Yeremiya 41:1-18
41 Mu mwezi wa 7, Ishimayeli+ mwana waku Netaniya, mwana waku Elishama wa mubanja la fumu,* ndipuso yumoza wa ŵanthu akuzirwa a fumu, wanguza ndi anthulumi 10 kwaku Gedaliya mwana waku Ahikamu ku Mizipa.+ Achiryiya limoza chakurya ku Mizipa,
2 Ishimayeli mwana waku Netaniya ndipuso anthulumi 10 wo wenga nawu, angusoka ndipu angubaya Gedaliya mwana waku Ahikamu, mwana waku Shafani ndi lipanga. Iyu wangubaya munthu yo fumu ya ku Babiloni yingumusankha kuti walamuliyengi charu cho.
3 Ishimayeli wangubaya so Ayuda wo ŵenga ndi Gedaliya ku Mizipa kweniso asilikali wosi a Akadiya wo ŵenga kweniko.
4 Pa zuŵa lachiŵi kutuliya po Gedaliya wangubayikiya, munthu weyosi wechendaziŵi,
5 kunguza anthulumi 80 kutuliya ku Sekemu,+ ku Shilo+ ndipuso ku Samariya.+ Yiwu angumeta mwembi wawu, angukeruwa vakuvwala vawu, angujichekacheka+ kweniso angupinga sembi za mbewu ndi libani+ mumanja mwawu kuti azipereki kunyumba yaku Yehova.
6 Sonu Ishimayeli mwana waku Netaniya wangutuwa ku Mizipa kuti wakakumani nawu, iyu waliyanga uku watenda. Wati wakumana nawu, wanguŵakambiya kuti: “Tiyeni kwaku Gedaliya mwana waku Ahikamu.”
7 Kweni ŵati afika mutawuni yo, Ishimayeli mwana waku Netaniya ndi ŵanthu ŵaki angubaya anthulumi wo ndi kuŵaponya muchisimi.
8 Kweni pakati pa anthulumi wo, penga anthulumi 10 wo angukambiya Ishimayeli kuti: “Kutibaya cha, pakuti tabisa tirigu, balire, mafuta ndi uchi kudondu.” Mwaviyo, wanguŵabaya cha limoza ndi abali ŵawu.
9 Sonu Ishimayeli wangutaya mathupi ngosi nga anthulumi wo wangubaya muchisimi chikulu cho fumu Asa yingukumba chifukwa chaku Basha fumu ya ku Isirayeli.+ Chisimi ichi ndichu Ishimayeli mwana waku Netaniya wanguzazamu mathupi nga ŵanthu wo wangubaya.
10 Ishimayeli wanguko ukapolu ŵanthu wosi wo ŵenga ku Mizipa,+ kusazgapu ŵana anthukazi a fumu kweniso ŵanthu wosi wo angujaku ku Mizipa, wo Nebuzaradani mura wa asilikali akuvikiliya fumu wanguŵaŵika mu manja mwaku Gedaliya+ mwana waku Ahikamu kuti waŵalamuliyengi. Ishimayeli mwana waku Netaniya wanguŵako ukapolu ndipu wangusoka nawu kuti wayambukiyi nawu kwa Aamoni.+
11 Yohanani+ mwana waku Kareya ndipuso ŵara wosi ŵa asilikali wo ŵenga nayu, ŵati ŵavwa vinthu viheni vo Ishimayeli mwana waku Netaniya wanguchita,
12 anguto anthulumi wosi ndipu angusoka kuti akachiti nkhondu ndi Ishimayeli mwana waku Netaniya. Yiwu angumusaniya pafupi ndi maji nganandi* ku Gibiyoni.
13 Ŵanthu wosi wo ŵenga ndi Ishimayeli angukondwa ŵati awona Yohanani mwana waku Kareya ndipuso ŵara wosi ŵa asilikali wo ŵenga nayu.
14 Pavuli paki, ŵanthu wosi wo Ishimayeli wanguŵako ukapolu ku Mizipa,+ angung’anamuka ndipu anguwelere ndi Yohanani mwana waku Kareya.
15 Kweni Ishimayeli mwana waku Netaniya kweniso anthulumi ŵaki 8 anguthaŵa Yohanani ndipu anguluta kwa Aamoni.
16 Yohanani mwana waku Kareya ndipuso ŵara ŵa asilikali wosi wo ŵenga nayu, anguto ŵanthu wosi wo angutuliya ku Mizipa, wo anguŵapozomoska mu manja mwaku Ishimayeli mwana waku Netaniya wati wabaya Gedaliya+ mwana waku Ahikamu. Yiwu anguto anthulumi, asilikali, anthukazi, ŵana, kweniso nduna kutuliya ku Gibiyoni.
17 Sonu angusoka ndipu anguchija kumalu ngakugonaku ngaku Chimuhamu pafupi ndi Betelehemu,+ yiwu akhumbanga kuluta ku Ijipiti+
18 chifukwa cha Akadiya. Pakuti aŵawopanga, chifukwa chakuti Ishimayeli mwana waku Netaniya wangubaya Gedaliya mwana waku Ahikamu, yo fumu ya ku Babiloni yingumusankha kuti walamuliyengi charu cho.+
Mazu Ngam'mphata
^ Mazu ngaki chayingu, “yo wenga mbewu yachifumu.”
^ Yapa pangafwatulikiya so kuti, “pafupi ndi damu likulu.”
