Yesaya 19:1-25
19 Uwu mbuthenga wacheruzgu wakukwaskana ndi Ijipiti:+
Awonani! Yehova wakwera pa mtambu wo utchimbiya ukongwa ndipu watuza mu Ijipiti.
Achiuta ambula fundu a ku Ijipiti ambwambwanthiyengi pa masu paki,+Ndipu mtima wa charu cha Ijipiti usongonokengi mukati mwaki.
2 “Ndazamuchitiska kuti Ayijipiti ayukiyani,Ndipu azamupumana ŵijaŵija,Weyosi wazamuyukiya mubali waki kweniso munthu yo waja nayu pafupi,Tawuni yazamuyukiya tawuni yinyaki, ufumu wazamuyukiya ufumu unyaki.
3 Mzimu wa ŵanthu a ku Ijipiti wazamutimbanyizgika mukati mwawu,Ndipu ndazamutimbanyizga vo akhumba kuchita.+
Yiwu azamuluta kwa achiuta ambula fundu,Ku ŵanthu amasenga, akulongoro ndi mizimu kweniso ku ŵanthu wo aloska vo vichitikengi kunthazi.+
4 Ijipiti ndazakumupereka mu manja mwa mbuya wakusuzga,Ndipu fumu yankhaza yazakuŵalamuliya,”+ atiti Ambuya auneneska, Yehova wa mizinda.
5 Maji nga munyanja ngazamukamuka,Kweniso msinji wazamukuphwa ndi kumiriya limu.+
6 Ndipu misinji yazamununkha;Migelu ya ku Ijipiti ya msinji wa Nayelu yazamukuphwa ndi kumira.
Mateti kweniso uteka* vazamuvunda.+
7 Vakume va mumphepeti mwa Msinji wa Nayelu,Kweniso malu ngosi ngo pakupandika mbewu mumphepeti mwa Msinji wa Nayelu+ vazamumira.+
Vazamuputa ndi mphepu ndipu vazamuŵaku so cha.
8 Ndipu alovi azamuliya,Wo aponya mbeja mu Msinji wa Nayelu azamutenje,Ndipu wo aponya vilepa vawu mumaji azamuja amana.
9 Wo apanga salu mwakugwiriskiya ntchitu Fulakisi,*+Ndipuso wo apanga salu zituŵa pa chakupangiya salu azamulengeseka.
10 Ŵanthu ŵaki wo apanga salu azamupwetekeka;*Aganyu wosi azamuchita chitima.
11 Alongozgi a ku Zowani+ mbazereza.
Akulunguchizga azeru ukongwa aku Farawo apereka ulongozgi wambula zeru.+
Mungamukambiya wuli Farawo kuti:
“Ndini mphapu ya ŵanthu azeru,Mphapu ya mafumu ngakali”?
12 Sonu ŵe pani ŵanthu ŵaku azeru?+
Akukambiyi asani aziŵa vo Yehova wa mizinda wasankha kuchitiya Ijipiti.
13 Alongozgi a ku Zowani achita vinthu mwambula zeru;Alongozgi a ku Nofi*+ anyengeka;Alongozgi ŵaki a mafuku alandizga Ijipiti.
14 Yehova wamupunguliya mzimu wa chimtimbaheka;+Ndipu alandizga Ijipiti pa chechosi cho wachita,Nge wakuloŵe yo wambendyambendya mumawukuzi ngaki.
15 Ijipiti wazamuŵavi ntchitu yeyosi yakuti wachiti,Mutu pamwenga muchiya, chakume cho chabuka sonu pamwenga uteka,* azakuvichitiya ntchitu yeyosi cha.
16 Mu zuŵa lenilo, Ijipiti wazamuja nge anthukazi, wazamunjekeme ndi kuchita mantha chifukwa cha janja lakofya lo Yehova wa mizinda wamusoske.+
17 Charu cha Yuda chazamuwofya charu cha Ijipiti. Yiwu azamuchita mantha asani atichizumbuwa, chifukwa cha vo Yehova wa mizinda wasankha kuŵachitiya.+
18 Mu zuŵa lenilo, mucharu cha Ijipiti mwazamukuŵa matawuni ngankhondi ngakulongoro chineneru cha ku Kanani,+ ndipu ngazamulapizga kuti ngajengi ngakugomezgeka kwaku Yehova wa mizinda. Tawuni yimoza yazamudanika kuti, Tawuni Yakubwanganduliya Pasi.
19 Mu zuŵa lenilo, pakati pacharu cha Ijipiti pazamukuŵa guŵa la sembi laku Yehova kweniso chipilala chaku Yehova pa mphaka yaki.
20 Venivi vazamuja chisimikizu kweniso ukaboni kwaku Yehova wa mizinda mucharu cha Ijipiti; pakuti yiwu azamuliriya Yehova chifukwa cha akukandirizga, ndipu wazakuŵatumiya mtaski mukulu, yo wazakuŵataska.
21 Ndipu Yehova wazamuziŵika kwa Ayijipiti, ndipu Ayijipiti azamuziŵa Yehova mu zuŵa lo. Yiwu azamupereka sembi kweniso mphasu ndipu azamulapizga kwaku Yehova ndi kufiska vo alapizga.
22 Yehova wazamulanga Ijipiti,+ kumulanga ndi kumuchizga; ndipu azawere kwaku Yehova, iyu wazamumuka kuŵeyere kwawu ndipuso wazakuŵachizga.
23 Mu zuŵa lenilo, pazamuja msewu ukulu+ wakutuliya ku Ijipiti mpaka ku Asiriya. Ŵanthu a ku Asiriya azamuzanga ku Ijipiti ndipu ŵanthu a ku Ijipiti azamulutanga ku Asiriya. Ayijipiti azamuteŵete Chiuta limoza ndi ŵanthu a ku Asiriya.
24 Mu zuŵa lenilo, Isirayeli wazamuja wachitatu limoza ndi Ijipiti kweniso charu cha Asiriya,+ wazamuja thumbiku pakati pa charu chapasi,
25 pakuti Yehova wa mizinda wazakumutumbika ndipu wazamukamba kuti: “Atumbikiki Ayijipiti wo mbanthu ŵangu, ŵanthu a ku Asiriya wo ndi ntchitu ya manja ngangu ndipuso Ayisirayeli wo ntchihara changu.”+
Mazu Ngam'mphata
^ Uwu ndi mtundu wa vimauteka vo vime mumphepeti mwa msinji pamwenga mumathaŵali.
^ Chakume cho chapandikanga mu nyengu zakali, ndipu achigwiriskiyanga ntchitu pakupanga uzu wakupangiya salu.
^ Pamwenga kuti, “azamusuzgika maŵanaŵanu.”
^ Pamwenga kuti, “Mefisi.”
^ Yapa pangafwatulikiya so kuti, “mani nga chimiti cha kantchindi pamwenga deti.”