KUMBI VENIVI VAKUKHUMBIKA WULI?: Akhristu akusankhika kweniso a mbereri zinyaki adana ŵanthu amitundu yosi kuti ‘amwi maji ngaumoyu kwawezi.’ (Chivu. 22:17) Maji ngakuyeruzgiya ngenanga ngamiya vinthu vosi vo Yehova wapereka kuti wataski ŵanthu ku ubudi ndi nyifwa. Kuti tiwovyi ŵanthu a midawuku kweniso a vigomezgu vakupambanapambana, tikhumbika kuŵapharazgiya “uthenga wamampha wamuyaya” munthowa yo ungamufika pamtima munthu weyosi pakuyija.​—Chivu. 14:6.

KUMBI TINGACHITA WULI VENIVI?:

• Musankhengi nkhani kweniso lemba lo lingaŵafika pa mtima ŵanthu a muchigaŵa chinu. Mungasankha masachizgu nga mo mungakambiskiyana ndi ŵanthu pamwenga chidya chinyaki chechosi cho chikukuwovyanipu. Jifumbeni kuti: Kumbi ndi nkhani nizi kweniso ndi malemba nanga ngo ŵanthu atingayanja? Kumbi pe nkhani yinyaki yo yachitika ŵaka sonu muchigaŵa chinu? Kumbi ndi nkhani niyi yo anthulumi angayanja? Nanga anthukazi angayanja nkhani wuli?

• Muŵatawuzgengi kweniso muchitengi vo ŵanthu achita muchigaŵa chinu asani akambiskana.​—2 Akori. 6:3, 4

• Mungaziŵengi umampha mabuku kweniso mavidiyo ngosi ngo tigwiriskiya ntchitu pakusambiza kuti muwovyi ŵanthu wo akhumba kuziŵa vinandi

• Muchitengi dawunilodi mabuku ndi mavidiyo nga vineneru vinyaki va ŵanthu wo mungakumana nawu muchigaŵa chinu

• Musinthengi nkhani kuti yikoliyanengi ndi vo mweneku wa nyumba wangayanja. (1 Akori. 9:19-23) Mwakuyeruzgiyapu, kumbi mungakambanji asani munthu yo mutimupharazgiya watikukambiyani kuti mubali waki watayika pambula kuswera?

WONERIYANI VIDIYO, PAVULI PAKI MUKANI MAFUMBU YANGA:

• Kumbi mupharazgi wangwamba kukambiskana nayu nkhani wuli mweneku wa nyumba?

• Kumbi ndi vinthu wuli vo vingumuchitikiya mweneku wa nyumba?

• Kumbi ndi lemba nili lo lingukoliyana ukongwa ndi vo vinguchitikiya mweneku wa nyumba, nanga ntchifukwa wuli?

• Kumbi yimwi musintha wuli upharazgi winu kuti ukoliyani ndi ŵanthu a muchigaŵa chinu?