Yesaya 47:1-15
47 Sika ndipu ja mufuvu,Yiwi mwali wa ku Babiloni.+
Ja pasi po palivi mpandu waufumu,+Yiwi mwana munthukazi wa Akadiya,Pakuti ŵanthu azakukudana so cha kuti mwana wakulombotoka ndipuso yo akumuleremeka.
2 To chakuperiyapu ndipu pera ufwa.
Benuwa salu yaku kumutu.
Kwiza chakuvwala chaku, benuwa malundi ngaku.
Yambuka misinji.
3 Azakukujalika nkhuli.
Vinthu vaku vakuchitiska soni vazamuwoneka.
Ndazamuweze nduzga+ ndipu palivi yo wazamukuma munthowa yangu.*
4 “Yo watitiwombo,Yo zina laki ndi Yehova wa mizinda,Ndi Mtuŵa waku Isirayeli.”+
5 Ja cheti ndipu luta mu mdima,Yiwi mwana munthukazi wa Akadiya;+Ŵanthu azakukudana so cha kuti Fumukazi ya Maufumu.+
6 Ndingukwiyiya ŵanthu ŵangu.+
Ndingufipiska chihara changu,+Ndipu ndinguŵapereka mu janja laku.+
Kweni unguŵachitiya lisungu cha.+
Chinanga mbakukota unguŵapingiza goli lizitu.+
7 Yiwi ungukamba kuti: “Nyengu zosi ndijengi Fumukazi, mpaka muyaya.”+
Ungusunga cha vinthu venivi mumtima mwaku;Unguŵanaŵana cha mo nkhani yeniyi yazamumaliya.
8 Sonu yivwa ivi, yiwi wakwanja vakukondwesa,+Yo waja mwakuvikilirika, yo wakamba mumtima mwaki kuti;
“Ndini, ndipu palivi munyaki.+
Ndazamujapu choko cha.
Ŵana ŵangu azamufwapu cha.”+
9 Kweni vinthu viŵi venivi, vazakukubuchizga, mu zuŵa limoza:+
Kufwa kwa ŵana kweniso kuja choko.
Vinthu venivi vazakukuziya mwakukwana+Chifukwa cha masenga ngaku nganandi kweniso chifukwa cha nyanga zaku zosi zanthazi.*+
10 Unguthemba uheni waku.
Ungukamba kuti: “Palivi yo watindiwona.”
Zeru zaku kweniso kuziŵa vinthu ndivu vingukulandizga,Ndipu mumtima mwaku ukamba kuti: “Ndini, ndipu palivi munyaki.”
11 Kweni soka lazakukuwiya,Ndipu masenga ngaku ngazakulilekesa cha.
Masuzgu ngazakukuwiya; wazakungatondekesa cha.
Pharanyiku lazakukuwiya mwamabuchibuchi nge kuti waziŵanga cha.+
12 Lutirizga ndi nyanga zaku kweniso masenga ngaku nganandi,+Vo wavisuzgikiya kutuliya pa unamana waku.
Panyaki vingakuwovya;Panyaki ungaziziswa ŵanthu.
13 Wavuka ndi akulunguchizga ŵaku anandi.
Yiwu ami sonu ndipu akutaski,Wo asopa machanya,* wo alereseska nyenyezi,+Wo asani mwezi waŵalika,Akamba vinthu vo vikuchitikiyengi.
14 Awona! Yiwu ŵenge mapesi.
Motu wazakuŵawotcha.
Yiwu angajitaska cha ku nthazi ya mulipu wa motu.
Yanga ndi maka ngakuwotha cha.Ndipu uwu ndi motu wakuja pafupi nawu cha.
15 Umu ndimu amasenga ŵaku azamuŵiya kwaku yiwi,Wo wasuzgikiya nawu limoza kutuliya pa unamana waku.
Azamuwulawula, weyosi wazamuselere kwaki.*
Pazamuŵavi wakuti wakutaski.+
Mazu Ngam'mphata
^ Yapa pangafwatulikiya so kuti, “ndipu weyosi yo ndazamukumana nayu ndazakumuchitiya lisungu cha.”
^ Yapa pangafwatulikiya so kuti, “Chinanga kuti we ndi masenga nganandi kweniso nyanga zanthazi.”
^ Yapa pangafwatulikiya so kuti, “Wo agaŵa machanya; Akusanda nyenyezi.”
^ Mazu ngaki chayingu, “wazamuselere kuchigaŵa chaki.”
