Yobu 2:1-13
2 Pavuli paki, zuŵa lingukwana lakuti ŵana aku Chiuta wauneneska*+ asere ndi kuma pa masu paku Yehova,+ ndipu Satana nayu wangusere kuti wazimi pa masu paku Yehova.+
2 Sonu Yehova wangufumba Satana kuti: “Kumbi watuliya pani?” Satana wangumuka Yehova kuti: “Ndachiyingangayinganga kweniso kwendakwenda mucharu.”+
3 Yehova wangukambiya Satana kuti: “Kumbi wamuwona* mteŵeti wangu Yobu? Pacharu chapasi, palivi munthu munyaki wakuyanana ndi iyu. Iyu ndi munthu wakunyoloka ndipuso wakugomezgeka,*+ watopa Chiuta kweniso wakhwecha vinthu viheni. Iyu weche wakugomezgeka+ chinanga kuti yiwi utindichichizga kuti ndimunangi*+ kwambula chifukwa.”
4 Kweni Satana wangumuka Yehova kuti: “Khungu kusinthisa ndi khungu. Munthu wangapereka chechosi cho we nachu kuti wataski umoyu waki.
5 Kweni tambasuwani janja linu ndi kunanga viwanga vaki ndi mnofu waki, nadi panu, namwi mumuwonengi wachikutukani.”+
6 Sonu Yehova wangukambiya Satana kuti: “Awona! Iyu we mu manja mwaku! Kweni umoyu waki pe uwuleki!”
7 Mwaviyo, Satana wangutuwapu pa masu paku* Yehova, ndipu wangunanga Yobu ndi vilonda* vakuŵaŵa,+ kutuwa kuphazi mpaka paliwombu.
8 Yobu wanguto dinga kuti wakwanthiyengi kweniso wajanga pavyotu.+
9 Pakumaliya, muwolu waki wangumukambiya kuti: “Kumbi mulutirizga mbwenu kuja akugomezgeka? Tukani Chiuta kuti mufwi!”
10 Kweni Yobu wangumuka muwolu waki kuti: “Ulongoro nge anthukazi ambula zeru. Kumbi titenere kulonde vinthu vamampha pe kutuliya kwaku Chiuta wauneneska? Asi titenere so kulonde vinthu viheni?”+ Pa vosi venivi, Yobu wangubuda cha ndi mulomu waki.+
11 Mabwezi ngatatu ngaku Yobu nganguvwa masoka ngosi ngo ngangumuwiya. Sonu weyosi wanguza kutuliya kumalu ngaki, ndipu penga Elifazi+ wa ku Temani, Bilidadi+ wa mu banja laku Shuwa+ kweniso Zofari+ Mnamati. Yiwu angukoliyana kuti akumani kuti aluti kuchipepesa Yobu ndipuso kuchimupembuzga.
12 Sonu ŵati amuwone patali, angumuziŵa cha. Yiwu angwamba kuliya mwakudaniriza, kukeruwa vakuvwala vawu ndipuso kuwaza fuvu muchanya ndi pamitu yawu.+
13 Pavuli paki, yiwu anguja pasi limoza ndi iyu kwa mazuŵa 7, msana ndi usiku. Palivi yo wangulongoro nayu chinanga ndi mazu ngamoza, pakuti anguwona kuti urwirwi waki wenga ukulu ukongwa.+
Mazu Ngam'mphata
^ Pamwenga kuti, “angelu.”
^ Mazu ngaki chayingu, “Kumbi waŵika mtima waku pa.”
^ Pamwenga kuti, “munthu wambula kafukwa ndipuso wakunyoloka.”
^ Mazu ngaki chayingu, “ndimumezi.”
^ Mazu ngaki chayingu, “pa chisku chaku.”
^ Pamwenga kuti, “vimapumba.”
