Yeremiya 4:1-31
4 Yehova wakamba kuti: “Yiwi Isirayeli, asani uweleriyengi,Asani uweriyengi kwaku iniNdipuso asani utuzgengepu angoza akuseruska pa masu pangu,Mbwenu ujengi wakuthaŵathaŵa cha.+
2 Asani ulapizga kuti,‘Mu zina laku Yehova Chiuta wamoyu!’ mu uneneska, mu urunji kweniso mu kunyoloka mtima,Mbwenu mitundu yosi ya ŵanthu yazakujisaniriya vitumbiku chifukwa chaku iyu,Ndipu azamumalika mwaku iyu.”+
3 Pakuti Yehova wakambiya ŵanthu a ku Yuda kweniso ku Yerusalemu kuti:
“Jilimiyeni minda panyata,Ndipuso lekani kumija mbewu muminga.+
4 Jidumuweni pa masu paku Yehova,Ndipu tuzganiku khungu la mitima yinu,+Yimwi ŵanthu a ku Yuda kweniso ŵanthu a ku Yerusalemu,Kuti ukali wangu uleki kukole nge motuNdi kubuka kwambula munthu wakuwuzimwa,Chifukwa cha vinthu viheni vo muchita.”+
5 Pharazgani mu Yuda, ndipu memezani mu Yerusalemu.
Danirizani ndipuso mbani mbata* mucharu chosi.+
Danirizani ukongwa ndipu kambani kuti: “Wunganani pamoza,Ndipu tiyeni tithaŵiyi kumatawuni nga mipanda yakukho.+
6 Soskani chiziŵisu* chakulongo nthowa ya ku Ziyoni.
Penjani kwakubisama, ndipu mungamanga ŵaka jo cha,”
Pakuti ndituza ndi soka kutuliya kunkhondi,*+ soka likulu.
7 Wabuka nge nkharamu kutuliya muchivwati chaki;+Wakubwanganduwa mitundu ya ŵanthu wanyamuka.+
Watuwaku kumalu ngaki kuti wasambusi charu chaku kuja chinthu chakuchitiska mantha.
Matawuni ngaku ngazamubwangandulika ndipu mwazamuŵavi wakujamu.+
8 Mwaviyo, vwalani vigudulu,+Liyani* ndi kutenje,Chifukwa chakuti ukali waku Yehova wakukole watuwaku cha kwaku isi.
9 Yehova wakamba kuti: “Mu zuŵa lo, mtima wa fumu wazamusongonoka,*+Kweniso mitima ya alongozgi yazamusongonoka;*Asembi azamuchita mantha, ndipu achimi azamuzizwa.”+
10 Pavuli paki ndingukamba kuti: A Yehova, Ambuya Fumu Yikulu! Mwapusisa ŵanthu yaŵa+ kweniso Yerusalemu, ndipu mwakamba kuti: ‘Mwazamuja mwachimangu,’+ kweni lipanga le pakhosi pidu.”
11 Pa nyengu yo, ŵanthu azamukambiya ŵanthu yaŵa kweniso Yerusalemu kuti:
“Chimphepu chakotcha chakutuliya kumitunthu yambula kanthu ya muchipalambaChazamupeya mwana munthukazi wa ŵanthu ŵangu;Chituza kuzipeta cha pamwenga kutowesa.
12 Chimphepu chikulu chituliya kumalu yanga mwakutumika ndi ini.
Sonu ndiperekengi cheruzgu kwaku yiwu.
13 Awonani! Iyu wazengi nge mitambu ya vuwa,Ndipu magaleta ngaki nge nge chimphunga.+
Mahachi ngaki ngatchimbiya kuphara nombu.+
Soka kwaku isi, pakuti tamala!
14 Yiwi Yerusalemu, towesa mtima waku ndipu tuzgamu vinthu viheni, kuti utaskiki.+
Kumbi ujengi ndi maŵanaŵanu ngaheni mpaka zuŵanji?
15 Pakuti mazu ngakamba nkhani kutuliya ku Dani,+Ndipuso ngapharazga soka kutuliya kumapiri nga ku Efurayemu.
16 Pharazga venivi ku mitundu ya ŵanthu;Vipharazgi ku Yerusalemu.”
“Alonda atuza kutuliya kucharu chakutali,Ndipu azamukweza mazu ngawu kulimbana ndi matawuni nga ku Yuda.
17 Yiwu atuza kuti alimbani nayu muvigaŵa vosi nge alonda a munda,+Chifukwa chakuti wandigarukiya,”+ Yehova ndiyu wakamba.
18 “Nthowa zaku kweniso vakuchita vaku vikuweriyengi.+
Soka laku lazamuja lakuŵaŵa ukongwa,Pakuti lazamufika mumtima mwaku!”
19 Kotu ama ine,* kotu ama!
Ndapwetekeka ukongwa mumtima mwangu.
Mtima wangu ukhung’uska mukati mwangu.
Ndingafiska cha kuja cheti,Pakuti ndavwa kuliya kwa mbata,*Kuliya kwa chiziŵisu cha nkhondu.*+
20 Masoka nganandi ngapharazgika,Pakuti charu chosi chabwangandulika.
Mahema ngangu ngabwangandulika mwamabuchibuchi,Salu zangu za hema zanangika mu kanyengu kamanavi.+
21 Kumbi ndilutirizgengi kuwona chiziŵisu*Ndipuso kuvwa kuliya kwa mbata mpaka zuŵanji?+
22 “Pakuti ŵanthu ŵangu mbakupusa;+Yiwu alivi nani ntchitu.
Mbana azereza, ambula kuvwisa vinthu.
Yiwu mbakuchenje* ukongwa pakuchita vinthu viheni,Kweni aziŵa cha mo angachitiya vinthu vamampha.”
23 Ndingulereska charu, ndipu awonani! chenga chambula kanthu kweniso chenga mahami.+
Ndinguwona kuchanya, ndipu kwengavi ukweru waki.+
24 Ndingulereska mapiri ndipu awonani! ngandengandenganga,Ndipu mitunthu yasukunyikanga.+
25 Ndingulereska ndipu awonani! kwengavi munthu weyosi,Ndipu viyuni vosi vamude vinguthaŵa.+
26 Ndingulereska ndipu awonani! munda wa vipasu ungusambuka chipululu,Ndipu matawuni ngaki ngosi nganguwisikiya pasi.+
Chenga chifukwa chaku Yehova,Chifukwa cha ukali waki wakukole.
27 Pakuti Yehova wakamba kuti: “Charu chosi chazamusambuka mahami,+Kweni ndazakuchinangiya limu cha.
28 Pa chifukwa chenichi, charu chazamuliya,+Ndipu kuchanya kwazamuchita mdima.+
Chifukwa chakuti ndalongoro, ndasankha,Ndazamusintha cha maŵanaŵanu ngangu ndipu ndazamuwelere cha.+
29 Chifukwa cha chiwawa cha akukwera pamahachi kweniso akuponya mivi,Ŵanthu wosi athaŵa mutawuni.+
Yiwu asere mumatundu,Ndipu akwera mumajalawi.+
Tawuni yeyosi yajowoleka,Ndipu palivi munthu yo wajamu.”
30 Uchitengenji sonu pakuti wabwangandulika?
Wavwalanga vakuvwala viyera,Wajitowesanga ndi vakujitowese vagolidi,Ndipu wakuzganga masu ngaku ndi penti yifipa.
Kweni ungujitowese paŵaka,+Pakuti wo akukhumbiranga akukana;Sonu yiwu apenja kukubaya.+
31 Pakuti ndavwa kuliya nge kwa munthukazi yo watama,Urwirwi nge wa munthukazi yo wabala mwana waki wakwamba,Chiwawa cha mwana munthukazi wa ku Ziyoni, yo waŵeŵefuka.
Iyu watambasuwa manja ngaki ndipu wakamba kuti:+
“Soka kwaku ini, pakuti ndavuka chifukwa cha ŵanthu akubaya!”
Mazu Ngam'mphata
^ Anyaki akamba kuti, “lipenga.”
^ Pamwenga kuti, “polu lachiziŵisu.”
^ Anyaki akamba kuti, “kumpotu.”
^ Pamwenga kuti, “Pumani pavifuŵa vinu.”
^ Pamwenga kuti, “chiganga cha fumu chazamusongonoka.”
^ Pamwenga kuti, “chiganga cha alongozgi chazamusongonoka.”
^ Mazu ngaki chayingu, “Matumbu ngangu.”
^ Anyaki akamba kuti, “lipenga.”
^ Yapa pangafwatulikiya so kuti, “Chiwawa cha kuliya chifukwa cha nkhondu.”
^ Pamwenga kuti, “polu lachiziŵisu.”
^ Pamwenga kuti, “mbazeru.”
