Pa nyengu yo Yesu wachitanga uteŵeti waki wagwiriskiyanga ntchitu vinthu vo vachitika waka pambula kuswera kuti wasambizi ŵanthu. (Lk 13:1-5) Namwi so mugwiriskiyengi ntchitu vinthu vo vachitika pambula kuswera yapa kuti ŵanthu aje ndi mtima wakukhumba kuvwa vinandi vakukwaskana ndi uthenga wamampha. Asani mwazumbuwa masuzgu ngo ŵanthu akumana nangu nge kukwera kwa vinthu, ngozi zachilengedu, viwawa kweniso kumwa munkhwala wakutimbanyizga wongu, mufumbeni fumbu lo lingamuwovya kuti waŵanaŵaniyepu. Mungamufumba kuti: “Kumbi muwona kuti suzgu lenili [zumbuwani suzgu] limalengi?” pamwenga “Kumbi muŵanaŵana kuti suzgu lenili limalengi wuli?” Pavuli paki muŵerengiyeni vesi la mu Bayibolu lo likoliyana ndi nkhani yo mukambiskana. Asani walongo kuti wakhumba kuziŵa vinandi mulongoni vidiyo pamwenga buku lo le pa mundandanda wa Vidya Vakusambiziya. Po tiyesesa kuti tiŵafiki pa mtima ŵanthu a muchigaŵa chidu, tiyeni ‘tichiti vinthu vosi chifukwa cha uthenga wamampha.’​—1Ak 9:22, 23.

Kumbi ndi nkhani wuli zo zingakondwesa ŵanthu a muchigaŵa chinu?