Yesaya 55:1-13
55 Zani, yimwi mosi anyota,+ zani kuti muzimwi maji!+
Yimwi mulivi ndalama, zani kuti muziguli ndi kurya!
Zani, muziguli vinyu ndi mkaka+ kwambula ndalama kweniso kwambula mtengu.+
2 Ntchifukwa wuli mulipira ndalama pa vinthu vakuti ntchakurya cha,Ndipuso ntchifukwa wuli mumaliya ndalama zinu* pa vinthu vo vigutisa cha?
Vwisiyani mwakuphwere kwaku ini, ryani vinthu vamampha,+Ndipu mukondwengi ukongwa ndi chakurya chamampha.*+
3 Khazaniku gutu linu ndipu zani kwaku ini.+
Vwisiyani, ndipu mujengi ndi umoyu,Ndichitengi namwi phanganu lamuyaya+Mwakukoliyana ndi chanju chambula kumala cho ndalongo Davidi, cho ntchakugomezgeka.*+
4 Awonani! Ndikumupanga kuja kaboni+ ku mitundu ya ŵanthu,Mulongozgi+ kweniso wakulamuliya+ ku mitundu ya ŵanthu.
5 Awona! Yiwi wazamudana mtundu wo utiwuziŵa cha,Ndipu ŵanthu a mtundu wo uleka kukuziŵa, azamutchimbiriya kwaku yiwiChifukwa chaku Yehova Chiuta waku,+ Mtuŵa waku Isirayeli,Pakuti iyu wazakukukankhuska.+
6 Penjani Yehova pa nyengu yo weche kusanirika.+
Mudaneni pa nyengu yo we pafupi.+
7 Munthu muheni waleki nthowa yaki+Ndipuso munthu muheni waleki kuŵanaŵana vinthu viheni;Iyu wawere kwaku Yehova, yo wamuchitiyengi lisungu,+Wawere kwaku Chiuta widu, pakuti wagowokengi ukongwa.*+
8 “Pakuti maŵanaŵanu ngangu ndi maŵanaŵanu nginu cha,+Ndipu nthowa zinu ndi nthowa zangu cha,” Yehova ndiyu wakamba.
9 “Pakuti nge mo kuchanya kuliri pachanya kuluska charu chapasi,Ndimu so nthowa zangu ziliri zapachanya kuluska nthowa zinu
Kweniso maŵanaŵanu ngangu kuluska maŵanaŵanu nginu.+
10 Pakuti nge mo vuwa kweniso sinoo* viwiya kutuliya kuchanyaNdipu viweriyaku cha mpaka po vazumbwisiya charu chapasi, ndi kuchichitiska kuti chimezgi vakume ndi kupasa vipasu,Kupereka mbewu ku wakumija kweniso chakurya ku wakurya,
11 Ndimu so ngazamuŵiya mazu ngangu ngakutuliya mumulomu mwangu.+
Ngazamuwere cha kwaku ini kwambula kuchita kanthu,+Kweni ngazamufiska nadi vosi vo ndikhumba,+Ndipu ngazamuchita nadi vo ndikungatuma kuti ngachiti.
12 Pakuti mwazamuluta ndi likondwa,+Ndipu mwazamuweku mu chimangu.+
Mapiri ndi mitunthu vazamusekere pa masu pinu ndi kudaniriza mwalikondwa,+Ndipu vimiti vamudondu vazamukumba manja.+
13 Mo mwenga vivwati vaminga, mwazamume vimiti va junipa,+Ndipuso mo mwenga vakume vakunyenye, mwazamume chimiti cha mirito.
Ndipu chazamukuza ndi mbiri kwaku* Yehova,+Chisimikizu chamuyaya cho chazamumala cha.”
Mazu Ngam'mphata
^ Pamwenga kuti, “ndalama zo mwazisuzgikiya.”
^ Mazu ngaki chayingu, “chakurya chamafuta.”
^ Pamwenga kuti, “cho ntchakuthembeka.”
^ Pamwenga kuti, “wagowokengi ndi mtima wosi.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Pamwenga kuti, “Ndipu chazakumupangiya zina.”
