Yehova wawunganisa ŵanthu ŵaki mazuŵa nganu nge mo wachitiyanga ndi Ayisirayeli. Pa charu chosi chapasi maofesi nga nthambi, madera, mipingu ndipuso magulu nga uteŵeti, wosi achita vinthu mwakukoliyana kuti uthenga wamampha upharazgiki. Tipharazgiya munthu weyosi chinanga mbanthu wo alongoro chineneru chinyaki.—Chv 14:6, 7.

Kumbi mukuŵanaŵaniyapu va kusambira chineneru chinyaki kuti muwovyi ŵanthu kusambira uneneska? Chinanga kuti mungaŵavi nyengu ya kusambira chineneru chinyaki kweni mungagwiriskiya ntchitu app ya JW Language kuti muziŵi mazu ngapusu kuti muyambi kukambiskana ndi munthu. Asani mungagwiriskiya ntchitu app yeniyi mu uteŵeti, mukondwengi nge mo angukondwe Akhristu akwambiriya ŵati awovya ŵanthu a vineneru vinyaki kuti avwi “vinthu vikulu vaku Chiuta” mu vineneru vawu.—Mac 2:7-11.

WONERIYANI VIDIYO YA JANI BWEZI LAKU YEHOVA—MUPHARAZGENGI MU CHINENERU CHINYAKI, NDIPU MUKANI MAFUMBU YANGA:

• Kumbi mpha nyengu niyi po mukhumbika kugwiriskiya ntchitu app ya JW Language?

• Kumbi mu app yeniyi mwe vinthu wuli?

• Kumbi ŵanthu a muchigaŵa chinu alongoro chineneru wuli?

• Kumbi mungachita wuli asani munthu yo wakhumbisiska kuvwa uthenga wa Ufumu ngwa chineneru chinyaki?—od 100-101 ¶39-41