Yoswa 3:1-17
-
Ayisirayeli ayambuka Yorodani (1-17)
3 Sonu Yoswa wanguyuka mlenjilenji, ndipu iyu ndi Ayisirayeli* wosi angutuwaku ku Sitimu+ ndipu angufika ku Yorodani. Yiwu angugona kweniko ŵechendayambuki.
2 Pati pajumpha mazuŵa ngatatu, alongozgi a ŵanthu+ angwenda mumsasa wosi
3 ndipu angukambiya ŵanthu kuti: “Asani mwawona asembi wo Mbalevi apinga bokosi la phanganu laku Yehova Chiuta winu,+ musoki ndi kulondo bokosi lo.
4 Kweni pakati pinu ndi bokosi lenili patenere kuja mtunda wa mamita pafufupi 890;* mungafikanga kufupi ndi bokosi ili cha, kuti muziŵi nthowa yo mutenere kwendamu, chifukwa yimwi mwechendayendepu nthowa iyi.”
5 Sonu Yoswa wangukambiya ŵanthu kuti: “Mujitowesi,+ pakuti mawa Yehova wachitengi vinthu vakuziziswa pakati pinu.”+
6 Pavuli paki, Yoswa wangukambiya asembi kuti: “Nyamuwani bokosi+ la phanganu ndipu muyendi panthazi pa ŵanthu.” Yiwu angunyamuwa bokosi la phanganu ndi kwenda panthazi pa ŵanthu.
7 Sonu Yehova wangukambiya Yoswa kuti: “Msanawale, ndiyambengi kukukweza pa masu pa Ayisirayeli wosi,+ kuti aziŵi kuti ndiŵengi nawi+ nge mo ndinguŵiya ndi Mozesi.+
8 Asembi wo anyamuwengi bokosi la phanganu uŵakambiyi kuti: ‘Asani mwafika mumphepeti mwa maji nga mu Yorodani, mukami jo mu Yorodani.’”+
9 Ndipu Yoswa wangukambiya Ayisirayeli kuti: “Zani kunu kuti muzivwisiyi mazu ngaku Yehova Chiuta winu.”
10 Sonu Yoswa wangukamba kuti: “Chifukwa cha venivi, muziŵengi kuti Chiuta wamoyu we pakati pinu,+ ndipuso kuti watondekengi cha kuŵadikisa pa masu pinu Akanani, Ahiti, Ahivi, Aperezi, Agirigasi, Aamori ndi Ayebusi.+
11 Awonani! Bokosi la phanganu la Ambuya a charu chosi, lijumpha panthazi pinu kusere mu Yorodani.
12 Sonu sankhani anthulumi 12 kutuliya mu mafuku ngaku Isirayeli, munthu yumoza kutuliya mu fuku lelosi.+
13 Asani maphazi nga asembi wo anyamuwa Bokosi laku Yehova, Ambuya a charu chosi, ngakwaska ŵaka* maji nga mu Yorodani, maji nga mu Yorodani ngo ngatenda kutuliya kunena, ngayendengi cha ndipu ngamengi nge maji nga mudamu.”*+
14 Sonu ŵanthu ŵati asoka mumahema ngawu, ŵechendayambuki Yorodani, asembi wo angunyamuwa bokosi+ la phanganu anguluta panthazi pa ŵanthu.
15 Ŵanthu wo angunyamuwa Bokosi ŵati afika ŵaka pa Msinji wa Yorodani, ndipu maphazi nga asembi wo angunyamuwa Bokosi ngati ngakanda ŵaka maji nga mumphepeti (pakuti Yorodani wasapaliyanga+ mu nyengu yosi yakukolola),
16 maji ngo ngayendanga kutuwa kunena nganguleka kwenda. Mumalu mwaki nganguma kutali ukongwa ku Adamu, tawuni yo yenga pafupi ndi Zaretani ndipu ngangwamba kukwera nge maji nga mudamu.* Kweni maji ngo ngasikiyanga ku Nyanja ya Araba yo ndi Nyanja ya Mche,* nganguphwa. Maji nganguleka kwenda ndipu ŵanthu anguyambukiya pamalu ngakulereskana ndi Yeriko.
17 Ayisirayeli wosi anguyambuka padongu lakumira,+ pa nyengu yo asembi wo angunyamuwa bokosi la phanganu laku Yehova, anguma+ pakati pa Yorodani. Yiwu angulutirizga kuma mpaka mtundu wosi ungumaliza kuyambuka Yorodani.
Mazu Ngam'mphata
^ Mazu ngaki chayingu, “ŵana aku Isirayeli.”
^ Mazu ngaki chayingu, “manja pafufupi 2,000”; (Mafiti 2,920). Wonani Fundu Zakukumaliya B14.
^ Mazu ngaki chayingu, “ngapumuwa ŵaka mu.”
^ Pamwenga kuti, “nge chimati.”
^ Pamwenga kuti, “nge chimati.”
^ Kung’anamuwa Nyanja Yakufwa.
