Yeremiya 42:1-22
42 Sonu ŵara wosi ŵa asilikali, Yohanani+ mwana waku Kareya, Yezaniya mwana waku Hoshaya kweniso ŵanthu wosi, kwambiya mumana ukongwa mpaka mura ukongwa, anguza
2 ndipu angukambiya mchimi Yeremiya kuti: “Tichitiyi lisungu ndipu utipemphere kwaku Yehova Chiuta widu. Upemphere ŵanthu wosi akujaku yaŵa, pakuti tajaku amanavi ŵaka+ nge mo uwone.
3 Yehova Chiuta waku watikambiyi nthowa yo titenere kwendamu kweniso vo titenere kuchita.”
4 Mchimi Yeremiya wanguŵamuka kuti: “Ndavwa vo mwakamba, ndikupempheriyeningi kwaku Yehova Chiuta winu mwakukoliyana ndi pemphu linu, ndipu vosi vo Yehova wakumukeningi ndikukambiyeningi. Ndikubiseningi kanthu kekosi cha.”
5 Yiwu angumuka Yeremiya kuti: “Yehova waje kaboni wauneneska kweniso wakugomezgeka ndipu watilangi asani tilekengi kuchita mwakukoliyana ndi mo Yehova Chiuta widu watikambiyengi kuporote mwaku yiwi.
6 Kwali vo watikambiyengi vamampha pamwenga viheni, tivwiyengi mazu ngaku Yehova Chiuta widu, yo titikutumaku, kuti vinthu vitiyende umampha chifukwa chakuti tivwiya mazu ngaku Yehova Chiuta widu.”
7 Pati pajumpha mazuŵa 10, Yehova wangulongoro ndi Yeremiya.
8 Mwaviyo, Yeremiya wangudana Yohanani mwana waku Kareya, ŵara wosi ŵa asilikali wo ŵenga nayu, kweniso ŵanthu wosi, kwambiya mumana ukongwa mpaka mura ukongwa.+
9 Iyu wanguŵakambiya kuti: “Yehova Chiuta waku Isirayeli, yo mungunditumaku kuti nkhapereki pemphu linu lakuti wakuchitiyeni lisungu, wakamba kuti:
10 ‘Asani mulutirizgengi kuja mucharu ichi, mbwenu ndikuzengeningi, ndikuwisiyeningi pasi cha, ndikupandeningi, ndikuchesuweningi cha, pakuti ndisinthengi maŵanaŵanu ngangu pa* soka lo ndakuwisiyani.+
11 Mungawopanga cha chifukwa cha fumu ya ku Babiloni yo mutopa.’+
“‘Mungawopanga cha chifukwa chaku iyu,’ Yehova ndiyu wakamba, ‘pakuti nde namwi kuti ndikutaskeni kweniso kuti ndikupozomoskeni mu manja mwaki.
12 Ndikulongoningi lisungu+ ndipu iyu wakuchitiyeningi lisungu ndi kukuweziyani kucharu chinu.
13 “‘Kweni asani mukamba kuti, “Awa, tijengi mucharu ichi cha!” ndipu muvwiya cha mazu ngaku Yehova Chiuta winu
14 mwakukamba kuti, “Awa, mumalu mwaki tilutengi kucharu cha Ijipiti,+ ko tamuwona nkhondu cha pamwenga kuvwa chiwawa cha mbata, pamwenga kusoŵa chiŵandi; kweniko ndiku tamuja,”
15 mbwenu vwani mazu ngaku Yehova, yimwi ŵanthu akujaku a ku Yuda. Yehova wa mizinda, Chiuta waku Isirayeli wakamba kuti: “Asani mwasimikiza kuti muluta ku Ijipiti kuti mukaje kweniko,*
16 mbwenu lipanga lo mutopa, lakukusaniyani kweniko ku Ijipiti, nja yo mutopa yikulondoningi ku Ijipiti ndipu mwamufwiya kweniko.+
17 Ndipu ŵanthu wosi wo asimikiza kuti aluta ku Ijipiti kuti akajengi kweniko, amukufwa ndi lipanga, nja kweniso mulili.* Palivi munthu yo wamupona pamwenga kuthaŵa soka lo ndakuŵawisiya.”’
18 “Pakuti Yehova wa mizinda, Chiuta waku Isirayeli wakamba kuti: ‘Nge mo ndingupunguliya ukali wangu kweniso kukwiya kwangu pa ŵanthu akuja mu Yerusalemu,+ ndimu so ndipunguliyengi ukali wangu paku yimwi asani mulutengi ku Ijipiti, ndipu mwamusambuka chinthu chakutembeka, chinthu chakuchitiska mantha, chinthu chakuyuyulika kweniso chinthu chakunyozeka,+ ndipu mwazakungawona so cha malu yanga.’
19 “Yehova wakususkani, yimwi ŵanthu akujaku a ku Yuda. Mungalutanga cha ku Ijipiti. Ziŵani kuti ndakutcheŵeskani msanawale
20 kuti kunanga kwinu kukubayiseningi. Pakuti mungundituma kwaku Yehova Chiuta winu kuti, ‘Ukatipemphere kwaku Yehova Chiuta widu, uzitikambiyi vosi vo Yehova Chiuta widu wakamba ndipu tazakuvichita.’+
21 Msanawale ndakukambiyani vo Chiuta wakamba, kweni muvwiyengi cha mazu ngaku Yehova Chiuta winu pamwenga kuchita vo wandituma kuti ndikukambiyeni.+
22 Mwaviyo, ziŵani kuti mwamukufwa nadi ndi lipanga, nja kweniso mulili, kumalu ko mukhumba kuluta kuti mukajengi.”+
Mazu Ngam'mphata
^ Pamwenga kuti, “pakuti ndichitengi chitima chifukwa cha.”
^ Pamwenga kuti, “mukaje kweniko kwa nyengu yimanavi.”
^ Pamwenga kuti, “nthenda.”
