Yoswa 18:1-28
18 Sonu Ayisirayeli wosi anguwungana* ku Shilo,+ ndipu kwenuku angujintha chihema chakukumanaku,+ pakuti charu chosi anguchithereska.+
2 Kweni penga mafuku 7 nga Ayisirayeli ngo ngangujaku kwambula kupaskika chihara chawu.
3 Sonu Yoswa wangukambiya Ayisirayeli kuti: “Kumbi muchitengi vidazi mpaka zuŵanji kwambula kuto charu cho Yehova Chiuta wa apapi ŵinu akali wakukupaskani kuti chije chinu?+
4 Fuku lelosi lindipaski anthulumi atatu kuti ndiŵatumi. Yiwu alutengi ndi kwenda mucharu chosi kuti akajambuli mo chiliri mwakukoliyana ndi chihara chawu. Pavuli paki, azamuwere kwaku ini.
5 Akagaŵi charu cho vigaŵa 7 ndipu akagaŵani.+ Yuda walutirizgengi kuja muchigaŵa chaki kumwera,+ ndipu nyumba yaku Yosefi yilutirizgengi kuja muchigaŵa chaki kunkhondi.*+
6 Kweni yimwi, mukajambuli mo charu cho chiliri ndipu mukachigaŵi vigaŵa 7, pavuli paki mukazi navu kunu. Ini ndazakukugaŵiyani mwakuchita mayeri+ pa masu paku Yehova Chiuta widu.
7 Kweni Alevi alivi chihara pakati pinu,+ pakuti kuteŵete nge asembi aku Yehova ndichu chihara chawu;+ ndipu Gadi ndi Rubeni kweniso hafu ya fuku laku Manasi,+ akupaskika kali chihara chawu kuvuma* kwa Yorodani. Mozesi mteŵeti waku Yehova ndiyu wakuŵapaska chihara chenichi.”
8 Ŵanthu wo, angunozgeke ulendu wakuchijambula mo charu chiliri, ndipu Yoswa wangulamula kuti: “Lutani mukayendi mucharu chosi ndipu mukajambuli mo chiliri, pavuli paki mukazi kwaku ini. Ndipu ini ndazakukugaŵiyani mwakuchita mayeri pa masu paku Yehova, ku Shilo.”+
9 Yoswa wati wakamba venivi, ŵanthu wo anguluta ndipu angwenda mucharu chosi. Yiwu anguchigaŵa vigaŵa 7 kweniso anguchijambula mwakukoliyana ndi matawuni, ndipu angulemba mubuku. Pavuli paki, anguwere kwaku Yoswa kumsasa ku Shilo.
10 Sonu Yoswa wanguŵagaŵiya mwakuchita mayeri pa masu paku Yehova+ ku Shilo. Ndipu kwenuku, Yoswa wangugaŵiya Ayisirayeli charu cho mwakukoliyana ndi vigaŵa vawu.+
11 Sonu mayeri nganguwiya fuku laku Benjamini mwakukoliyana ndi mabanja ngawu, ndipu chigaŵa cho angupaskika chenga pakati pa chigaŵa cha ŵana aku Yuda+ ndi ŵana aku Yosefi.+
12 Kunkhondi,* mphaka yawu yingwambiya ku Yorodani, yingulutiriya mpaka kumalu ngakusendemuka nga kunkhondi kwa Yeriko+ kweniso yingukwera kuphiri chakuzambwi* ndipu yingulutiriya mpaka kufika kuchipululu cha Beti-aveni.+
13 Kutuwa kwenuku, mphaka yingulutiriya mpaka ku Luzi, kumalu ngakusendemuka nga kumwera kwa Luzi, kung’anamuwa Beteli;+ mphaka yeniyi yingusika mpaka ku Ataroti-adara+ paphiri lo le kumwera kwa Beti-horoni Wakumphata.+
14 Kuzambwi,* mphaka yeniyi yingulazga chakumwera kutuwa paphiri lo lilereskana ndi Beti-horoni kumwera; yingumaliya ku Kiriyati-bala, kung’anamuwa Kiriyati-yearimu+ yo ndi tawuni ya Yuda. Yeniyi ndiyu mphaka ya kuzambwi.
15 Kumwera, mphaka yingwambiya kuchigoti cha Kiriyati-yearimu ndipu yingufika kuzambwi;* yingulutiriya kukasupi wamaji wa ku Nefitowa.+
16 Mphaka yeniyi yingulutiriya kuchigoti cha phiri lo lilereskana ndi Dambu la Mwana waku Hinomu,+ lo le mu Dambu la* Refayimu+ kunkhondi,* yingusikiya ku Dambu la Hinomu, kumalu ngakusendemuka nga Yebusi+ kumwera, mpaka ku Eni-rogeli.+
17 Yingujumpha chakunkhondi,* yingufika ku Eni-shemeshi mpaka ku Geliloti, yo we kumasu kwa malu ngakukwere ku Adumimu,+ ndipu yingusikiya ku mwa+ waku Bohani+ mwana waku Rubeni.
18 Yingulutiriya kunkhondi* kumalu ngakusendemuka kumasu kwa Araba, ndipu yingusikiya ku Araba.
19 Mphaka yeniyi yingulutiriya kunkhondi* kumalu ngakusendemuka nga Beti-hogila,+ ndipu yingumaliya ku ndomu ya kunkhondi* ya Nyanja ya Mche*+ kukumaliya kwa Yorodani kumwera. Yeniyi ndiyu yenga mphaka ya kumwera.
20 Ndipu mphaka ya kuvuma* yenga Yorodani. Yeniyi ndiyu yenga mphaka ya chihara cha fuku laku Benjamini kuvigaŵa vosi, mwakukoliyana ndi mabanja ngawu.
21 Ndipu matawuni nga fuku laku Benjamini mwakukoliyana ndi mabanja ngawu ngenga: Yeriko, Beti-hogila, Emeki-kezizi,
22 Beti-araba,+ Zemarayimu, Beteli,+
23 Avimu, Para, Ofura,
24 Kefara-amoni, Ofini ndipuso Geba.+ Ngosi pamoza ngengapu matawuni 12, limoza ndi mizi yaki.
25 Gibiyoni,+ Rama, Beroti,
26 Mizipe, Kefira, Moza,
27 Rekemu, Iripeli, Tarala,
28 Zela,+ Hayelefi, Yebusi, kung’anamuwa Yerusalemu,+ Gibeya+ ndipuso Kiriyati. Ngosi pamoza ngengapu matawuni 14, limoza ndi mizi yaki.
Chenichi chenga chihara cha fuku laku Benjamini mwakukoliyana ndi mabanja ngawu.
Mazu Ngam'mphata
^ Mazu ngaki chayingu, “unganu wosi wa Ayisirayeli unguwungana.”
^ Anyaki akamba kuti, “kumpotu.”
^ Pamwenga kuti, “ko kutuliya lumwi.”
^ Anyaki akamba kuti, “Kumpotu.”
^ Pamwenga kuti, “cha ko kuselere lumwi.”
^ Pamwenga kuti, “ko kuselere lumwi.”
^ Pamwenga kuti, “ko kuselere lumwi.”
^ Pamwenga kuti, “Chidika cha.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Kung’anamuwa Nyanja Yakufwa.
^ Pamwenga kuti, “ko kutuliya lumwi.”
