Mu mwezi wa September, tazamugwira ntchitu mwaphamphu yakwambisa masambiru nga Bayibolu ku munthu weyosi mwakugwiriskiya ntchitu kabuku kakuti Kondwani ndi Umoyu Kwamuyaya! Apharazgi wo akhumba angazichita upayiniya wakovya wa maola 30. Kumbi tazamugwira wuli ntchitu yapade yeniyi?

• Pa Ulendu Wakwamba: Gwiriskiyani ntchitu peji lakukumaliya la kabuku kuti muwovyi ŵanthu kuja ndi mtima wakhumba kuvwa vinandi, ndipu mulongoni mo tisambiriya Bayibolu ndi ŵanthu. Mukumbukengi ŵanthu wo angulongo kuti akhumba kuziŵa vinandi pa ulendu wakwamba kweniso maulendu ngakuweliyaku. Chinanga kuti anyaki kuvuli uku angukana kusambira Bayibolu kweni sonu panyaki angayanja kusambira chifukwa cha nthowa zasonu zakusambiziya kweniso kabuku kasonu. Mukhumbika cha kusiya kabuku pa nyumba po palivi ŵanthu pamwenga kutumiziya ŵanthu wo alivi mtima wakukhumba kuvwa vinandi. Komiti ya Uteŵeti ya Mpingu yinozgengi ndondomeku ya maunganu ngakunozgeke uteŵeti mu mwezi wenuwu.

• Nthowa Zinyaki: Asani mpingu winu ugwiriskiya ntchitu timashelufu, mungaŵikapu timabuku takuti Kondwani ndi Umoyu Kwamuyaya! Ŵanthu wo angulongo kuti akhumba kuziŵa vinandi akambiyeni kuti kabuku yaka tigwiriskiya ntchitu kusambiziya ŵanthu Bayibolu kwawezi. Longoni mo tisambiriya Bayibolu ndi ŵanthu pa nyengu yo mukambiskana nawu pamwenga mungapangana nawu kuti muziŵalongo ulendu unyaki. Wakuwonere uteŵeti wangasankha apharazgi alusu kuti akayambisi masambiru nga Bayibolu ku malu ko achitiyaku malonda. Mungayambisa so masambiru nga Bayibolu ndi ŵanthu wo mugwira nawu ntchitu, pamwenga ŵanthu wo munguŵapharazgiya mwamwaŵi.

Yesu wakutituma kuti ‘tisambizengi ŵanthu kuti aje akusambira.’ (Mt 28:19, 20) Tigomezga kuti ntchitu yapade yeniyi yitiwovyengi kuti tifiski chilatu chenichi mwakugwiriskiya ntchitu kabuku kakuti Kondwani ndi Umoyu Kwamuyaya!