Yoswa 5:1-15
5 Mafumu ngosi nga Aamori+ ngo ngenga kuzambwi* kwa Yorodani kweniso mafumu ngosi nga Akanani+ ngo ngenga kufupi ndi kunyanja, ngati ngavwa ŵaka kuti Yehova wangukamusiya Ayisirayeli maji nga mumsinji wa Yorodani, mpaka po wosi anguyambukiya, mitima yawu yingusongonoka+ ndipu palivi yo wenga ndi nthazi* chifukwa cha Ayisirayeli.+
2 Pa nyengu yeniyi, Yehova wangukambiya Yoswa kuti: “Upangi tivimayi ta mya ndipu udumuwi+ so kachiŵi makhungu nga Ayisirayeli anthulumi.”
3 Mwaviyo, Yoswa wangupanga tivimayi ta mya ndipu wangudumuwa makhungu nga Ayisirayeli anthulumi pa Gibeyati-haaraloti.*+
4 Chifukwa cho Yoswa wanguŵadumuliya makhungu ndi ichi: Anthulumi wosi wo angutuwa ku Ijipiti kung’anamuwa anthulumi akwenere kuluta ku nkhondu,* angufwa ŵe pa ulendu muchipululu ŵati atuwa mu Ijipiti.+
5 Ŵanthu wo angutuwa mu Ijipiti ŵenga akudumulika, kweni ŵanthu wosi wo anguwiya muchipululu ŵe pa ulendu ŵati atuwa mu Ijipiti, ŵenga ambula kudumulika.
6 Ayisirayeli angwenda vyaka 40+ muchipululu mpaka po ungufwiya mtundu wosi wo ungutuwa ku Ijipiti, kung’anamuwa anthulumi wosi akwenere kuluta ku nkhondu, wo anguleka kuvwiya mazu ngaku Yehova.+ Yehova wanguŵalapizgiya kuti waŵazomerezengi cha kuti awoni charu+ chakwenda mkaka ndi uchi+ cho Yehova wangulapizgiya apapi ŵawu akali kuti watipaskengi.+
7 Sonu ŵana ŵawu ndiwu angusere mumalu mwawu.+ Ŵenaŵa ndiwu Yoswa wanguŵadumuwa makhungu; yiwu ŵenga ambula kudumulika pakuti angudumulika cha munthowa.
8 Ŵati amaliza kudumuwa makhungu mtundu wosi wa Ayisirayeli, angulutirizga kuja penipo pamsasa mpaka po anguchiriya.
9 Sonu Yehova wangukambiya Yoswa kuti: “Msanawale, ndakutuzgiyanipu* soni zo Ayijipiti angukuchitiskani.” Mwaviyo, malu ngenanga ngadanika kuti Giligala*+ mpaka msanawale.
10 Ayisirayeli angulutirizga kuja pamsasa ku Giligala, ndipu pa zuŵa la 14 mu mwezi wenuwu anguchita Pasika+ ndi mazulu, muvidika* va ku Yeriko.
11 Yiwu angwamba kurya vinthu va mucharu ichi pavuli pa zuŵa la Pasika. Pa zuŵa lenili, angurya chiŵandi chambula chakutupisa+ kweniso mbewu zakukazinga.
12 Yiwu ŵati arya vinyaki mwa vinthu va mucharu ichi, mana nganguleka mawa laki; pengavi so mana ngakuti Ayisirayeli aryi,+ kweni yiwu angwamba kurya vinthu va mucharu cha Kanani mu chaka chenichi.+
13 Yoswa we pafupi ndi Yeriko, wanguyunuka ndipu wanguwona munthulumi+ wama kunthazi kwaki ndipu wenga ndi lipanga kujanja laki.+ Yoswa wanguluta pafupi ndi munthu yo ndipu wangumufumba kuti: “Kumbi we kuchigaŵa chidu pamwenga we kuchigaŵa cha arwani ŵidu?”
14 Munthu yo wangumuka kuti: “Awa, kweni ndaza nge mulongozgi wa gulu la nkhondu laku Yehova.”+ Yoswa wati wavwa venivi, wangusindama ndi kujikama mpaka chisku chaki pasi. Iyu wangukambiya munthu yo kuti: “Mukhumba kumukambiyanji mteŵeti winu ambuya?”
15 Mulongozgi wa gulu la nkhondu laku Yehova wangumuka Yoswa kuti: “Zuwa sapatu kumaphazi ngaku, pakuti malu ngo wamapu ngakupaturika.” Nyengu yeniyo, Yoswa wanguchita venivi.+
Mazu Ngam'mphata
^ Pamwenga kuti, “kwakuselere lumwi.” Mazu ngaki chayingu, “kuchigaŵa chakuchili kunyanja.”
^ Mazu ngaki chayingu, “palivi munthu yo mwaku iyu mwenga mzimu.”
^ Kung’anamuwa kuti, “Phiri la Makhungu Ngakusongu.”
^ Pamwenga kuti, “ŵanthu a msinkhu wakukwana kuluta ku nkhondu.”
^ Mazu ngaki chayingu, “ndakukunkhuzgiyani kutali.”
^ Kung’anamuwa kuti, “Kukunkhuzga; Kukunkhuzgiya Kutali.”
^ Mazu ngaki chayingu, “muvidika vachipalamba.”
