Yeremiya 49:1-39
49 Yehova wakamba uthenga wakukwaskana ndi Aamoni+ kuti:
“Kumbi Isirayeli walivi ŵana anthulumi?
Kumbi walivi wakuhara?
Ntchifukwa wuli Malikamu+ walonda malu ngaku Gadi?+
Ndipu ntchifukwa wuli ŵanthu ŵaki aja mumatawuni ngaku Isirayeli?”
2 “‘Mwaviyo, awonani! mazuŵa ngatuza,’ Yehova ndiyu wakamba,‘Po ndazamuchitiska kuti kuliya kwa chiziŵisu cha nkhondu* yakulimbana ndi tawuni ya Raba+ ya Aamoni,+ kuvwiki.
Iyu wazamusambuka chimbumira cha mahami,Matawuni ngaki ngamanangamana* ngazamuwotcheka ndi motu.’
‘Ndipu Isirayeli wazamuto so malu ngo angumuphanga,’+ Yehova ndiyu wakamba.
3 ‘Tenje, yiwi Heshiboni, pakuti Ai wabwangandulika!
Liyani, yimwi matawuni ngamanangamana nga ku Raba.
Vwalani vigudulu.
Liyani ndi kwendakwenda pakati pa makhola ngamya,*Pakuti Malikamu watolekiyengi ku ukapolu,Limoza ndi asembi ŵaki kweniso alongozgi ŵaki akuzirwa.+
4 Ntchifukwa wuli utijiŵikamu chifukwa cha madambu,Chifukwa cha chidika chaku cho mutenda maji, yiwi mwana munthukazi wambula kugomezgeka,Yo wathemba chuma chakiNdipuso yo wakamba kuti: “Ndiyani yo wangalimbana nani?”’”
5 “‘Nditikudaniya chinthu chinyaki chakuchitiska mantha,’ Yehova wa mizinda, Ambuya Fumu Yikulu ndiyu wakamba,‘Kutuliya ku ŵanthu wosi wo aja pafupi nawi.
Wazamumbininiskikiya muvigaŵa vosi,Ndipu palivi yo wazamuwunganisa ŵanthu wo athaŵa.’”
6 “‘Kweni pavuli paki, ndazamuwunganisa Aamoni wo angutoleke ku ukapolu,’ Yehova ndiyu wakamba.”
7 Yehova wa mizinda wakamba uthenga wakukwaskana ndi Edomu, kuti:
“Kumbi zeru zikumala mu Temani?+
Kumbi ulongozgi wamampha wamala ku ŵanthu akuvwisa vinthu?
Kumbi zeru zawu zavunda?
8 Thaŵani, weleriyani!
Lutani kumalu ngakusika ndipu mukajengi kweniko, yimwi ŵanthu a ku Dedani!+
Pakuti ndiwisiyengi soka paku EsawuAsani nyengu yakuti ndimulangi yakwana.
9 Asani ŵanthu akutondo mphereska aza kwaku yiwi,Kumbi angalekaku cha mphereska zinyaki kuti anyaki atondo?
Asani ankhungu aza ndi usiku,Anangengi ŵaka vinthu vo akhumba pe.+
10 Kweni ndizuwengi Esawu kuti waje nkhuli.
Ndipu ndibenuwengi malu ngaki ngakubisamamu,Kuti waleki kubisama.
Ŵana ŵaki, abali ŵaki kweniso ŵanthu wo akuzengezana nayu, wosi azamubayika,+Ndipu iyu kwazamuŵavi.+
11 Ndisiliyeni ŵana ŵinu alanda,Ndipu ndiŵasungengi amoyu,Vyoko vinu vithembengi ini.”
12 Pakuti Yehova wakamba kuti: “Awonani! Asani ŵanthu wo akuyeruzgika kuti angamwanga cha kapu ndiwu atenere kumwa kapu, kumbi yiwi utenere kulekeka ŵaka kwambula kulangika? Ulekekengi ŵaka cha kwambula kulangika, pakuti utenere kumwa kapu yo.”+
13 “Pakuti ndalapizga mu zina langu,” Yehova ndiyu wakamba, “kuti Bozira wasambukengi chinthu chakuchitiska mantha,+ chinthu chakunyozeka, chinthu chakunangika ndipuso chinthu chakutembeka; ndipu matawuni ngaki ngosi ngazamusambuka mahami ngamuyaya.”+
14 Ndavwa uthenga wakutuliya kwaku Yehova,Nthumi yatumika pakati pa mitundu ya ŵanthu kuti yikambi kuti:
“Wunganani pamoza ndipu muyukiyeni;Nozgekiyani nkhondu.”+
15 “Pakuti awona! ndakuchitiska kuti uje wambula kuzirwa pakati pa mitundu ya ŵanthu,Wakuyuyulika pakati pa ŵanthu.+
16 Wapusisika chifukwa chakuti wachitiskanga mantha anyaku,Wapusisika chifukwa cha mtima waku wakujikuzga.Yiwi wakuja kusi kwa jalawi,Wakuja pachanya pa mtunthu utali ukongwa.
Chinanga kuti wazenga chizimbu chaku pachanya nge nombu,Ndazakukuwisiya pasi kutuliya penipo,” Yehova ndiyu wakamba.
17 “Ndipu Edomu wasambukengi chinthu chakuchitiska mantha.+ Weyosi yo wazamujumpha pafupi ndi iyu wazakumulereseska mwamantha ndi kumumbiya khwelu chifukwa cha milili yaki yosi.
18 Nge mo Sodomu ndi Gomora kweniso matawuni ngawu ngapafupi ngangubwangandulikiya,”+ Yehova ndiyu wakamba, “palivi munthu yo wazamuja mwenimo, ndipuso palivi munthu yo wazamujalikiskika mwenimo.+
19 “Awonani! Munthu munyaki wazamukuza nge nkharamu+ kutuliya muvivwati vakukho vamumphepeti mwa msinji wa Yorodani, kuti wayukiyi malu ngakuliskaku viŵetu ngakuvikilirika, kweni mu kanyengu kamanavi, ndazamuchitiska kuti yiwu* athaŵi mucharu chawu. Ndipu ndazamuŵika wakusankhika kuti walamuliyengi charu cho. Pakuti ndiyani yo wayanana ndi ini ndipuso ndiyani yo wangasuskana nani? Ndi mliska nuyu yo wangalimbana nani?+
20 Mwaviyo, yimwi mwaŵanthu vwani vo Yehova waŵanaŵana kuchitiya Edomu ndipuso vo waŵanaŵana kuchitiya ŵanthu wo aja mu Temani:+
Kwambula kutondeka, ŵana a mbereri azamuguguzikiya kutali.
Iyu wazamusambusa malu ngawu ngakujamu kuja mahami chifukwa chaku yiwu.+
21 Charu chasukunyika chifukwa cha chiwawa cha kuwa kwawu.
Kuvwika kuliya!
Chiwawa chavwika mpaka ku Nyanja Yiyera.+
22 Awonani! Nge nombu, iyu wazamukwera muchanya ndi kusikiya pasi,+Ndipu wazamutambasuliya mapapa ngaki paku Bozira.+
Mu zuŵa lo, mtima wa asilikali a ku EdomuWazamuja nge mtima wa munthukazi yo watuvwa urwirwi pakubala.”
23 Uthenga wakukwaskana ndi Damasiko+ ngwakuti:
“Hemati+ ndi Aripadi alengeseka,Pakuti avwa uthenga uheni.
Yiwu asongonoka chifukwa cha mantha.
Nyanja yayuka ndipu palivi yo wangachitiska kuti yigoni.
24 Damasiko wamala nthazi.
Iyu wang’anamuka kuti wathaŵi, kweni watimbanyizgika.
Suzgu ndi urwirwi vamuwiya,Nge munthukazi yo watuvwa urwirwi pakubala.
25 Vaŵa wuli kuti tawuni yakuthamikika yechendajowoleki,Tawuni yakuzaya?
26 Pakuti anyamata ŵaki azamukuwa mumabalaza ngaki,Ndipu asilikali ŵaki wosi azamumala mu zuŵa lenilo,” Yehova wa mizinda ndiyu wakamba.
27 “Mpanda wa Damasiko ndiwubuskengi ndi motu,Ndipu motu wo, uwotchengi tinyumba takuthopoka takukho taku Beni-hadadi.”+
28 Vakukwaskana ndi Kedara+ ndipuso maufumu nga ku Hazori ngo Nebukadinezara* fumu ya ku Babiloni yingubwanganduwa, Yehova wakamba kuti:
“Yukani, kweriyani ku Kedara,Ndipu nangani ŵana a Kuvuma.*
29 Mahema ngawu ndipuso miskambu yawu yazamutoleka,Salu zawu za mahema ndipuso katundu wawu yosi.
Ngamila zawu zazamutoleka,Ndipu ŵanthu azamudaniriza kwaku yiwu kuti, ‘Mantha nge peposi!’”
30 “Thaŵani, lutani kutali!
Lutani kumalu ngakusika ndipu mukajengi kweniko, yimwi ŵanthu a ku Hazori,” Yehova ndiyu wakamba.
“Pakuti Nebukadinezara* fumu ya ku Babiloni wanozga nthowa yakukuyukiyani,Ndipu wanozga chiŵembu kuti wakuyukiyeni.”
31 “Sokani, lutani kuti mukayukiyi mtundu wo uja mwachimangu,Mtundu wo uja mwakuvikilirika!” Yehova ndiyu wakamba.
“Ulivi visasa pamwenga akabali; yiwu aja kwakuŵija.
32 Ngamila zawu zazamuphangika,Viŵetu vawu vinandi vazamulondeka.
Ndazakuŵambininiskiya ku mphepu zosi,*Ŵanthu wo acheketereza mwembi wawu wa mumbulukutu,+Ndipu ndazamuchitiska kuti soka liŵawiyi kutuliya kuvigaŵa vosi,” Yehova ndiyu wakamba.
33 “Hazori wazamusambuka mphanji ya akambwi,Mahami ngamuyaya.
Palivi yo wazamujamu,Ndipuso palivi munthu yo wazamujalikiskika mwaku iyu.”
34 Kukwamba kwa ulamuliru waku Zedekiya,+ fumu ya ku Yuda, Yehova wangukambiya mchimi Yeremiya vakukwaskana ndi Elamu+ kuti:
35 “Yehova wa mizinda wakamba kuti, ‘Ndifyo uta wa ku Elamu,+ po patuwa* nthazi zawu.
36 Ku Elamu ndazamuputisiyaku mphepu zinayi kutuliya kuvigoti vinayi va kuchanya, ndipu ndazakuŵambininiskiya ku mphepu zosi zenizi. Palivi mtundu wo ndilekengi kumbininiskiyaku ŵanthu akuja mu Elamu.’”
37 “Ndazamuvikita Aelamu pa masu pa arwani ŵawu ndipuso pa masu pa ŵanthu wo akhumba kuŵabaya; ndipu ndazakuŵawisiya soka, ukali wangu wakukole,” Yehova ndiyu wakamba. “Ndazakuŵatumiya lipanga mpaka po ndaŵamaliya limu.”
38 “Ndazamuŵika mpandu wangu waufumu mu Elamu,+ ndipu ndazamubaya fumu ndi alongozgi akuzirwa a kweniko,” Yehova ndiyu wakamba.
39 “Kweni mu mazuŵa ngakumaliya ndazamuwunganisa ŵanthu a ku Elamu wo angutoleke ku ukapolu,” Yehova ndiyu wakamba.
Mazu Ngam'mphata
^ Yapa pangafwatulikiya so kuti, “chiwawa cha kuliya chifukwa cha nkhondu.”
^ Pamwenga kuti, “matawuni ngaki ngapafupi.”
^ Pamwenga kuti, “makhola nga mbereri.”
^ Viwoneka kuti wo akambika yapa mbanthu a ku Edomu.
^ Zina ili lilembeka so kuti, “Nebukadirezara.”
^ Pamwenga kuti, “ko kutuliya lumwi.”
^ Zina ili lilembeka so kuti, “Nebukadirezara.”
^ Pamwenga kuti, “kuvigaŵa vosi.”
^ Mazu ngaki chayingu, “po patambiya.”
