Yeremiya 28:1-17
-
Mchimi Yeremiya kweniso mchimi waboza Hananiya (1-17)
28 Mu chaka chenicho, kukwamba kwa ulamuliru waku Zedekiya fumu+ ya ku Yuda, mu chaka chachinayi, mu mwezi wachinkhondi, mchimi Hananiya mwana waku Azuri wa ku Gibiyoni,+ wangulongoro nani munyumba yaku Yehova, pa masu pa asembi kweniso ŵanthu wosi, ndipu wangundikambiya kuti:
2 “Yehova wa mizinda, Chiuta waku Isirayeli wakamba kuti, ‘Ndifyongi goli la fumu ya ku Babiloni.+
3 Mu vyaka viŵi pe, ndiweziyengi mumalu yanga viyaŵi vosi va munyumba yaku Yehova, vo fumu Nebukadinezara ya ku Babiloni yinguvito mumalu yanga ndi kuluta navu ku Babiloni.’”+
4 “‘Ndipu ndiweziyengi mumalu yanga Yekoniya+ mwana waku Yehoyakimu,+ fumu ya ku Yuda kweniso ŵanthu wosi a ku Yuda wo akutoleke ku ukapolu ku Babiloni,’+ Yehova ndiyu wakamba, ‘pakuti ndifyongi goli la fumu ya ku Babiloni.’”
5 Pavuli paki mchimi Yeremiya wangulongoro ndi mchimi Hananiya pa masu pa asembi kweniso ŵanthu wosi wo anguma munyumba yaku Yehova.
6 Mchimi Yeremiya wangukamba kuti: “Ame!* Yehova wachiti venivi! Yehova wafiski mazu ngo wakamba. Iyu waweze mumalu yanga viyaŵi va munyumba yaku Yehova kutuliya ku Babiloni kweniso ŵanthu wosi wo ŵe ku ukapolu!
7 Kweni vwisiya uthenga uwu, wo ndilongoro mumakutu mwaku kweniso mumakutu mwa ŵanthu wosi.
8 Achimi wo ŵengaku kali, yiwi ndi ini techendaŵeku, akambanga mauchimi ngakukwaskana ndi vyaru vinandi kweniso maufumu nganthazi, vakukwaskana ndi nkhondu, masoka ndipuso milili.*
9 Asani mchimi wakamba uchimi wakukwaskana ndi chimangu ndipu mazu nga mchimi yo ngafiskika nadi, mbwenu viziŵikengi kuti mchimi yo watumika nadi ndi Yehova.”
10 Mchimi Hananiya wati wavwa mazu ngenanga, wanguto goli lo lenga mukhosi la mchimi Yeremiya ndipu wangulifyo.+
11 Pavuli paki, pa masu pa ŵanthu wosi, Hananiya wangukamba kuti: “Yehova wakamba kuti, ‘Nge mo ndachitiya yapa, ndimu so ndazamufyole goli laku Nebukadinezara fumu ya ku Babiloni kutuliya mumakhosi nga mitundu yosi ya ŵanthu mu vyaka viŵi pe.’”+ Ndipu mchimi Yeremiya wangutuwapu.
12 Mchimi Hananiya wati wafyo goli lo lenga mukhosi la mchimi Yeremiya, Yehova wangukambiya Yeremiya kuti:
13 “Luta kwaku Hananiya ndipu ukamukambiyi kuti, ‘Yehova wakamba kuti: “Yiwi wafyo magoli ngachimiti,+ kweni mumalu mwaki papangikengi magoli ngavisulu.”
14 Pakuti Yehova wa mizinda, Chiuta waku Isirayeli wakamba kuti: “Ndiŵikengi goli lachisulu mukhosi la mitundu yosi iyi, kuti yiteŵete Nebukadinezara fumu ya ku Babiloni, ndipu yazakumuteŵete nadi.+ Ndazakumupaska chinanga ndi vinyama vamudondu.”’”+
15 Pavuli paki, mchimi Yeremiya wangukambiya mchimi Hananiya+ kuti: “Vwisiya, yiwi Hananiya! Yehova wakutuma cha, kweni yiwi wachitiska kuti ŵanthu yaŵa agomezgi vinthu vaboza.+
16 Mwaviyo, Yehova wakamba kuti, ‘Awona! ndikutuzgengepu pacharu, pakuti wachiska ŵanthu kuti agarukiyi Yehova.’”+
17 Mwaviyo, mchimi Hananiya wangufwa chaka chenichi, mu mwezi wa 7.
