Yeremiya 46:1-28
46 Yehova wangukambiya Yeremiya uthenga wakukwaskana ndi mitundu ya ŵanthu:+
2 Uthenga wakuluta ku Ijipiti+ wakukwaskana ndi asilikali aku Farawo Neko,+ fumu ya ku Ijipiti, yo wanguthereskeka ndi Nebukadinezara* fumu ya ku Babiloni pa Karichemishi, mumphepeti mwa Msinji wa Yufureti, mu chaka chachinayi cha ulamuliru waku Yehoyakimu+ mwana waku Yosiya, fumu ya ku Yuda, wenga wakuti:
3 “Nozgani vishangu vinu vimanavimana* kweniso vikuluvikulu,Ndipu lutani ku nkhondu.
4 Mangani mahachi ndi kukwerapu, yimwi ŵanthu akukwera pamahachi.
Jani mumalu nginu ndipu vwalani visoti vinu.
Puputani mikondu ndi kuvwala vakuvwala vinu vamamba ngavisulu.
5 ‘Ntchifukwa wuli nditiŵawona kuti mbamantha?
Yiwu awelere, asilikali ŵawu athereskeka.
Yiwu atimbanyizgika ndipu athaŵa, asilikali ŵawu alereska kuvuli cha.
Mantha nge peposi,’ Yehova ndiyu wakamba.
6 ‘Ŵanthu ajuŵani angathaŵa cha, ndipu asilikali angathaŵa cha.
Yiwu aguŵa ndi kuwa,Kunkhondi,* mumphepeti mwa Msinji wa Yufureti.’+
7 Ndiyani yo watuza nge Msinji wa Nayelu,Nge misinji ya maji ngakututuka?
8 Ijipiti watuza nge Msinji wa Nayelu,+Nge misinji ya maji ngakututuka,Ndipu wakamba kuti, ‘Ndikweriyengi kweniko ndi kubenekere charu.
Ndinangengi tawuni ndipuso ŵanthu wo aja mwenimo.’
9 Lutani, yimwi mahachi!
Tchimbiyani ukongwa, yimwi magaleta!
Asilikali aluti,Kushi ndi Puti, wo akuziŵa kugwiriskiya ntchitu chishangu,+Ndipuso Aludimu,+ wo akuziŵa kuponya ndi kukunga* uta.+
10 “Zuŵa lo ndaku Yehova wa mizinda, Ambuya Fumu Yikulu, ndi zuŵa lakuweze nduzga, kuti waweze arwani ŵaki. Ndipu lipanga lazamumeza arwani ndi kuguta ndipuso lazamukumwa ndopa zawu ndi kuguta, pakuti Yehova wa mizinda, Ambuya Fumu Yikulu wapereka sembi mucharu cha kunkhondi* mumphepeti mwa Msinji wa Yufureti.+
11 Kwere ku Giliyadi kuti ukato basamu,+Yiwi mwali wa ku Ijipiti.
Wayesa munkhwala wakupambanapambana kweni palivi cho chachitika,Pakuti palivi munkhwala wo ungakuchizga.+
12 Mitundu ya ŵanthu yavwa kuyuyulika kwaku,+Ndipu kuliya kwaku kwazaza mucharu.
Msilikali waguŵa mwa msilikali munyaki,Ndipu wosi atuwa pasi.”
13 Yehova wangukambiya mchimi Yeremiya vakukwaskana ndi kuza kwaku Nebukadinezara* fumu ya ku Babiloni kuti wayukiyi charu cha Ijipiti, ndipu wangukamba kuti:+
14 “Pharazga venivi mu Ijipiti, memeza venivi ku Migidoli.+
Memeza venivi ku Nofi* kweniso ku Tapanesi.+
Kamba kuti, ‘Jani mumalu nginu ndipu nozgekani,Pakuti lipanga lazamumeza ŵanthu wosi.
15 Ntchifukwa wuli ŵanthu ŵinu anthazi akukurwa?
Yiwu atondeka kutchintha,Pakuti Yehova waŵatutuzgiya pasi.
16 Ŵanthu anandi ukongwa aguŵa ndi kuwa.
Yiwu akambiskana kuti:
“Sokani! Tiyeni tithaŵi lipanga lankhazaNdipu tiwere ku ŵanthu ŵidu ndipuso kucharu chidu.”’
17 Kweniko apharazga kuti,‘Farawo fumu ya ku Ijipiti wachita ŵaka chiwawa,Iyu wazomereza kuti mwaŵi ujumphi ŵaka.’*+
18 ‘Nge mo ini ndiliri wamoyu,’ Fumu ndiyu yakamba, yo zina laki ndi Yehova wa mizinda,‘Iyu* wazengi nge Phiri la Tabori+ pakati pa mapiriNdipuso nge Phiri la Karimeli+ mumphepeti mwa nyanja.
19 Panganya katundu waku kuti ukengi ku ukapolu,Yiwi mwana munthukazi yo waja mu Ijipiti.
Pakuti Nofi* wasambukengi chinthu chakuchitiska mantha;Wawotchekengi ndi motu* ndipu walekekengi wambula ŵanthu.+
20 Ijipiti we nge ng’ombi yinthukazi yambula kubalapu yakutowa,Kweni viphanga vizengi kutuliya kunkhondi* ndipu vazakuyiluma.
21 Chinanga mbasilikali aganyu wo ŵe pakati paki ŵe nge matholi* ngakututuŵa,Kweni nawu awelere ndipu wosi athaŵa.
Yiwu angutondeka kutchintha,+Pakuti zuŵa lawu la soka laŵaziya,Nyengu yawu yakuti alangiki yaŵaziya.’
22 ‘Chiwawa chaki che nge chiwawa cha njoka yo yithaŵa,Pakuti atuza ndi nthazi kwaku iyu, apinga mbavi,Nge ŵanthu wo awisiya vimiti pasi.*
23 Yiwu adumuliyengi pasi vimiti vamulisuwa laki,’ Yehova ndiyu wakamba, ‘chinanga kuti lisuwa lo liwoneka nge kuti munthu wangajumphamu cha.
Pakuti mbanandi ukongwa kuluska azombi, angaŵerengeka cha.
24 Mwana munthukazi wa ku Ijipiti wazamulengeseka.
Iyu wazamuperekeka mu manja mwa ŵanthu a kunkhondi.’*+
25 “Yehova wa mizinda, Chiuta waku Isirayeli wakamba kuti: ‘Sonu ndilangengi Amoni+ wa ku No,*+ Farawo, Ijipiti, achiuta ŵaki+ ndipuso mafumu ngaki. Ndilangengi Farawo ndi ŵanthu wosi wo atimuthemba.’+
26 “‘Ndipu ndazakuŵapereka mu manja mwa ŵanthu wo akhumba kuŵabaya, kwaku Nebukadinezara* fumu ya ku Babiloni+ kweniso kwa ateŵeti ŵaki. Kweni pavuli paki, mucharu cha Ijipiti mwazamuja ŵanthu nge mo venge kali,’ Yehova ndiyu wakamba.+
27 ‘Kweni yiwi mteŵeti wangu Yakobe, ungawopanga cha,Ndipu ungachitanga mantha cha, yiwi Isirayeli.+
Pakuti ndazakukutaska kutuliya kutaliNdipuso ndazamutaska mphapu* yaku mucharu cho ajamu nge akapolu.+
Yakobe wazamuweku ndipu wazamuja phee kwambula kutimbanyizgika,+Pazamuŵavi munthu wakuŵawofya.”
28 Mwaviyo, ungawopanga cha, yiwi mteŵeti wangu Yakobe,’ Yehova ndiyu wakamba, ‘pakuti nde nawi.
Ndazamunangiya limu mitundu yosi yo ndingukumbininiskiyaku,+Kweni yiwi ndazakukunanga cha.+
Ndazakukulanga* mwakwenere,+Kweni ndazakukuleka ŵaka cha kwambula kukulanga.’”
Mazu Ngam'mphata
^ Zina ili lilembeka so kuti, “Nebukadirezara.”
^ Kanandi ŵanthu wo aponyanga mivi ndiwu anyamuwanga vishangu venivi.
^ Anyaki akamba kuti, “kumpotu.”
^ Mazu ngaki chayingu, “kukanda.”
^ Anyaki akamba kuti, “kumpotu.”
^ Zina ili lilembeka so kuti, “Nebukadirezara.”
^ Pamwenga kuti, “Mefisi.”
^ Mazu ngaki chayingu, “kuti nyengu yakuŵikika yijumphi ŵaka.”
^ Kung’anamuwa munthu yo wathereskengi Ijipiti.
^ Pamwenga kuti, “Mefisi.”
^ Yapa pangafwatulikiya so kuti, “Wanangikengi.”
^ Anyaki akamba kuti, “kumpotu.”
^ Matholi mbana a ng’ombi.
^ Pamwenga kuti, “wo adeŵa nkhuni.”
^ Anyaki akamba kuti, “kumpotu.”
^ Kung’anamuwa Tebesi.
^ Zina ili lilembeka so kuti, “Nebukadirezara.”
^ Mazu ngaki chayingu, “mbewu.”
^ Pamwenga kuti, “Ndazakukuchenya.”
