Yoswa 14:1-15
14 Sonu ichi ndichu chigaŵa cho Ayisirayeli anguto kuti chije chihara chawu mucharu cha Kanani, cho wasembi Eliyazara ndipuso Yoswa mwana waku Nuni limoza ndi alongozgi a nyumba za awusewu a mafuku nga Ayisirayeli, anguŵapaska kuti chije chihara chawu.+
2 Chihara cha mafuku 9 ndi hafu, chingugaŵika mwakuchita mayeri,+ nge mo Yehova wangulamuliya kuziya mwaku Mozesi.+
3 Pa nyengu iyi ndipu Mozesi wapereka kali chihara ku mafuku nganyaki ngaŵi ndi hafu kusirya* kwa Yorodani,+ kweni Alevi wanguŵapaska cha chihara pakati pa mafuku ngenanga.+
4 Ŵana aku Yosefi angugaŵika mafuku ngaŵi,+ fuku laku Manasi ndi fuku laku Efurayemu;+ ndipu Alevi anguŵapaskaku cha chihara mucharu chawu kupatuwaku matawuni+ ngakuti ajengemu ndipuso malu ngakuti aliskengeku viŵetu vawu kweniso kusungaku katundu wawu.+
5 Mwaviyo, Ayisirayeli angugaŵa charu mwakukoliyana ndi mo Yehova wangulamuliya Mozesi.
6 Sonu ŵanthu a fuku laku Yuda anguza kwaku Yoswa ku Giligala,+ ndipu Kalebe+ mwana waku Yefune Mkenizi wangukambiya Yoswa kuti: “Uziŵa umampha vo Yehova wangukambiya+ Mozesi munthu waku Chiuta wauneneska+ vakukwaskana ndi yiwi kweniso ini, ku Kadeshi-baniya.+
7 Ndenga ndi vyaka 40 pa nyengu yo Mozesi mteŵeti waku Yehova wangundituma kutuwa ku Kadeshi-baniya kuti nkhawoni charu,+ ndipu ndati ndawe ndingukonkhoska vinthu vamampha.*+
8 Chinanga kuti abali ŵangu wo ndingulutiya nawu limoza anguchitiska kuti mitima ya ŵanthu yisongonoki, ini ndingulondo Yehova Chiuta wangu ndi mtima wosi.*+
9 Pa zuŵa lenili, Mozesi wangulapizga kuti: ‘Charu cho lundi laku layendapu chazamuja chihara chaku ndi cha ŵana ŵaku mpaka muyaya, chifukwa walondo Yehova Chiuta wangu ndi mtima waku wosi.’+
10 Sonu nge mo iyu wangulayizgiya,+ Yehova wandisunga wamoyu+ vyaka 45 ivi, kutuliya po Yehova wangulayizgiya venivi kwaku Mozesi pa nyengu yo Ayisirayeli ayendanga muchipululu.+ Ini ndeche wamoyu mpaka msanawale ndipu nde ndi vyaka 85.
11 Ndipu msanawale ndeche ndi nthazi nge mo nde nge pa zuŵa lo Mozesi wangunditumiya. Ndeche ndi nthazi nge mo nde nge pa nyengu yeniyo, mwakuti ndingaluta ku nkhondu ndipuso ndingachita vinthu vinyaki.
12 Mwaviyo, undipaski chigaŵa ichi chamapiri cho Yehova wangundilayizga pa zuŵa liya. Chinanga kuti yiwi unguvwa zuŵa leniliya kuti kuchigaŵa ichi kwe Aanaki+ wo ŵe ndi matawuni nga mipanda yakukho ukongwa,+ kweni ndikayika cha* kuti Yehova waŵengi nani+ ndipu ndiŵadikisengi nge mo Yehova wakulayizgiya.”+
13 Mwaviyo, Yoswa wangutumbika Kalebe mwana waku Yefune ndipu wangumupaska charu cha Heburoni kuti chije chihara chaki.+
14 Ndichu chifukwa chaki charu cha Heburoni ntchaku Kalebe mwana waku Yefune Mkenizi, nge chihara chaki mpaka msanawale. Ve viyo chifukwa iyu wangulondo Yehova Chiuta waku Isirayeli ndi mtima wosi.+
15 Pakwamba, charu cha Heburoni chaziŵikanga kuti Kiriyati-ariba,+ (Ariba wenga munthu wakutchuka ukongwa pakati pa Aanaki). Ndipu mucharu cho mwengavi so nkhondu.+
Mazu Ngam'mphata
^ Kung’anamuwa kuvuma.
^ Mazu ngaki chayingu, “ndinguweku ndi mazu ngakukoliyana ndi mo mtima wangu wenge.”
^ Mazu ngaki chayingu, “wamphumphu.”
^ Pamwenga kuti, “kweni vakuwoneke limu.”
