Yona 4:1-11
4 Kweni venivi vingumukondwesa cha Yona, ndipu wangukwiya ukongwa.
2 Sonu Yona wangupemphera kwaku Yehova ndipu wangukamba kuti: “A Yehova, asi venivi ndivu ndawopanga po ndenga kucharu changu? Ndichu chifukwa chaki pakwamba ndakhumbanga kuthaŵiya ku Tashishi,+ pakuti ndinguziŵa kuti ndimwi Chiuta wawezi kweniso walisungu, wambula kukwiya liŵi ndipuso wakuzaza ndi chanju chambula kumala,+ yo wachita chitima chifukwa cha soka lo wakhumba kuwisa.
3 Sonu yimwi Yehova, chondi tuzganimu umoyu wangu, pakuti mbumampha kuti ndifwi kuluska kuŵa ndi umoyu.”+
4 Yehova wangufumba kuti: “Kumbi wachita umampha kukwiya?”
5 Pavuli paki, Yona wangutuwamu mutawuni yo ndipu wanguchija pasi kuvuma kwa tawuni yo. Iyu wanguzenga kachigongwi kweniko ndipu wanguja mu mduzi waki kuti wawoni vo vichitikiyengi tawuni yo.+
6 Pavuli paki, Yehova Chiuta wangumezga chakume chakutaŵa* kuti chitaŵiyi po penga Yona, kuti chimupaski mduzi kweniso kuti chimuzikiski mtima. Ndipu Yona wangukondwa ukongwa ndi chakume cho.
7 Kweni mawa laki kumatandakucha, Chiuta wauneneska wangutumiza chibungu. Chibungu cho chingurya chakume cho ndipu chingufota.
8 Lumwi lati lakwera, Chiuta wangutumiza so chimphepu chakotcha kutuliya kuvuma,* ndipu lumwi lingumuwotcha Yona, ndipu wanguzinduka. Iyu wapemphanga kuti wafwi ndipu wakambanga kuti, “Mbumampha kuti ndifwi kuluska kuŵa ndi umoyu.”+
9 Chiuta wangufumba Yona kuti: “Kumbi wachita umampha kukwiya chifukwa cha chakume chakutaŵa?”+
Iyu wangumuka kuti: “Nditenere kukwiya, ndipu ndakwiya ukongwa mwakuti ndikhumba kufwa.”
10 Kweni Yehova wangukamba kuti: “Unguchitiya chitima chakume chakutaŵa, cho unguchisuzgikiya cha pamwenga kuchimezga; chingume mu usiku umoza ndi kumala mu usiku umoza.
11 Kumbi nditenere cha kuchitiya chitima Nineve tawuni yikulu,+ yo mwe ŵanthu akujumpha 120,000 wo apambanisa cha pakati pa chamampha ndi chiheni?* Kweniso kumbi nditenere cha kuchitiya chitima nyama zawu zinandi?”+
Mazu Ngam'mphata
^ Viwoneka kuti ichi ntchakume cho vipasu vaki apangiya vipoli kweniso nkhombu. Yapa pangafwatulikiya so kuti, “chimiti cha monu.”
^ Pamwenga kuti, “ko kutuliya lumwi.”
^ Pamwenga kuti, “wo apambanisa cha pakati pa janja lawu lamaryi ndi lamazge.”
