Ntchitu yakupharazga yikhumbika kuchitika mwaliŵi chifukwa chisuzgu chikulu chepafupi. (Nthanthi 24:11, 12, 20) Kuti tiwovyi ŵanthu, tingagwirisiya ntchitu kadi lakuziŵisa ŵanthu za Mazu Ngaku Chiuta kweniso webusayiti yidu. Kadi lenili le ndi kachidindu ko kalongozge ŵanthu ku vidiyo yamutu wakuti, Nchifukwa Wuli Tikhumbika Kusambira Bayibolo? Kadi ili lilongozge so ŵanthu pa malu ngo angalemba asani akhumba kuziŵa vinandi pamwenga asani akhumba kuti asambirengi Bayibolu. Ŵanthu anyaki akhumba cha kulonde mabuku ngidu kweni azomera kusere pa webusayiti yidu. Ndichu chifukwa chaki tikhumbika kuyesesa kuŵagaŵiya kadi lenili. Kweni tikhumbika cha kusiya kadi panyumba asani taleka kusaniyapu ŵanthu pamwenga kugaŵiya munthu yo wakhumba cha kuziŵa vinandi.

Nyengu zosi mujengi akunozgeka kuwovya ŵanthu kuti ayambi kusere pa webusayiti yidu. Mungaŵakambiya kuti: “Nde ndi kanthu kanyaki kakuti ndikupaseni. Kadi ili lingakuwovyani kuti musere pa webusayiti yidu po mungasaniya nkhani zinandi kweniso mavidiyo ngakupambanapambana.” (Yoh. 4:7) Chifukwa chakuti timakadi iti nthimanatimana, muyendengi natu nyengu zosi kuti mugaŵiyengi wo mukumanengi nawu.