Kumbi muwona ntchitu za manja ngaku Yehova asani muwona maluŵa nga mitundu yakupambanapambana, nyenyezi ndipuso vipopomu va maji? Vinthu vinandi va muchilengedu vo tiwona vivumbuwa mijalidu yaku Yehova yambula kuwoneka. (Aro. 1:20) Kuŵanaŵaniya vinthu va muchilengedu kungatiwovya kuziŵa kuti Chiuta ngwanthazi, ngwachanju, ngwazeru, wachita vinthu mwaurunji kweniso ngwakupaska.—Sumu 104:24.

Kumbi ndi vinthu vinyaki nivi vo Yehova wakulenga vo muwona zuŵa lelosi? Chinanga mbanthu wo aja mutawuni ativiwona mbwenu vimiti ndipuso viyuni. Kuwonesesa vinthu vo Yehova wakulenga kungatiwovya kuti tileki kufipa mtima ukongwa, kuti tiŵikengi ukongwa mtima pa vinthu vakukhumbika, ndipuso kuti timugomezgengi ukongwa kuti watiphweriyengi mpaka muyaya. (Mate. 6:25-32) Asani mwe ndi ŵana, awovyeni kuti awonengi mijalidu yapachanya ukongwa yaku Yehova. Kuti tije pa ubwezi wakukho ndi Chiuta, tikhumbika kuyesesa kuŵanaŵaniya vinthu vo wakulenga.—Sumu 8:3, 4.

WONERIYANI VIDIYO YAKUTI VINTHU VAKUZIZISWA VA MUCHILENGEDU VIVUMBUWA UNKHANKHU WAKU CHIUTA—UKWERU NDIPUSO MITUNDU, PAVULI PAKI MUKANI MAFUMBU YANGA:

• Ntchinthu wuli chichitiska kuti tiwonengi mitundu yakupambanapambana?

• Ntchifukwa wuli mitundu ya vinthu vinyaki yisinthasintha malinga ndi ko chinthu cho chalazgiya?

• Ntchifukwa wuli tiwona mitundu yakupambanapambana kuchanya?

• Kumbi ndi mitundu niyi ya vinthu vachilengedu yo yitikukondwesani ukongwa asani mwe kunyumba kwinu?

• Ntchifukwa wuli tikhumbika kusaniya nyengu yakuwonesese vinthu vo Chiuta wakulenga?