Yeremiya 3:1-25
3 Ŵanthu afumba kuti: “Asani munthulumi wadikisa muwolu waki ndipu munthukazi yo, wamuleka mulumu waki ndi kutorana ndi munthulumi munyaki, kumbi munthulumi watenere so kuwelerana ndi munthukazi yo?”
Asi charu cho chanangikiya limu?+
“Wachita uhuli ndi anthulumi anandi,+Kumbi sonu utenere kuwere kwaku ini?” Yehova ndiyu wakamba.
2 “Yunuskiya chisku chaku kumitunthu yambula kanthu ndipu wona.
Kumbi ndi nunkhu ko anthulumi akuleka kukukolere?
Wajanga pasi mumphepeti mwa msewu uchiŵalindizga,Nge munthu wakuyingayinga* muchipululu.
Ulutirizga kunanga charuChifukwa cha uhuli waku kweniso uheni waku.+
3 Mwaviyo vuwa yalekeskeka,+Ndipu kulivi vuwa yakumaliya.
Uchita vinthu mwambula soni nge* munthukazi yo wachita uhuli;Uchita soni cha.+
4 Kweni sonu utindidana kuti,‘Ada, ndimwi munyangu kwambiya pa unamana wangu!+
5 Kumbi mujengi wakukwiya mpaka muyaya,Pamwenga kusunga vifukwa nyengu zosi?’
Venivi ndivu ukamba,Kweni ulutirizga kuchita vinthu vosi viheni mo wakhumbiya.”+
6 Mu mazuŵa nga Fumu Yosiya,+ Yehova wangundikambiya kuti: “‘Kumbi wawona vo Isirayeli wambula kugomezgeka wachita? Iyu wakwera pa phiri lelosi litali ndipu waluta pasi pa chimiti chechosi chakubiriŵira kuti wachiti uhuli.+
7 Chinanga kuti wachitanga vinthu vosi venivi, ndamukambiyanga kuti wawere kwaku ini,+ kweni wanguwere cha kwaku ini; ndipu Yuda wamuwonanga ŵaka mku waki wambula kugomezgeka.+
8 Ndati ndawona venivi, ndingudikisa Isirayeli wambula kugomezgeka ndipu ndingumupaska kalata yachipata+ chifukwa chakuti wanguchita chigololu.+ Kweni mvurwa waki wambula kugomezgeka, Yuda, wanguchita mantha cha, nayu wangwamba kuchita uhuli.+
9 Iyu wangupepuska uhuli wo wachitanga, ndipu wangulutirizga kunanga charu kweniso kuchita chigololu ndi mya ndipuso vimiti.+
10 Chinanga kuti wanguwona vosi ivi, Yuda, mvurwa waki wambula kugomezgeka, wanguwere kwaku ini ndi mtima waki wosi cha, kweni mwakupusikiziya ŵaka,’ Yehova ndiyu wakamba.”
11 Pavuli paki, Yehova wangundikambiya kuti: “Isirayeli wambula kugomezgeka walongo kuti ndi murunji ukongwa kuluska Yuda wambula kugomezgeka.+
12 Luta kunkhondi*+ ndipu ukapharazgi mazu yanga:
“‘“Were kwaku ini, yiwi Isirayeli wakugaruka,” Yehova ndiyu wakamba.’+ ‘“Ndazakukulereska mwakukwiya cha,*+ pakuti nde wakugomezgeka,” Yehova ndiyu wakamba.’ ‘“Ndijengi wakukwiya mpaka muyaya cha.
13 Zomera ubudi waku, pakuti wagarukiya Yehova Chiuta waku. Ungulutirizga kupereka vinthu vaku vamampha* kwa alendu* pasi pa chimiti chechosi chakubiriŵira, kweni unguvwiya cha mazu ngangu,” Yehova ndiyu wakamba.’”
14 “Weriyani kwaku ini, yimwi ŵana akugaruka,” Yehova ndiyu wakamba. “Pakuti ini ndaja mbuyamwi* chayiyu, ndipu ndazakukutoni, yumoza kutuliya mutawuni yeyosi kweniso ŵaŵi kutuliya mu banja lelosi, ndipu ndazamuluta namwi ku Ziyoni.+
15 Ndazakukupaskani aliska wo azamuchita vo ndikhumba,+ ndipu azakukuwovyani kuziŵa vinthu kweniso kuwamu.
16 Mu mazuŵa ngo, mwazamuyandana ndi kubala vipasu mucharu cho,” Yehova ndiyu wakamba.+ “Azamukamba so cha kuti, ‘Bokosi la phanganu laku Yehova!’ Bokosi lo, lazamukuza so cha mumtima, azakulikumbuka cha pamwenga kulikhumbira, ndipuso lazamupangika so cha.
17 Pa nyengu yo, azamudana Yerusalemu kuti mpandu waufumu waku Yehova.+ Mitundu yosi ya ŵanthu yazamuwunganisikiya ku zina laku Yehova ku Yerusalemu,+ ndipu azamuchita mtafu so cha, kulondo mitima yawu yiheni.”
18 “Mu mazuŵa ngo, nyumba yaku Yuda yazamuyende limoza ndi nyumba yaku Isirayeli.+ Wosi limoza azamutuliya kucharu cha kunkhondi* ndipu azamusere mucharu cho ndingupaska apapi ŵinu akali nge chihara.+
19 Ndipu ndinguŵanaŵana kuti, ‘Ndingukuŵika pakati pa ŵana anthulumi ndipuso ndingukupaska charu chamampha, chihara chakutowa ukongwa pakati pa mitundu ya ŵanthu!’*+ Ndinguŵanaŵana so kuti mundidanengi kuti, ‘Ada!’ ndipuso kuti mulekengi cha kundilondo.
20 ‘Nadi, nge mo munthukazi wambula kugomezgeka waleke mulumu waki,* yimwi namwi a munyumba yaku Isirayeli, mwachita vinthu mwambula kugomezgeka kwaku ini,’+ Yehova ndiyu wakamba.”
21 Chiwawa chivwika pa mitunthu yambula kanthu,Kuliya kweniso kuŵeyere kwa Ayisirayeli,Pakuti anyongoro nthowa zawu;Aluwa Yehova Chiuta wawu.+
22 “Weriyani kwaku ini, yimwi ŵana akugaruka.
Ndazamuchizga kugaruka kwinu.”+
“Awonani! Taza kwaku yimwi,Pakuti yimwi Yehova, ndimwi Chiuta widu.+
23 Nadi, mitunthu kweniso chimtimbaheka cho chivwika pamapiri, ndi vinthu chayivu cha.+
Nadi, utaski waku Isirayeli we mwaku Yehova Chiuta widu.+
24 Kweni chinthu chakulengesa chameza* ntchitu yakuvukisa ya apapi ŵidu akali kutuliya pa unamana widu,+Mbereri, mbuzi ndipuso ng’ombi zawu,Ŵana ŵawu anthulumi ndipuso ŵana ŵawu anthukazi.
25 Tiyeni tigoni pasi mwasoni,Ndipu soni zidu zitibenekere,Pakuti tabudiya Yehova Chiuta widu,+Isi kweniso awusefwi, kutuliya pa unamana widu mpaka msanawale,+Ndipu tavwiya cha mazu ngaku Yehova Chiuta widu.”
Mazu Ngam'mphata
^ Mazu ngaki chayingu, “munthu wa ku Arebiya.”
^ Mazu ngaki chayingu, “We ndi chisku cha.”
^ Anyaki akamba kuti, “kumpotu.”
^ Mazu ngaki chayingu, “Ndazakukubwanthuliyani chisku changu cha.”
^ Mazu ngaki chayingu, “kupereka nthowa zaku.”
^ Pamwenga kuti, “kwa achiuta achilendu.”
^ Yapa pangafwatulikiya so kuti, “mulumu winu.”
^ Anyaki akamba kuti, “kumpotu.”
^ Mazu ngaki chayingu, “pakati pa mizinda ya mitundu ya ŵanthu.”
^ Mazu ngaki chayingu, “waleke munyaki.”
^ Pamwenga kuti, “Kweni chiuta wakulengesa wameza.”
