Yoswa 11:1-23
11 Fumu Yabini ya ku Hazori yati yavwa ŵaka venivi, yingutumiza uthenga kwaku Yobabu fumu ya Madoni+ kweniso kwa fumu ya Shimuroni, fumu ya Akishafu,+
2 kwa mafumu nga muvigaŵa vamapiri va kunkhondi,* nga muchidika* cha kumwera kwa Kinereti, nga ku Shefela ndipuso nga muvigaŵa vakusendemukiya ku Dori+ cha kuzambwi,*
3 kwa Akanani+ a kuvuma* ndi kuzambwi,* Aamori,+ Ahiti, Aperezi, Ayebusi a muvigaŵa vamapiri ndipuso kwa Ahivi+ wo ajanga musina mwa Phiri la Herimoni+ mucharu cha Mizipa.
4 Sonu yiwu anguza limoza ndi asilikali ŵawu wosi, ndipu ŵengapu anandi ukongwa nge mchenga wa mumphepeti mwa nyanja. Ŵenga so ndi mahachi nganandi kweniso magaleta ngankhondu.
5 Mafumu ngosi ngenanga ngangupangana kuti ngakumani, ndipu nganguza ndi kujintha msasa pamoza, kumaji nga ku Meromu kuti ngachiti nkhondu ndi Ayisirayeli.
6 Sonu Yehova wangukambiya Yoswa kuti: “Ungaŵawopanga cha,+ pakuti mawa nyengu nge yeniyi, ndiŵaperekengi wosi kwa Ayisirayeli kuti aŵabayi. Ukapunduwi mahachi+ ngawu ndipu magaleta ngawu ukangawotchi ndi motu.”
7 Yoswa limoza ndi anthulumi wosi ankhondu anguyukiya ŵanthu ŵenaŵa mwamabuchibuchi mumphepeti mwa maji nga ku Meromu.
8 Yehova wanguŵapereka mu manja mwa Ayisirayeli+ ndipu anguŵathereska. Anguŵalondo mpaka ku Sidoni Mukulu+ ndipuso ku Misirefotu-mayimu+ kweniso ku Dambu la Mizipe kuvuma.* Ndipu anguŵabaya mpaka pengavi yo wangujaku wamoyu.+
9 Sonu Yoswa wanguchita nge mo Yehova wangumukambiya; wangupunduwa mahachi ngawu kweniso wanguwotcha magaleta ngawu pamotu.+
10 Pavuli paki, Yoswa wanguwelere ndipu wangulonda tawuni ya Hazori, wangubaya fumu yaki ndi lipanga,+ chifukwa tawuni ya Hazori ndiyu yenga likulu la maufumu ngenanga pakwamba.
11 Yiwu angubaya munthu weyosi wa mutawuni iyi ndi lipanga, ndipu anguŵamaliya limu wosi.+ Pengavi chamoyu chechosi cho anguleka kuchibaya.+ Pavuli paki, anguwotcha tawuni ya Hazori.
12 Yoswa wangulonda matawuni ngosi nga mafumu ngenanga, ndipu wanguthereska mafumu ngo ndi lipanga.+ Wangungabaya+ nge mo Mozesi mteŵeti waku Yehova wangulamuliya.
13 Kweni Ayisirayeli anguwotcha cha matawuni ngosi ngo nganguzengeka pa vimbumira kupatuwaku tawuni ya Hazori, chifukwa yeniyi pe ndiyu Yoswa wanguyiwotcha.
14 Vinthu vosi vo venga mumatawuni ngenanga kweniso viŵetu, Ayisirayeli anguvito kuti vije vawu.+ Kweni angubaya munthu weyosi ndi lipanga mpaka po angupeye wosi.+ Palivi munthu yo angumusiya wamoyu.+
15 Yoswa wanguchita vosi nge mo Yehova wangulamuliya mteŵeti waki Mozesi, kweniso mo Mozesi nayu wangulamuliya Yoswa.+ Palivi chechosi cho Yehova wangulamula Mozesi cho Yoswa wanguleka kuchita.+
16 Yoswa wanguthereska charu chosi chenichi, chigaŵa chamapiri, chigaŵa chosi cha Negebu,+ charu chosi cha Gosheni, Shefela,+ Araba+ ndi chigaŵa chamapiri cha Isirayeli ndi vidika vaki,*
17 kutuliya ku Phiri la Halaki, lo lifika ku Seiri ndipuso mpaka ku Bala-gadi+ mu Dambu la Lebanoni lo le musina mwa Phiri la Herimoni.+ Yoswa wanguko mafumu ngawu, wangungathereska ndipu wangungabaya.
18 Yoswa wanguchita nkhondu ndi mafumu ngosi ngenanga kwa nyengu yitaliku.
19 Pengavi tawuni yo yingupempha chimangu kwa Ayisirayeli kupatuwaku Ahivi wo ajanga ku Gibiyoni.+ Ayisirayeli anguthereska matawuni nganyaki ngosi mwakuchita nangu nkhondu.+
20 Yehova ndiyu wanguchitiska kuti amili mitima,+ kuti achiti nkhondu ndi Ayisirayeli ndi chilatu chakuti iyu waŵapereki kwa Ayisirayeli kuti aŵabayi mwambula lisungu.+ Nge mo Yehova wangulamuliya Mozesi, yiwu akhumbikanga kubayika.+
21 Pa nyengu yeniyi, Yoswa wangubaya Aanaki+ wosi muvigaŵa va mapiri, ku Heburoni, ku Debiri, ku Anabu kweniso muvigaŵa vosi va mapiri va ku Yuda ndi vigaŵa vosi va mapiri va ku Isirayeli. Yoswa wanguŵabaya ndipu matawuni ngawu wangungabwanganduwa.+
22 Mucharu chosi cho mwajanga Ayisirayeli, mwengavi Aanaki; kweni ku Gaza,+ ku Gati+ ndi ku Ashidodi+ ndiku angujaku.+
23 Mwaviyo, Yoswa wangulonda charu chosi nge mo Yehova wangulayizgiya Mozesi.+ Ndipu pavuli paki Yoswa wanguchipereka kwa Ayisirayeli kuti chije chihara chawu mwakukoliyana ndi vigaŵa vawu. Charu chenichi chingugaŵika mwakukoliyana ndi mafuku ngawu.+ Ndipu mucharu cho mwengavi so nkhondu.+
Mazu Ngam'mphata
^ Anyaki akamba kuti, “kumpotu.”
^ Pamwenga kuti, “nga ku Araba.”
^ Pamwenga kuti, “ko kuselere lumwi.”
^ Pamwenga kuti, “ko kutuliya lumwi.”
^ Pamwenga kuti, “ko kuselere lumwi.”
^ Pamwenga kuti, “ko kutuliya lumwi.”
^ Mazu ngaki chayingu, “Shefela waki.”
