NTCHIFUKWA WULI NKHWAKUKHUMBIKA: Asani “maŵanaŵanu nga mtima wa munthu ngayanana ndi maji ngo nge pasi ukongwa,” ndikuti mafumbu ngayanana ndi chiyaŵi cho tinganeŵe maji ngenanga. (Nthanthi 20:5) Mafumbu ngatovya akusambira ŵidu kuti akambengepu pa nkhani yo tikambiskana nawu. Kanandi, ŵanthu wo tisambira nawu amuka umampha asani titiŵafumba mafumbu mwalusu. Yesu wagwiriskiyanga ntchitu mafumbu mwalusu. Kumbi isi tingamuyezga wuli?

MO TINGACHITIYA:

• Mufumbengi mafumbu ngo ngangawovya munthu kuti wakambi maŵanaŵanu ngaki. Yesu waŵafumbanga mafumbu akusambira ŵaki kuti waziŵi maŵanaŵanu ngawu. (Mate. 16:13-16; be-CN 238 ¶3-5) Kumbi mungafumba mafumbu nanga ngo ngangawovya munthu kuti wakambi maŵanaŵanu ngaki?

• Mufumbengi mafumbu ngakulongozge ku ansala. Kuti wawovyi Peturo, Yesu wamufumbanga mafumbu ngakumuwovya kuti waleki kusuzgika kusaniya ansala yakwenere. (Mate. 17:24-26) Kumbi mungafumba mafumbu nanga ngo ngangawovya munthu kuti wasaniyi yija ansala yakwenere?

• Mumuwongengi wakusambira winu. Yesu wangumuwonga mulembi munyaki wati wamuka “mwazeru.” (Mariko 12:34) Kumbi mungamuwonga wuli munthu yo wamuka umampha?

WONERIYANI CHIGAŴA CHAKWAMBA CHA VIDIYO YAKUTI MUGWIRENGI NTCHITU YO YESU WAGWIRANGA—SAMBIZANI, PAVULI PAKI MUKANI MAFUMBU YANGA:

• Ntchifukwa wuli tingakamba kuti ichi ntchakuwoniyapu chamampha cha pakusambiza munthu, chinanga kuti fundu zo munthu uyu wakamba zauneneska?

• Ntchifukwa wuli titenere kuchita so vinyaki kuluska waka kukonkhoska fundu?

WONERIYANI CHIGAŴA CHACHIŴI CHA VIDIYO YENIYI, PAVULI PAKI MUKANI MAFUMBU YANGA:

• Ntchifukwa wuli tingakamba kuti mubali uyu wangugwiriskiya ntchitu mafumbu mwalusu?

• Kumbi ndi nthowa zinyaki nizi zakusambiziya zo tingatoliyaku?