundu yosi ya ŵanthu yazamuteŵete iyu, mwana waki kweniso mzuku waki mpaka po nyengu yakuti ufumu waki umaliyi yazikwaniya,+ po mitundu yinandi ya ŵanthu ndipuso mafumu nganthazi, azakumusambusa kapolu.’+
8 “‘“‘Asani mtundu pamwenga ufumu ukana kuteŵete Nebukadinezara fumu ya ku Babiloni ndipuso ukana kusereza khosi laki mu goli la fumu ya ku Babiloni, ndazamulanga mtundu weniwo ndi lipanga,+ nja kweniso mulili,’* Yehova ndiyu wakamba, ‘mpaka po ndawumaliya limu ndi janja laki.’
9 “‘“‘Mwaviyo, mungavwiyanga achimi ŵinu cha, akuloska vamunthazi, akulota malotu, akuchita masenga kweniso akuwombeza, wo atikukambiyani kuti: “Mwamuteŵete fumu ya ku Babiloni cha.”
10 Pakuti atikukambiyani mauchimi ngaboza, ndipu asani muŵavwiyengi, mutolekiyengi kutali ndi charu chinu, ndikumbininiskeningi ndipu mumalengi.
11 “‘“‘Kweni mtundu wo userezengi khosi laki mugoli la fumu ya ku Babiloni ndi kuyiteŵete, ndiwuzomerezengi kuja* mucharu chaki,’ Yehova ndiyu wakamba, ‘kuti achilimengi ndi kujamu.’”’”
12 Kweniso Zedekiya fumu+ ya ku Yuda ndingumukambiya so mazu ngenanga kuti: “Sereza khosi laku mugoli la fumu ya ku Babiloni, uteŵete iyu ndi ŵanthu ŵaki, ndipu ulutirizgengi kuja ndi umoyu.+
13 Kumbi yiwi ndi ŵanthu ŵaku mufwiyenji ndi lipanga,+ nja+ ndi mulili+ nge mo Yehova wakambiya vakukwaskana ndi mtundu wo wazamukana kuteŵete fumu ya ku Babiloni?
14 Mungavwiyanga cha mazu nga achimi wo atikukambiyani kuti, ‘Mwamuteŵete fumu ya ku Babiloni cha,’+ chifukwa atikukambiyani mauchimi ngaboza.+
15 “‘Pakuti ini ndaŵatumapu cha,’ Yehova ndiyu wakamba, ‘kweni atikukambiyani mauchimi ngaboza mu zina langu, ndipu asani muŵavwiyengi ndazakukumbininiskani ndi kukumalani, yimwi limoza ndi achimi wo atikukambiyani mauchimi.’”+
16 Ndipu asembi kweniso ŵanthu wosi ndinguŵakambiya kuti: “Yehova wakamba kuti, ‘Mungavwiyanga cha mazu nga achimi wo atikukambiyani mauchimi kuti: “Awonani! Pambula kuswera yapa, viyaŵi va munyumba yaku Yehova aviweziyengi kunu kutuliya ku Babiloni!”+ pakuti atikukambiyani mauchimi ngaboza.+
17 Mungaŵavwiyanga cha. Teŵetiyani fumu ya ku Babiloni ndipu mulutirizgengi kuja ndi umoyu.+ Tawuni iyi yisambukiyenji mahami?
18 Kweni asani mbachimi nadi kweniso alongoro nadi mazu ngaku Yehova, mbwenu apemphi Yehova wa mizinda, kuti viyaŵi vo vajaku munyumba yaku Yehova, munyumba ya fumu ya ku Yuda ndipuso mu Yerusalemu vileki kutoleke ku Babiloni.’
19 “Pakuti ivi ndivu Yehova wa mizinda wakamba vakukwaskana ndi vipilala,+ Nyanja,*+ vakupingapu+ ndipuso viyaŵi vo vajaku mutawuni iyi,
20 vo Nebukadinezara fumu ya ku Babiloni yinguto cha pa nyengu yo yingutole ku ukapolu Yekoniya mwana waku Yehoyakimu fumu ya ku Yuda, kutuliya ku Yerusalemu kuluta ku Babiloni, limoza ndi ŵanthu wosi akuzirwa a ku Yuda ndi ku Yerusalemu;+
21 ivi ndivu Yehova wa mizinda, Chiuta waku Isirayeli wakamba vakukwaskana ndi viyaŵi vo vajaku munyumba yaku Yehova, munyumba ya fumu ya ku Yuda ndipuso mu Yerusalemu:
22 ‘“Vitolekiyengi ku Babiloni,+ ndipu vamuja kweniko mpaka pa zuŵa lo ndazakuvikumbuka,” Yehova ndiyu wakamba. “Pavuli paki, ndakuvito ndi kuviweze mumalu yanga.”’”+
Mazu Ngam'mphata
^ Mazu ngaki chayingu, “yo ndawona kuti ngwakwenere mu masu mwangu.”
^ Pamwenga kuti, “nthenda.”
^ Mazu ngaki chayingu, “kupumuwa.”
^ Nyanja yamkuŵa ya munyumba yakusopiyamu.
