• Lembani adiresi yinu yo mulondiyapu makalata. Asani muwona kuti vingaŵa umampha cha kulemba adiresi yinu, mungagwiriskiya ntchitu adiresi ya Nyumba ya Ufumu asani ŵara akuzomerezani. Kweni mwemosi mo vingaŵiya, mungagwiriskiyanga ntchitu adiresi ya ofesi ya nthambi CHA.

• Lembani zina la munthu yo asani mutimuziŵa. Venivi vingamuwovya kuti waleki kuŵanaŵana kuti kalata yo njakusaskiya malonda.

• Wonesesani kuti mwalemba masipeling’i ngamampha kweniso viganizu vakuvwika umampha. Wonesesani so kuti vinthu vinyaki nge mafulusitopu kweniso makoma navu veumampha. Kalata yinu yikhumbika kuti yiwonekengi umampha, vakubayabaya cha. Asani kalata yo mwayilemba pamanja, wonesesani kuti yiŵerengeka kwambula kusuzga. Mazu nginu mukalata yo ngatenere kuja ngaulemu.

Kalata yakuwoniyapu yo ye papeji ili yilongo mo mungalembe kalata yinu. Kweni mukhumbika cha kuti nyengu zosi mulembengi mazu ngenanga ndendende mukalata yinu. Lembani yinu mwakukoliyana ndi mo ŵanthu alembe makalata muchigaŵa chinu.