Yona 1:1-17
1 Yehova wangulongoro ndi Yona*+ mwana waku Amitayi, ndipu wangumukambiya kuti:
2 “Soka, luta ku Nineve+ tawuni yikulu, ndipu ukapharazgi uthenga wacheruzgu, pakuti ndawona vinthu viheni vo ŵanthu achita kweniko.”
3 Kweni Yona wangusoka kuti waluti ku Tashishi, kuthaŵa Yehova; iyu wangufika ku Yopa ndipu wangusaniya sitima yakuluta ku Tashishi. Mwaviyo wangulipira ndipu wangukwera sitima kuti waluti ku Tashishi limoza ndi ŵanthu wo ŵenga mwenimo, kuthaŵa Yehova.
4 Pavuli paki, Yehova wangutuma chimphepu panyanja ndipu panyanja penga chimphunga chikulu mwakuti sitima yenga pafupi kusweka.
5 Wo agwiranga ntchitu musitima anguchita mantha ukongwa mwakuti weyosi waku yiwu wangwamba kudaniya paku chiuta waki kuti wamuwovyi. Ndipu angwamba kuponya katundu wa musitima yo munyanja, kuti yipepuki.+ Kweni pa nyengu iyi ndipu Yona wasikiya muchipinda chamukati cha sitima yo, ndipu wangugona tulu takufwa natu.
6 Mura wa akwendesa sitima wanguluta ko kwenga Yona ndipu wangumukambiya kuti: “Ntchifukwa wuli ugona? Yuka, daniya paku chiuta waku! Panyaki Chiuta wauneneska wangatichitiya lisungu, kuti tileki kufwa.”+
7 Pavuli paki, yiwu angukambiskana kuti: “Zani, tiyeni tichiti mayeri+ kuti tiziŵi yo watidaniya soka ili.” Mwaviyo, anguchita mayeri ndipu mayeri ngo nganguwiya paku Yona.+
8 Yiwu angumukambiya kuti: “Chondi tikambiyi, ndiyani yo watidaniya soka ili lo latiwiya? Ugwira ntchitu wuli, nanga watuliya pani? We wa charu nichi, kweniso ndiwi wa mtundu nuwu?”
9 Iyu wangumuka kuti: “Nde Mheberi, ndipu nditopa* Yehova Chiuta wakuchanya, Yo wakupanga nyanja ndi mtunda.”
10 Ati avwa venivi, ŵanthu wo anguchita mantha ukongwa, ndipu angumufumba kuti: “Wachitanji?” (Ŵanthu wo anguziŵa kuti wathaŵa Yehova, chifukwa chakuti wanguŵakambiya.)
11 Mwaviyo, angumufumba kuti: “Tichitenji nawi kuti nyanja yigowoki?” Pakuti chimphepu chakuliyangakuliyanga panyanja.
12 Yona wangumuka kuti: “Ndinyamuweni ndi kundiponya munyanja ndipu nyanja yigowokengi; pakuti ndiziŵa kuti chimphepu ichi chakuwiyani chifukwa chaku ini.”
13 Ŵanthu wo angulimbikiya kuvuŵa kuti sitima yiluti kumtunda, kweni angutondeka, chifukwa chakuti chimphepu chakuliyangakuliyanga panyanja.
14 Pavuli paki, yiwu angupemphera kwaku Yehova ndipu angukamba kuti: “A Yehova, chondi, tingafwanga cha chifukwa cha munthu uyu! Mungatimbanga mulandu cha chifukwa cha ndopa zambula kunanga, pakuti mwachita vo vakukondwesani, yimwi Yehova.”
15 Mwaviyo, angunyamuwa Yona ndi kumuponya munyanja; ndipu nyanja yingugowoka.
16 Pavuli paki, ŵanthu wo anguchita mantha ukongwa ndi Yehova,+ ndipu angupereka sembi kwaku Yehova ndi kumulayizga.
17 Sonu Yehova wangutuma chisomba chikulu kuti chimezi Yona, ndipu Yona wanguja mumoyu mwa chisomba cho kwa mazuŵa ngatatu, msana ndi usiku.+
