Vinthu vakuwoneka ndi masu vikopa ŵanthu kweniso vitiŵawovya kuti avwisengi ndi kukumbuka vo asambira. Msambizi widu Mura Yehova wakwamba kali kugwiriskiya ntchitu vinthu vakuwoneka ndi masu pakusambiza. (Chiya. 15:5; Yere. 18:1-6) Yesu nayu nge Msambizi Walusu wagwiriskiyanga ntchitu vinthu vakuwoneka ndi masu. (Mate. 18:2-6; 22:19-21) Mavidiyo ntchimoza mwa vinthu vakuwoneka ndi masu vo vitovya ukongwa mazuŵa nganu. Kumbi mugwiriskiya ntchitu mavidiyo asani musambira Bayibolu ndi ŵanthu?

Pakunozgeka mavidiyo 10 kuti ngawovyi ŵanthu wo tisambira nawu Bayibolu kuti avwisengi fundu za mukabuku ka Uthenga Wamampha Wakutuliya Kwaku Chiuta! Mitu ya mavidiyo yanga yikoliyana ukongwa ndi mafumbu ngo nge mukabuku yaka. Kabuku yaka kasanirika so pa webusayiti yidu ndipu ke ndi malinki ngo ngatitiwovya kuziŵa nyengu yo tingawonese vidiyo yeyosi. Kweniso mavidiyo nganyaki nge ndi fundu zinyaki zakutuliya mumabuku ngakupambanapambana ngo nge pa mundandanda wa Vidya vo Tigwiriskiya Ntchitu Pakusambiza.

Kumbi mukambiskana nkhani yinyaki ya mu Bayibolu ndi munthu yo musambira nayu ndipu muwona kuti wasuzgika kuyivwisa? Kumbi yo musambira nayu wakumana ndi mayeseru nganyaki? Fufuzani pa jw.org pamwenga pa JW Broadcasting kuti musaniyi vidiyo yo yingamuwovya. Mungachita umampha kuti muwonere nayu limoza vidiyo yeniyo, ndipu pavuli paki mungakambiskana vo mwavwa.

Mwezi wewosi gulu lidu lituzga mavidiyo nganyaki ngasonu. Asani muwonere mavidiyo yanga, muŵanaŵaniyengi mo mungachingagwiriskiya ntchitu pakusambira Bayibolu ndi ŵanthu.