Yeremiya 43:1-13
43 Yeremiya wati wamaliza kukambiya ŵanthu wosi mazu ngosi ngenanga ngakutuliya kwaku Yehova Chiuta wawu, mazu ngosi ngo Yehova Chiuta wawu wangumutuma kuti wakaŵakambiyi,
2 Azariya mwana waku Hoshaya, Yohanani+ mwana waku Kareya ndipuso anthulumi wosi akujikuzga angukambiya Yeremiya kuti: “Vo ukamba vaboza! Yehova Chiuta widu wakutumapu cha kuti utikambiyi kuti, ‘Mungalutanga cha ku Ijipiti kuti mukaje kweniko.’
3 Kweni Baruki+ mwana waku Neriya ndiyu wakuchitiska kuti ukambi venivi ndi chilatu chakuti tiperekeki mu manja mwa Akadiya, tibayiki pamwenga titoleke ku ukapolu ku Babiloni.”+
4 Mwaviyo, Yohanani mwana waku Kareya, ŵara wosi ŵa asilikali kweniso ŵanthu wosi anguvwiya cha mazu ngaku Yehova ngakuti aje mucharu cha Yuda.
5 Mumalu mwaki, Yohanani mwana waku Kareya kweniso ŵara wosi ŵa asilikali, anguto akujaku wosi a ku Yuda wo anguwere mucharu cha Yuda kuti ajengi mwenimo, kutuliya muvyaru vosi vo angumbininiskikiyaku.+
6 Yiwu anguto anthulumi, anthukazi, ŵana, ŵana anthukazi a fumu ndipuso ŵanthu wosi wo Nebuzaradani+ mura wa asilikali akuvikiliya fumu wanguŵaŵika mu manja mwaku Gedaliya+ mwana waku Ahikamu,+ mwana waku Shafani,+ kweniso mchimi Yeremiya ndi Baruki mwana waku Neriya.
7 Yiwu anguluta ku Ijipiti, chifukwa chakuti anguvwiya cha mazu ngaku Yehova ndipu anguchifika mpaka ku Tapanesi.+
8 Pavuli paki, Yehova wangulongoro ndi Yeremiya ku Tapanesi ndipu wangukamba kuti:
9 “Uto mya yikuluyikulu mumanja mwaku, ndipu ukayibisi mukanthowa kanjerwa ko ke pakhomu la nyumba yaku Farawo ku Tapanesi ndi kujalapu ndi dongu lakukasa. Ukachiti venivi anthulumi a ku Yuda achilereska.
10 Pavuli paki, ukaŵakambiyi kuti, ‘Yehova wa mizinda, Chiuta waku Isirayeli wakamba kuti, “Ndidana Nebukadinezara* fumu yaku Babiloni, mteŵeti wangu,+ ndiŵikengi mpandu waki waufumu pachanya pa mya iyi yo ndabisa, ndipu iyu watandawuwengi hema laki lachifumu pachanya pa mya yo.+
11 Iyu wazengi ndi kuziyukiya charu cha Ijipiti.+ Weyosi yo watenere kufwa ndi mulili wakubaya, wazamukufwa ndi mulili wakubaya, weyosi yo watenere kutoleke ku ukapolu, wazamutoleke ku ukapolu, ndipu weyosi yo watenere kufwa ndi lipanga, wazamukufwa ndi lipanga.+
12 Ndazamubuska nyumba* za achiuta a ku Ijipiti,+ ndipu Nebukadinezara wazamuwotcha achiuta wo ndi kuluta nawu ku ukapolu. Wazakujivwalika charu cha Ijipiti nge mo mliska wavwaliya chakuvwala chaki ndipu wazamutuwamu mucharu cho mwachimangu.*
13 Wazamuvikita vipilala va ku Beti-shemeshi* mucharu cha Ijipiti, ndipuso wazamuwotcha ndi motu nyumba* za achiuta a ku Ijipiti.”’”
Mazu Ngam'mphata
^ Zina ili lilembeka so kuti, “Nebukadirezara.”
^ Pamwenga kuti, “nyumba zakusopiyamu.”
^ Mazu ngaki chayingu, “kwambula kupwetekeka.”
^ Pamwenga kuti, “Nyumba (Nyumba Yakusopiyamu) ya Lumwi,” kung’anamuwa kuti, Heliyopolisi.
^ Pamwenga kuti, “nyumba zakusopiyamu.”