Unganu wakunozgeke uteŵeti uyanana waka ndi maunganu nga mpingu, ndi vinthu vo Yehova watitipaska kuti tichiskanengi ku chanju ndi ku ntchitu zamampha. (Ah 10:24, 25) Unganu uwu utenere kuja wa maminiti 5 mpaka 7 kusazgiyapu kugaŵana, kusankha chigaŵa chakupharazgaku kweniso pempheru. (asani uchitika pavuli pa maunganu nga mpingu, utenere kuchitika mwakudumuwa ukongwa.) Yo wachitiska watenere kunozgeke umampha kuti ŵanthu wo aserengi mu uteŵeti ayanduwengi ukongwa. Mwakuyeruzgiyapu, pa Chisulu chifukwa chakuti ŵanthu anandi angusere cha mu uteŵeti mukati mwa sabata, vingaŵa umampha kukambiskana waka vo mungachikamba mu uteŵeti. Kumbi ndi nkhani wuli zinyaki zo mungakambiskana pa nyengu iyi?

• Masachizu nga mo mungapharazgiya ngo nge mu Kabuku ka Unganu wa Umoyu Widu Wachikhristu Ndipuso Uteŵeti

• Mo mungagwiriskiya ntchitu nkhani zo zachitika pambula kuswera kuti muyambi kukambiskana ndi munthu mu uteŵeti

• Mo mungamukiya munthu yo wakamba vinthu vo ŵanthu atanja kukamba asani akana kuŵapharazgiya

• Mo mungamukiya munthu yo wagomezga kuti Chiuta kulivi, yo wagomezga kuti vinthu vikuchita kusintha kutuwa ku vinthu vinyaki, yo walongoro chineneru chinyaki pamwenga munthu yo we mu chisopa cho muchigaŵa chinu mulivi

• Mo mungagwiriskiya ntchitu webusayiti ya jw.org, JW Library^® pamwenga Bayibolu

• Mo tingagwiriskiya ntchitu buku pamwenga vidiyo ya pa mundandanda wa Vidya Vakusambiziya

• Mo tingagwiriskiya ntchitu nthowa zakupambanapambana zakupharazgiya, nge upharazgi wa pa foni, kulemba makalata, kupharazga ko kusanirika ŵanthu anandi, kuchitiska ulendu wakuweriyaku pamwenga masambiru nga Bayibolu

• Kukumbuskana mo tingajivikiliya asani tipharazga, mo tingasinthiya upharazgi widu, kuja ndi nkharu yamampha, maŵanaŵanu ngakwenere, kweniso fundu zinyaki

• Mungakambiskana sambiru limoza pamwenga vidiyo ya mu kabuku kakuti Jiperekeni pa Kuŵerenga ndi Kusambiza

• Mo mungawovye kweniso kuchiska munthu yo mupharazga nayu

• Mungakambiskana lemba lo likonkhoska vakukwaskana ndi uteŵeti pamwenga vinthu vakukondwesa vo vinguchitika pa nyengu yo mwapharazganga