Yoswa 13:1-33
13 Sonu Yoswa wenga wakukota ndipuso wenga ndi vyaka vinandi.+ Mwaviyo, Yehova wangumukambiya kuti: “Yiwi wakota ndipuso we ndi vyaka vinandi; kweni kweche malu nganandi ngakuti mulondi.*
2 Malu ngo ngajaku ndi yanga:+ vigaŵa vosi va Afilisiti ndipuso va Ageshuri+
3 (kutuwa po Msinji wa Nayilu ukugaŵikana* kuvuma kwa* Ijipiti, mpaka kumphaka ya Ekironi kunkhondi,* ko kwaziŵikanga kuti nkhuchigaŵa cha Akanani),+ kusazgiyapu so chigaŵa cha mafumu ngankhondi nga Afilisiti,+ kung’anamuwa fumu ya ŵanthu a ku Gaza, ya ŵanthu a ku Ashidodi,+ ya ŵanthu a ku Ashikeloni,+ ya ŵanthu a ku Gati+ ndi ya ŵanthu a ku Ekironi;+ kweniso chigaŵa cha Aavimu+
4 kumwera. Kwaja so charu chosi cha Akanani; Meyara yo ntchigaŵa cha ŵanthu a ku Sidoni,+ mpaka ku Afeki, kumphaka ya Aamori;
5 charu cha Agebali+ ndipuso charu chosi cha Lebanoni kuvuma,* kwambiya ku Bala-gadi musina mwa Phiri la Herimoni mpaka ku Lebo-hemati;*+
6 ŵanthu wosi wo aja muchigaŵa chamapiri kwambiya ku Lebanoni+ mpaka ku Misirefotu-mayimu;+ ndipuso ŵanthu wosi a ku Sidoni.+ Ndazakuŵadikisa wosi pa masu pa Ayisirayeli.+ Nge mo ndakulamuliya, yiwi ugaŵiyi Ayisirayeli charu ichi kuti chije chihara chawu.+
7 Sonu ugaŵi charu ichi kuti chije chihara cha mafuku 9 kweniso hafu ya fuku laku Manasi.”+
8 Hafu yinyaki ya fuku laku Manasi, ŵanthu a fuku laku Rubeni kweniso ŵanthu a mu fuku laku Gadi angulonde chihara chawu cho Mozesi wanguŵapaska kuvuma* kwa Yorodani, nge mo Mozesi mteŵeti waku Yehova wanguŵapaskiya:+
9 kwambiya ku Aroweri,+ yo ndi tawuni yo ye mumphepeti mwa Dambu la Arinoni,+ ndipuso tawuni yo ye pakati pa dambu kweniso chidika chosi cha Medeba, mpaka ku Diboni;
10 ndipuso matawuni ngosi ngaku Sihoni fumu ya Aamori, yo walamuliyanga ku Heshiboni mpaka kumphaka ya Aamoni;+
11 kweniso chigaŵa cha Giliyadi, chigaŵa cha Ageshuri ndi Amayakati+ ndipuso chigaŵa chosi cha Phiri la Herimoni ndi chigaŵa chosi cha Bashani+ mpaka ku Saleka;+
12 chigaŵa chosi cho chalamulikanga ndi Ogi fumu ya ku Bashani. Iyu walamuliyanga ku Ashitaroti ndi ku Edireyi. (Iyu wenga yumoza mwa Arefayimu akumaliya.)+ Mozesi wanguŵathereska ndipu wanguŵadikisa.+
13 Kweni Ayisirayeli anguŵadikisa cha+ Ageshuri ndi Amayakati. Mwaviyo, Ageshuri ndi Amayakati ŵeche kuja pakati pa Ayisirayeli mpaka msanawale.
14 Fuku la Alevi pe ndilu wangulipaska cha chihara.+ Sembi zakotcha pamotu zakuperekeka kwaku Yehova Chiuta waku Isirayeli ndizu chihara chawu,+ nge mo wanguŵalayizgiya.+
15 Pavuli paki, Mozesi wangupereka chihara ku ŵanthu a fuku laku Rubeni mwakukoliyana ndi mabanja ngawu,
16 ndipu chigaŵa chawu chayambiyanga ku Aroweri, yo ndi tawuni yo ye mumphepeti mwa Dambu la Arinoni, ndipuso tawuni yo ye pakati pa dambu kweniso chidika chosi cha Medeba,
17 Heshiboni ndi matawuni ngaki ngosi+ ngo nge pachidika, Diboni, Bamoti-bala, Beti-bala-meyoni,+
18 Yahazi,+ Kedemoti,+ Mefayati,+
19 Kiriyatayimu, Sibima+ ndipuso Zereti-shahara paphiri la kudambu,*
20 Beti-peyori, malu ngakusendemuka nga ku Pisiga,+ Beti-yeshimoti,+
21 matawuni ngosi nga pachidika ndipuso matawuni ngosi ngaku Sihoni fumu ya Aamori, yo walamuliyanga ku Heshiboni.+ Mozesi wanguthereska Sihoni+ limoza ndi mafumu nga Amidiyani ngo ndi Evi, Rekemu, Zuri, Huru ndi Reba,+ kweniso mafumu ngo ngenga pasi paku Sihoni ngo ngajanga mucharu cho.
22 Balamu+ mwana waku Beyori, yo waloskanga va munthazi,+ Ayisirayeli angumubaya ndi lipanga limoza ndi ŵanthu anyaki wosi wo angubayika.
23 Mphaka ya ŵanthu a fuku laku Rubeni yenga Yorodani; ndipu chigaŵa chenichi chenga chihara cha ŵanthu a mu fuku laku Rubeni mwakukoliyana ndi mabanja ngawu, limoza ndi matawuni kweniso malu ngo ajangamu.
24 Mozesi wangupereka so chihara ku fuku laku Gadi, ŵanthu a fuku laku Gadi mwakukoliyana ndi mabanja ngawu,
25 ndipu chigaŵa chawu chasazgangapu Yazeri+ ndi matawuni ngosi nga Giliyadi kweniso hafu ya charu cha Aamoni+ mpaka ku Aroweri, tawuni yo yilereskana ndi Raba;+
26 ndipuso kwambiya ku Heshiboni+ mpaka ku Ramati-mizipe ndi ku Betonimu, kweniso kwambiya ku Mahanayimu+ mpaka kumphaka ya Debiri;
27 ndipuso ku dambu,* Beti-haramu, Beti-nimura,+ Sukoti+ ndipuso Zafoni, chigaŵa chosi chakulamulika ndi Sihoni fumu ya Heshiboni.+ Yorodani ndiyu wenga mphaka, kwambiya kumphata kwa Nyanja ya Kinereti*+ kuvuma* kwa Msinji wa Yorodani.
28 Chenichi chenga chihara cha ŵanthu a fuku laku Gadi mwakukoliyana ndi mabanja ngawu, limoza ndi matawuni kweniso malu ngo ajangamu.
29 Mozesi wangupereka so chihara kwa hafu ya fuku laku Manasi. Iyu wangupereka kwa hafu ya fuku laku Manasi mwakukoliyana ndi mabanja ngawu.+
30 Chigaŵa chawu chinguyambiya ku Mahanayimu+ ndipuso Bashani yosi, chigaŵa chosi cho chalamulikanga ndi Ogi fumu ya Bashani kweniso mizi yosi ya mahema ya Yayiri+ ku Bashani, matawuni 60.
31 Ndipu hafu ya Giliyadi, kweniso Ashitaroti ndi Edireyi,+ matawuni ngosi ngo ngalamulikanga ndi Ogi fumu ya Bashani, nganguperekeka ku ŵana aku Makiri,+ mwana waku Manasi. Malu yanga nganguperekeka kwa hafu ya ŵana aku Makiri mwakukoliyana ndi mabanja ngawu.
32 Venivi venga vigaŵa vo Mozesi wanguŵapaska nge chihara muvidika* va ku Mowabu kusirya kwa Msinji wa Yorodani, kuvuma* kwa Yeriko.+
33 Kweni fuku la Alevi, Mozesi wangulipaska cha chihara.+ Yehova Chiuta waku Isirayeli ndiyu chihara chawu nge mo wanguŵalayizgiya.+
Mazu Ngam'mphata
^ Pamwenga kuti, “ngakuti muthereski.”
^ Pamwenga kuti, “kutuwa ku Shihori.”
^ Anyaki akamba kuti, “kumpotu.”
^ Pamwenga kuti, “ko kutuliya lumwi.” Mazu ngaki chayingu, “kumasu kwa.”
^ Pamwenga kuti, “ko kutuliya lumwi.”
^ Pamwenga kuti, “pakuselere ku Hemati.”
^ Pamwenga kuti, “ko kutuliya lumwi.”
^ Pamwenga kuti, “la kuchidika.”
^ Pamwenga kuti, “chidika.”
^ Kung’anamuwa nyanja ya Genesareti, pamwenga Nyanja ya Galileya.
^ Pamwenga kuti, “ko kutuliya lumwi.”
^ Mazu ngaki chayingu, “muvidika vachipalamba.”
^ Pamwenga kuti, “ko kutuliya lumwi.”
