Yoswa 20:1-9
-
Matawuni ngakutaskikiyaku (1-9)
20 Sonu Yehova wangukambiya Yoswa kuti:
2 “Kambiya Ayisirayeli kuti, ‘Jisankhiyeni matawuni ngakutaskikiyaku+ ngo ndingukukambiyani kuporote mwaku Mozesi,
3 kuti munthu yo wabaya munyaki mwangozi wazithaŵiyengeku. Ndipu matawuni yanga ngazamuja ngakuti muzitaskikiyengeku asani muthaŵa wakuweze ndopa.+
4 Yo wabaya munthu mwangozi watenere kuthaŵiya mu yimoza mwa matawuni ngenanga,+ ndipu wakami pageti la tawuni yo+ ndi kukonkhoske nkhani yaki ŵara a tawuni yo. Pavuli paki, yiwu amulondere mutawuni yo, amupaski malu ndipu wajengi nawu mwenimo.
5 Asani wakuweze watimutchimbiza, yiwu angamuperekanga cha yo wabaya munyaki mwangozi mu manja mwa wakuweze, chifukwa wamubaya mwangozi, ndipu wamutinkhanga cha.+
6 Wakubaya munthu mwangozi, watenere kuja mutawuni yo mpaka po wazamuyeruzgikiya pa masu pa unganu,+ ndipu watenere kulutirizga kuja kweniko mpaka po wafwiya wasembi mura+ yo we pa udindu pa nyengu yo. Pavuli paki, iyu wangawere kutawuni yo wanguthaŵaku ndipu wangasere mutawuni yaki ndipuso munyumba yaki.’”+
7 Sonu angupatuwa Kedeshi+ ku Galileya muchigaŵa chamapiri cha Nafutali, Sekemu+ muchigaŵa chamapiri cha Efurayemu ndipuso Kiriyati-ariba,+ kung’anamuwa Heburoni, muchigaŵa chamapiri cha Yuda.
8 Muchigaŵa cha Yorodani kuvuma* kwa Yeriko, kutuliya mu fuku laku Rubeni angusankha Bezeri+ muchipululu cho che pamtunthu,* kutuliya mu fuku laku Gadi angusankha Ramoti+ ku Giliyadi, ndipu kutuliya mu fuku laku Manasi+ angusankha Golani+ ku Bashani.
9 Ngenanga ndingu ngenga matawuni ngo ngangusankhikiya Ayisirayeli wosi kweniso alendu wo ajanga pakati pawu, ndi chilatu chakuti munthu weyosi yo wabaya munyaki mwangozi wathaŵiyengeku+ ndipuso kuti wakuweze waleki kumubaya, mulandu waki wechendayeruzgiki pa masu pa unganu.+
