Yehova wawona kuti malayizgu nga nthengwa ngakukhumbika ukongwa. Ndipu wakhumba kuti ŵanthu akutolana akoliyanengi ukongwa. (Mt 19:5, 6) Mu gulu laku Yehova mwe mabanja nganandi ngo ngachita vinthu mwakukoliyana. Kweni palivi banja lo lileka kukumana ndi masuzgu. Tikhumbika cha kuŵa ndi maŵanaŵanu ngo ŵanthu anandi ŵe nangu ngakuti kupatukana kweniso kumalisa nthengwa ndiyu nthowa yakumalisiya masuzgu. Kumbi Akhristu akutolana angavikiliya wuli nthengwa zawu?

Wonani fundu 5 zo zingawovya.

1. Muvikiliyengi mtima winu, ndipu mukanengi vinthu nge kukopana kweniso vakusangaluska viheni vo vingachitisa kuti nthengwa yinu yiyambi kuwayawaya.—Mt 5:28; 2Pe 2:14.

2. Mujengi pa ubwezi wamampha ndi Chiuta, ndipu nyengu zosi mukhumbisiskengi kumukondwesa mu nthengwa yinu.—Sl 97:10.

3. Lutirizgani kuvwala umunthu wufya, ndipu muchitiyanengi tinthu timanatimana takulongo kuti mutimuyanja munyinu. Venivi vingamuwovya kuti wakondwengi.—Akl 3:8-10, 12-14.

4. Muchitengi vinthu mwaulemu kweniso mukambiskanengi umampha.—Akl 4:6.

5. Ŵanthu akutolana atenere kupasana cho ntchakwenere kweni akhumbika kuchita venivi mwachanju.—1Ak 7:3, 4; 10:24.

Asani Akhristu atumbika nthengwa ndikuti alongo kuti atumbika Yehova yo wakwambisa nthengwa.

WONERIYANI VIDIYO YAKUTI ‘TITCHIMBIYENGI MWAKUKUNTHIYAPU’—MUVWIYENGI MARANGU, NDIPU MUKANI MAFUMBU YANGA:

• Kumbi ndi masuzgu wuli ngo ngangayamba mu banja chinanga kuti pakwamba vinthu vayendanga umampha?

• Kumbi fundu za mu Bayibolu zingawovya wuli akutorana wo awona kuti atanjana cha?

• Ndi marangu wuli ngo Yehova wakupereka mu banja?

• Kumbi ŵanthu akutorana akhumbika kuchitanji kuti nthengwa yawu yiyendengi umampha?