Yesaya 20:1-6
-
Chisimikizu chakulongo vo vichitikiyengi Ijipiti ndipuso Itiyopiya (1-6)
20 Mu chaka cho Fumu Sarigoni ya ku Asiriya yingutuma Tatani* ku Ashidodi,+ Tatani wanguchita nkhondu ndi tawuni ya Ashidodi ndipu wanguyilonda.+
2 Pa nyengu yeniyi, Yehova wangulongoro kuziya mwaku Yesaya+ mwana waku Amozi, ndipu wangukamba kuti: “Luta, zuwa chigudulu muchiwunu chaku, ndipuso zuwa sapatu kumaphazi ngaku.” Ndipu ndivu wanguchita nadi, wangwenda nkhuli* kweniso kwambula kuvwala sapatu.
3 Pavuli paki, Yehova wangukamba kuti: “Nge mo mteŵeti wangu Yesaya wayende nkhuli ndipuso nyawu* kwa vyaka vitatu, kuti chije chisimikizu+ kweniso chakuziziswa chakulongo vo vichitikiyengi Ijipiti+ ndipuso Ifiyopiya,+
4 ndimu so fumu ya ku Asiriya yazamukole ŵanthu a ku Ijipiti+ kweniso a ku Ifiyopiya ndi kuluta nawu ku ukapolu. Iyu yazamuko anyamata ndi akukota ndipu yazamuluta nawu ŵe nkhuli kweniso ŵe nyawu,* mataku nge pakweru, vo vilengesengi Ijipiti.*
5 Ndipu azamuchita mantha kweniso azamulengeseka chifukwa chaku Ifiyopiya yo ntchilindizga chawu ndipuso Ijipiti yo amalika nayu.*
6 Pa zuŵa lo, ŵanthu wo aja mumphepeti mwa nyanja azamukamba kuti, ‘Wonani vo vachitikiya chilindizga chidu, ko tinguthaŵiya kuti atiwovyi ndi kutitaska kwa fumu ya ku Asiriya! Kumbi tiponengi wuli sonu?’”
Mazu Ngam'mphata
^ Pamwenga kuti, “mura wa asilikali.”
^ Pamwenga kuti, “wangwenda wavwala vakuvwala vamukati pe.”
^ Pamwenga kuti, “kwambula kuvwala sapatu.”
^ Pamwenga kuti, “kweniso ambula kuvwala sapatu.”
^ Mazu ngaki chayingu, “vo vichitiskengi kuti Ayijipiti aje nkhuli.”
^ Pamwenga kuti, “yo akhumbira kutowa kwaki.”
