Yoswa 4:1-24
-
Mya ya chikumbusu (1-24)
4 Mtundu wosi wati wamaliza ŵaka kuyambuka Msinji wa Yorodani, Yehova wangukambiya Yoswa kuti:
2 “Usankhi anthulumi 12 mu ŵanthu, mu fuku lelosi utomu munthulumi yumoza,+
3 ndipu uŵalamuli kuti: ‘Nyamuwani mya 12 pakati pa Msinji wa Yorodani penipo asembi anguma,+ ndipu muluti nayu ko mwamugona msanawale, mukayiŵiki kweniko.’”+
4 Sonu Yoswa wangudana anthulumi 12 wo wangusankha kutuliya mwa Ayisirayeli, ndipu mu fuku lelosi wangutomu munthulumi yumoza.
5 Yoswa wanguŵakambiya kuti: “Mujumphi panthazi pa Bokosi laku Yehova Chiuta winu, ndipu muluti pakati pa Msinji wa Yorodani, weyosi waku yimwi wanyamuwi mwa paphewa laki, mwakukoliyana ndi chiŵerengeru cha mafuku nga Ayisirayeli,
6 kuti yije chisimikizu pakati pinu. Asani ŵana ŵinu* azikufumbani kunthazi kuti, ‘Ntchifukwa wuli mwe ndi mya iyi?’+
7 muziŵamukengi kuti: ‘Chifukwa chakuti maji nga mu Yorodani nganguleka kwenda pa masu pa bokosi+ la phanganu laku Yehova. Pa nyengu yo layambukanga Msinji wa Yorodani, maji nga mu Yorodani nganguleka kwenda. Mya iyi ntchikumbusu chamuyaya kwa Ayisirayeli.’”+
8 Sonu Ayisirayeli anguchita nge mo Yoswa wanguŵalamuliya. Yiwu angunyamuwa mya 12 pakati pa Msinji wa Yorodani nge mo Yehova wangukambiya Yoswa, kuti yikoliyani ndi chiŵerengeru cha mafuku nga Ayisirayeli. Anguyinyamuliya kumalu ko angugona ndipu anguyiŵika kweniko.
9 Yoswa wanguyereka so mya 12 pakati pa Msinji wa Yorodani, po asembi wo angunyamuwa bokosi la phanganu anguma,+ ndipu mya yeniyi yilipu mpaka msanawale.
10 Asembi wo angunyamuwa Bokosi, angulutirizga kuma pakati pa Msinji wa Yorodani mpaka po vinguchitikiya vosi vo Yehova wangulamula Yoswa kuti wakambiyi ŵanthu, mwakukoliyana ndi vosi vo Mozesi wangulamula Yoswa. Pa nyengu yosi yo asembi anguma, ŵanthu ayambukanga liŵiliŵi.
11 Ŵanthu wosi ŵati amaliza kuyambuka, Bokosi laku Yehova ndipuso asembi anguyambuka ŵanthu achiwona.+
12 Ndipu a mu fuku laku Rubeni, laku Gadi ndi hafu ya fuku laku Manasi, anguyambuka panthazi pa Ayisirayeli mumzeri wakunozgeke nkhondu,+ nge mo Mozesi wanguŵalamuliya.+
13 Asilikali pafufupi 40,000 wo angupinga vidya vankhondu, anguyambuka pa masu paku Yehova kuluta kuvidika* va ku Yeriko.
14 Pa zuŵa lenili, Yehova wangukweza Yoswa pa masu pa Ayisirayeli wosi,+ ndipu yiwu amutumbikanga ukongwa* mu mazuŵa ngosi nga umoyu waki nge mo atumbikiyanga Mozesi.+
15 Sonu Yehova wangukambiya Yoswa kuti:
16 “Lamula asembi wo anyamuwa bokosi+ la Ukaboni kuti atuwemu mu Yorodani.”
17 Sonu Yoswa wangulamula asembi kuti: “Tuwanimu mu Yorodani.”
18 Asembi wo angupinga bokosi+ la phanganu laku Yehova ŵati atuwapu pakati pa Msinji wa Yorodani, ndipuso maphazi ngawu ngati ngakanda ŵaka pamtunda pakumira, maji nga mumsinji wa Yorodani ngangwamba so kwenda ndipu ngangusapaliya+ nge mo ngenge pakwamba.
19 Ŵanthu anguyambuka Msinji wa Yorodani pa zuŵa la 10 mu mwezi wakwamba, ndipu anguchijintha msasa ku Giligala+ kumphaka ya kuvuma* ya Yeriko.
20 Ndipu mya 12 yo anguto mu Yorodani, Yoswa wanguyiyereka ku Giligala.+
21 Pavuli paki wangukambiya Ayisirayeli kuti: “Munthazi, asani ŵana ŵinu azifumba awusewu kuti, ‘Mya iyi ying’anamuwanji?’+
22 muziŵakonkhoskiyengi ŵana ŵinu kuti: ‘Ayisirayeli anguyambuka Yorodani pakumira+
23 pa nyengu yo Yehova Chiuta winu wangukamusiya maji nga mu Yorodani pa masu pawu mpaka po wosi anguyambukiya, nge mo Yehova Chiuta winu wangutikamusiya Nyanja Yiyera mpaka po tinguyambukiya.+
24 Iyu wanguchita venivi kuti ŵanthu wosi pacharu chapasi aziŵi kuti janja laku Yehova ndanthazi ukongwa,+ ndipuso kuti yimwi muwopengi Yehova Chiuta winu nyengu zosi.’”
Mazu Ngam'mphata
^ Mazu ngaki chayingu, “ŵana ŵinu anthulumi.”
^ Mazu ngaki chayingu, “vidika vachipalamba.”
^ Mazu ngaki chayingu, “yiwu amuwopanga.”
^ Pamwenga kuti, “ya ko kutuliya lumwi.”
