Yesaya 39:1-8
-
Mathenga ngakutuliya ku Babiloni (1-8)
39 Pa nyengu yeniyi, Merodaki-baladani fumu yaku Babiloni, mwana waku Baladani, wangutumiza makalata kweniso mphasu kwaku Hezekiya,+ chifukwa wanguvwa kuti watamanga kweniso kuti wachira.+
2 Hezekiya wanguŵalondere umampha* ndipu wanguŵalongo nyumba yaki yakusungamu chuma,+ kung’anamuwa siliva, golidi, mafuta nga basamu, mafuta nganyaki ngakudula ndipuso vidya vaki vosi vankhondu. Iyu wanguŵalongo so chechosi cho chenga muvipinda vaki vakusungamu chuma. Pengavi chinthu cho Hezekiya wanguleka kuŵalongo munyumba yaki* ndipuso muchigaŵa chosi cho iyu walamuliyanga.
3 Pavuli paki, mchimi Yesaya wanguza kwa Fumu Hezekiya ndipu wanguyifumba kuti: “Kumbi ŵanthu yaŵa akukambiyanji ndipu atuliya pani?” Sonu Hezekiya wangumuka kuti: “Yiwu atuliya kucharu chakutali ukongwa ku Babiloni.”+
4 Yesaya wangufumba so kuti: “Awonanji munyumba yaku?”* Hezekiya wangumuka kuti: “Yiwu awona chechosi munyumba yangu.* Palivi chinthu cho ndaleka kuŵalongo muvipinda vangu vakusungamu chuma.”
5 Sonu Yesaya wangukambiya Hezekiya kuti: “Yivwa mazu ngaku Yehova wa mizinda,
6 ‘Awona! Mazuŵa ngatuza, ndipu vinthu vosi vo ve munyumba yaku* kweniso vosi vo apapi ŵaku akali akusunga mpaka msanawale, vazamutoleke ku Babiloni. Palivi cho chazamusiyika,’+ Yehova ndiyu wakamba.+
7 ‘Anyaki mwa ŵana ŵaku chayiwu wo yiwi ubalengi azamutoleka, ndipu amuja nduna mubalaza la nyumba yachifumu ya fumu ya ku Babiloni.’”+
8 Hezekiya wati wavwa ivi wangukambiya Yesaya kuti: “Mazu ngaku Yehova ngo yimwi mwakamba, nge umampha.” Iyu wangukamba so kuti: “Chifukwa chakuti mu mazuŵa nga umoyu wangu* mucharu mujengi chimangu kweniso ŵanthu ajengi mwakufwasa.”*+
Mazu Ngam'mphata
^ Mazu ngaki chayingu, “Hezekiya wangukondwa nawu.”
^ Pamwenga kuti, “nyumba yaki yachifumu.”
^ Pamwenga kuti, “munyumba yaku yachifumu.”
^ Pamwenga kuti, “munyumba yangu yachifumu.”
^ Pamwenga kuti, “munyumba yaku yachifumu.”
^ Mazu ngaki chayingu, “mu mazuŵa ngangu.”
^ Pamwenga kuti, “kweniso mucharu mujengi uneneska.”
