Yeremiya 40:1-16
40 Yehova wangulongoro ndi Yeremiya, Nebuzaradani+ mura wa asilikali akuvikiliya fumu wati wafwatuwa Yeremiya ku Rama.+ Nebuzaradani wangumutole kwenuku we mu simbi ndipu wenga limoza ndi ŵanthu a ku Yerusalemu ndi ku Yuda wo alutanga nawu ku Babiloni.
2 Pavuli paki, mura wa asilikali akuvikiliya fumu wanguto Yeremiya ndipu wangumukambiya kuti: “Yehova Chiuta waku wangukambiya limu kuti soka ili liwiyengi malu yanga,
3 ndipu Yehova wawisa nadi soka nge mo wangukambiya, chifukwa chakuti mwaŵanthu yimwi mungubudiya Yehova ndipu munguvwiya cha mazu ngaki. Ndichu chifukwa chaki ivi vakuchitikiyani.+
4 Sonu nditikufwatuwa ku simbi zo zenga kumanja ngaku. Asani ukhumba kuluta nani ku Babiloni, mbwenu tiyeni, ndipu ndakukuphwere. Kweni asani ukhumba cha kuluta nani ku Babiloni mbwenu kuluta cha. Awona! Charu chosi ichi che pa masu paku. Luta kwekosi ko wakhumba.”+
5 Yeremiya wechendanyamuki, Nebuzaradani wangumukambiya kuti: “Were kwaku Gedaliya+ mwana waku Ahikamu,+ mwana waku Shafani,+ yo fumu ya ku Babiloni yamusankha kuti walamuliyengi matawuni nga ku Yuda ndipu ukajengi nayu pakati pa ŵanthu ŵaku; pamwenga luta kwekosi ko wakhumba.”
Mura wa asilikali akuvikiliya fumu wangumupaska chakurya kweniso mphasu ndipu wangumukambiya kuti wakengi.
6 Mwaviyo, Yeremiya wanguluta kwaku Gedaliya mwana waku Ahikamu ku Mizipa+ ndipu wanguja nayu kweniko pakati pa ŵanthu wo angujaliya mucharu cho.
7 Pati pajumpha nyengu, ŵara ŵa asilikali wo ŵenga kuvigaŵa vakubwalu kwa tawuni limoza ndi ŵanthu ŵawu, anguvwa kuti fumu ya ku Babiloni yikusankha Gedaliya mwana waku Ahikamu kuti walamuliyengi charu cho ndipuso kuti yikumusankha kuti waje ndi mazaza pa anthulumi, anthukazi ndipuso ŵana a ŵanthu akavu a mucharu cho, wo anguleka kutoleke ku Babiloni.+
8 Mwaviyo, yiwu anguluta kwaku Gedaliya ku Mizipa.+ Ŵanthu yaŵa ŵenga Ishimayeli+ mwana waku Netaniya, Yohanani+ ndi Yonatani, ŵana aku Kareya, Seraya mwana waku Tanihumeti, ŵana aku Efayi wa ku Netofa, ndipuso Yezaniya+ mwana wa munthu wa ku Mayakati. Yiwu ŵenga limoza ndi ŵanthu ŵawu.
9 Gedaliya mwana waku Ahikamu mwana waku Shafani wangulapizga kwaku yiwu kweniso ku ŵanthu ŵawu, ndipu wangukamba kuti: “Mungawopanga cha kuteŵete Akadiya. Jani mucharu chinu ndi kuteŵete fumu ya ku Babiloni, ndipu vinthu vikuyendiyeningi umampha.+
10 Ini ndamuja ku Mizipa kuti nkhakumiyeni kwa* Akadiya wo atuza kwaku isi. Kweni yimwi muwunganisi vinyu, vipasu va mu chihanya kweniso mafuta ndipu muviŵiki muviyaŵi vakusungiyamu vinthu. Lutani mukajengi mumatawuni ngo mwalonda.”+
11 Ndipu Ayuda wosi wo ajanga ku Mowabu, ku Amoni, ku Edomu kweniso wo ajanga muvyaru vinyaki vosi, nawu so anguvwa kuti fumu ya ku Babiloni yazomereza kuti ŵanthu akujaku alutirizgi kuja mu Yuda ndipuso kuti yasankha Gedaliya mwana waku Ahikamu, mwana waku Shafani, kuti waŵalamuliyengi.
12 Mwaviyo, Ayuda wosi angwamba kuweku kumalu ngosi ngo angumbininikiya, ndipu anguza kucharu cha ku Yuda, kwaku Gedaliya ku Mizipa. Yiwu anguwunganisa vinyu munandi ukongwa ndipuso vipasu vinandi ukongwa va mu chihanya.
13 Yohanani mwana waku Kareya ndi ŵara wosi ŵa asilikali wo ŵenga kuvigaŵa vakubwalu kwa tawuni anguza kwaku Gedaliya ku Mizipa.
14 Yiwu angumufumba kuti: “Kumbi muziŵa kuti Balisi, fumu ya Aamoni,+ yatuma Ishimayeli mwana waku Netaniya kuti wazikubayeni?”+ Kweni Gedaliya mwana waku Ahikamu wanguŵagomezga cha.
15 Pavuli paki, Yohanani mwana waku Kareya wangukambiya Gedaliya mwachisisi ku Mizipa kuti: “Ndikhumba kuchibaya Ishimayeli mwana waku Netaniya ndipu palivi yo waziŵengi. Ntchifukwa wuli wakhumba kukubayani, kweniso ŵanthu wosi a ku Yuda wo awungana kwaku yimwi ambininikiyenji, ndipu ŵanthu akujaku wo ŵe ku Yuda amaliyenji?”
16 Kweni Gedaliya+ mwana waku Ahikamu wangukambiya Yohanani mwana waku Kareya kuti: “Ungachitanga cha venivo, chifukwa vo ukamba vakukwaskana ndi Ishimayeli vaboza.”
Mazu Ngam'mphata
^ Mazu ngaki chayingu, “kuti nkhami pa masu pa.”
