Yeremiya 33:1-26
33 Yehova wangulongoro ndi Yeremiya kachiŵi pa nyengu yo angumujaliya mu Balaza la Alonda,+ ndipu wangumukambiya kuti:
2 “Ivi ndivu Yehova yo wakupanga charu chapasi wakamba, Yehova yo wakuchipanga ndi kuchijalikiska mwanthazi; zina laki ndi Yehova, iyu wakamba kuti,
3 ‘Ndidani ndipu ndikumukengi kweniso ndijengi wakunozgeka kukukambiya vinthu vikulu ndipuso vakusuzga kuvivwisa vo ukuviziŵapu cha.’”+
4 “Pakuti ivi ndivu Yehova Chiuta waku Isirayeli wakamba vakukwaskana ndi nyumba za mutawuni iyi ndipuso nyumba za mafumu nga ku Yuda zo zawisikiya pasi kuti ajivikiliyi ku vimbumira vakuchitiyapu nkhondu ndipuso ku lipanga,+
5 kweniso vakukwaskana ndi ŵanthu wo atuza kuzichita nkhondu ndi Akadiya, ndi kuzaza malu yanga ndi mathupi nga ŵanthu wo ndabaya chifukwa cha kukwiya kweniso ukali wangu, ŵanthu wo vakuchita vawu viheni vachitiska kuti tawuni iyi ndiyibisiyi chisku changu, iyu wakamba kuti:
6 ‘Ŵanthu a mutawuni yo, ndazakuŵaweziyamu nthazi ndi kuŵapaska umoyu wamampha,+ ndipu ndazakuŵachizga ndi kuŵavumbuliya chimangu chikulu ndi uneneska.+
7 Ŵanthu a ku Yuda kweniso a ku Isirayeli wo akutoleke ku ukapolu ndazakuŵaweze mucharu chawu,+ ndipu ndazakuŵazenga nge mo ndinguchitiya pakwamba.+
8 Ndazakuŵatowesa ku mulandu wosi wa maubudi ngo akundichitiya,+ ndipu ndazakuŵagowoke mulandu wosi wa maubudi ngawu kweniso mphulupulu zawu.+
9 Zina la tawuni yo lazakundikondwesa ndipu lazamuchitiska kuti ndithamikiki ndi kukankhuskika pa masu pa mitundu yosi ya ŵanthu ya pacharu chapasi, yo yazamukuvwa va vinthu vosi vamampha vo ndaŵachitiya.+ Ndipu yazamuchita mantha ndi kumbwambwanthiya+ chifukwa cha vinthu vamampha ndipuso chimangu cho ndazamupaska ŵanthu a mutawuni yo.’”+
10 “Yehova wakamba kuti: ‘Mumalu yanga ngo mwazamukamba kuti nganangika, mulivi ŵanthu kweniso viŵetu, mumatawuni nga mu Yuda kweniso mumisewu ya mu Yerusalemu yo yanangika ndipu mulivi ŵanthu, muja weyosi cha kweniso mulivi viŵetu, mwazamuvwika so
11 chiwawa cha kuzaya, chiwawa cha likondwa,+ mazu nga munthulumi mweneku wa nthengwa ndipuso mazu nga mwali, mazu nga ŵanthu wo azamukambanga kuti: “Wongani Yehova wa mizinda, chifukwa Yehova ngwamampha;+ chanju chaki chambula kumala ntchamuyaya!”’+
“‘Yiwu azamukuza ndi sembi zakuwonga munyumba yaku Yehova,+ pakuti ŵanthu a mucharu ichi wo akutoleke ku ukapolu ndazakuŵaweze mucharu chawu, nge mo venge pakwamba.’ Yehova ndiyu wakamba.”
12 “Yehova wa mizinda wakamba kuti: ‘Mumalu ngakunangika yanga, ngo mulivi ŵanthu kweniso viŵetu, ndipuso mumatawuni ngaki ngosi mwazamuja so malu ngakuliskaku viŵetu ngo aliska azamupumuzgiyangaku miskambu yawu.’+
13 “‘Mumatawuni nga muchigaŵa cha mapiri, mumatawuni nga muchidika, mumatawuni nga kumwera, mucharu cha Benjamini, muvigaŵa vapafupi ndi Yerusalemu+ ndipuso mumatawuni nga ku Yuda,+ aliska azamuŵerenganga so mbereri zawu,’* Yehova ndiyu wakamba.”
14 “‘Awonani! Mazuŵa ngatuza,’ Yehova ndiyu wakamba, ‘po ndazamufiska layizgu lamampha lo ndakamba lakukwaskana ndi nyumba yaku Isirayeli ndipuso nyumba yaku Yuda.+
15 Mu mazuŵa ngeningo kweniso pa nyengu yeniyo ndazamuchitiska kuti mphukira yaurunji yaku Davidi yibuki,*+ ndipu iyu wazamupereka cheruzgu chakunyoloka kweniso wazamuchita vinthu mwaurunji mucharu.+
16 Mu mazuŵa ngeningo, Yuda wazamutaskika+ ndipu Yerusalemu wazamuja mwakuvikilirika.+ Ndipu Yerusalemu wazamudanika kuti: Yehova Mburunji Widu.’”+
17 “Pakuti Yehova wakamba kuti: ‘Pampandu waufumu waku Isirayeli palekengi cha kuja munthu wakutuliya mumzeri waku Davidi,+
18 ndipuso vazamuchitikapu cha kuti pakati pa asembi wo Mbalevi paŵevi munthu wakuti wamengi pa masu pangu ndi kupereka sembi zakupiriza zamphumphu, kuti wawotchengi sembi za mbewu ndipuso kuti waperekengi sembi zinyaki.’”
19 Yehova wangukambiya Yeremiya kuti:
20 “Yehova wakamba kuti, ‘Asani mungaswa phanganu langu lakukwaskana ndi msana kweniso phanganu langu lakukwaskana ndi usiku, kuti msana kweniso usiku vileki kuza pa nyengu yaki,+
21 mbwenu phanganu lo ndinguchita ndi mteŵeti wangu Davidi lingasweka+ kuti waŵevi mwana wakuti walamuliyi nge fumu pampandu waki waufumu,+ kweniso phanganu lo ndikuchita ndi asembi wo Mbalevi, ateŵeti ŵangu lingasweka.+
22 Nge mo yiliri mizinda yakuchanya yo yingaŵerengeka cha kweniso mchenga wa munyanja wo ungapimika cha, ndimu so ndazamuyandanisiya mphapu* ya mteŵeti wangu Davidi kweniso Alevi wo atinditeŵete.’”
23 Ndipu Yehova wangulongoro so ndi Yeremiya, ndipu wanguti:
24 “Kumbi wavwa cha vo ŵanthu yaŵa akamba kuti, ‘Yehova wazamukana mabanja ngaŵi ngo wakusankha’? Yiwu ayuyuwa ŵanthu ŵangu ndipu atiŵawona so nge mtundu cha.
25 “Yehova wakamba kuti: ‘Nge mo ndajalikiskiya phanganu langu lakukwaskana ndi msana kweniso usiku,+ marangu nga kuchanya ndi charu chapasi,+
26 ndazakuyikana cha mphapu* yaku Yakobe kweniso ya mteŵeti wangu Davidi ndipu ndazamuleka cha kutopu akulamuliya pa mphapu* yaki kuti alamuliyengi ŵana aku Abrahamu, Isaki ndi Yakobe. Pakuti ŵana ŵawu* wo angutoleke ku ukapolu,+ ndazakuŵaweze kwawu ndi kuŵachitiya chitima.’”+
Mazu Ngam'mphata
^ Mazu ngaki chayingu, “mbereri zazamujumphanga so kusi kwa janja la munthu yo watiziŵerenga.”
^ Pamwenga kuti, “kuti wakuhara waurunji waku Davidi wabuki.”
^ Mazu ngaki chayingu, “mbewu.”
^ Mazu ngaki chayingu, “mbewu.”
^ Mazu ngaki chayingu, “mbewu.”
^ Mazu ngaki chayingu, “mbewu.”
