Paulo ndi Sila athamikanga Chiuta mwakumba sumu pa nyengu yo ŵenga mujeri. (Mac. 16:25) Mazuŵa nganu napu, abali ndi azichi atumba sumu za Ufumu. Mwakuyeruziyapu, abali ndi azichi ambanga sumu za Ufumu po ŵenga kumsakasa wachibalu ku Sachsenhausen, mu nyengu ya chipani cha Nazi ku Germany kweniso po angukoleka ukapolu ku Siberia. Ivi vilongo mo sumu zichiskiya abali ndi azichi wo akumana ndi masuzgu.

Vineneru vinyaki navu viŵengi ndi buku lasonu la sumu lamutu wakuti, ‘Mbiyani Yehova Mwakukondwa.’ Asani talonde buku la sumu zenizi, tikhumbika kuyesesa kungaziŵa umampha mazu ngaki kweniso kuzisambira pa kusopa kwa pabanja. (Ŵaef. 5:19) Asani tichitengi viyo mzimu wakupaturika utiwovyengi kuti tikumbukengi sumu zenizi asani takumana ndi masuzgu. Sumu za Ufumu zingawovya kuti chilindizga chidu chije chakukho. Sumu izi zititichiska ukongwa asani takumana ndi masuzgu. Kweniso asani vinthu veumampha pa umoyu widu, mazu nga sumu zenizi ngatitiwovya mbwenu kuti ‘timbengi mwakukondwa’ chifukwa chakuti mtima widu ngwakukondwa pa nyengu yo. (1 Mik. 15:16; Sumu 33:1-3) Mwaviyo, tiyeni tosi tiyesesengi kumba sumu za Ufumu!

WONERIYANI VIDIYO YAMUTU WAKUTI SUMU YO YINGUCHISKA ABALI ŴIDU. PAVULI PAKI, MUKANI MAFUMBU YANGA:

• Kumbi ndi vinthu wuli vo vinguchitisa M’bali Frost kuti walembi sumu?

• Kumbi sumu zenizi zinguŵawovya wuli abali ndi azichi kumsakasa wachibalu ku Sachsenhausen?

• Kumbi sumu za Ufumu zingatichiska wuli pa umoyu widu?

• Kumbi ndi sumu nizi zo mungayanja kuziloŵeza?