Yeremiya 37:1-21
37 Ndipu Fumu Zedekiya+ mwana waku Yosiya yingwamba kulamuliya mumalu mwaku Koniya*+ mwana waku Yehoyakimu, pakuti Nebukadinezara* fumu ya ku Babiloni wangumuŵika kuja fumu mucharu cha Yuda.+
2 Kweni iyu, ateŵeti ŵaki ndipuso ŵanthu a mucharu cho anguvwiya cha mazu ngo Yehova wangukamba kuziya mwa mchimi Yeremiya.
3 Ndipu Fumu Zedekiya yingutuma Yehukali+ mwana waku Selemiya ndipuso Zefaniya+ mwana waku Maseya, wasembi, kuti waluti kwaku Yeremiya kuti wakamukambiyi kuti: “Chondi tipemphere kwaku Yehova Chiuta widu.”
4 Yeremiya wayendanga mwakufwatuka pakati pa ŵanthu chifukwa chakuti wenga wechendaŵikiki mujeri.+
5 Sonu asilikali aku Farawo angunyamuka ku Ijipiti+ ndipu Akadiya wo anguzingiliza Yerusalemu anguvwa vakukwaskana ndi yiwu. Mwaviyo angutuwaku ku Yerusalemu.+
6 Pavuli paki, Yehova wangukambiya mchimi Yeremiya kuti:
7 “Yehova Chiuta waku Isirayeli wakamba kuti, ‘Fumu ya ku Yuda yo yakutuma kuti uzifumbi kwaku ini, ukayikambiyi kuti: “Awona! Asilikali aku Farawo wo atuza kuzikuwovya azamuwere kucharu chawu, cha Ijipiti.+
8 Akadiya azamukuza so ndipu azamuchita nkhondu ndi tawuni iyi, azakuyilonda ndi kuyiwotcha ndi motu.”+
9 Yehova wakamba kuti, “Mungajipusikanga cha ndi kukamba kuti, ‘Akadiya azamutuliyaku limu kwaku isi,’ pakuti azamutuliyaku limu cha.
10 Chinanga mungabaya asilikali wosi a Akadiya wo achita namwi nkhondu ndi kujaku ŵaka anthulumi akupwetekeka, yiwu angayuka mbwenu kutuliya mumahema ngawu ndi kotcha tawuni iyi ndi motu.”’”+
11 Asilikali a Akadiya ŵati atuwaku ku Yerusalemu chifukwa cha asilikali aku Farawo,+
12 Yeremiya wangusoka ku Yerusalemu kuti waluti kucharu cha Benjamini+ kuti wakalonde chigaŵa chaki pakati pa ŵanthu ŵaki.
13 Kweni wati wafika pa Geti Laku Benjamini, mura wa alonda zina laki Iriya, mwana waku Selemiya, mwana waku Hananiya wanguko Yeremiya ndi kumukambiya kuti: “Uthaŵiya kwa Akadiya!”
14 Yeremiya wangukamba kuti: “Awa ndi viyo cha! Ndithaŵiya kwa Akadiya cha.” Kweni Iriya wangumuvwiya cha. Mwaviyo Iriya wangumanga Yeremiya ndi kuluta nayu kwa alongozgi.
15 Alongozgi angumukwiyiya ukongwa Yeremiya+ ndipu angumukhwapa ndi kumuŵika mujeri*+ munyumba yaku Yehonatani, mlembi, yo anguyisambusa jeri.
16 Yeremiya angumuŵika mujeri,* muvipinda vapasi, ndipu wangujamu kwa mazuŵa nganandi.
17 Pavuli paki, Fumu Zedekiya yingudaniya Yeremiya munyumba yaki,* ndipu yingumufumba mafumbu mwachisisi.+ Fumu yo yingufumba kuti, “Pe mazu ngengosi ngo Yehova wakamba?” Yeremiya wangumuka kuti, “Hinya ngalipu!” ndipu wangulutirizga kukamba kuti, “Yimwi mwazamuperekeka mu manja mwa fumu ya ku Babiloni!”+
18 Yeremiya wangukambiya so Fumu Zedekiya kuti: “Kumbi ndakunangiyaninji, yimwi, ateŵeti ŵinu kweniso ŵanthu yaŵa, kuti mundiŵiki mujeri?
19 Sonu ŵe pani achimi ŵinu wo akukambiyaningi mauchimi, kuti, ‘Fumu ya ku Babiloni yizengi cha kuziyukiya yimwi kweniso charu ichi’?+
20 Sonu avwani, yimwi ambuya fumu yangu. Chondi ndichitiyeni lisungu. Mungandiweziyanga kunyumba yaku Yehonatani+ mlembi cha, pakuti mbwenu ndamukufwa.”+
21 Mwaviyo Fumu Zedekiya yingulamula kuti Yeremiya waŵikiki mujeri mu Balaza la Alonda,+ ndipu zuŵa lelosi amupaskanga chiŵandi chimoza chakuzunguliya kutuliya kumsewu wa akupanga viŵandi+ mpaka po viŵandi vosi vingumaliya mutawuni yo.+ Ndipu Yeremiya wangulutirizga kuja mu Balaza la Alonda.
Mazu Ngam'mphata
^ Wadanika so kuti Yehoyakini kweniso Yekoniya.
^ Zina ili lilembeka so kuti, “Nebukadirezara.”
^ Mazu ngaki chayingu, “munyumba ya simbi.”
^ Mazu ngaki chayingu, “munyumba yazenji.”
^ Pamwenga kuti, “munyumba yaki yachifumu.”
