TICHITENGI VINTHU NGE AKHRISTU
Mo Tingasaziyaku Lusu Lidu Mu Uteŵeti—Wovyani Wo Akhumba Kuziŵa Vinandi Kuti Ayambi Kuwungana
NTCHIFUKWA WULI NKHWAKUKHUMBIKA: Mawunganu ngatitiwovya kuti “timbiyengi Yehova” ndipuso “kumulumba.” (Sumu 149:1) Ku mawunganu tisambira kuchita khumbu laku Chiuta. (Sumu 143:10) Kanandi ŵanthu wo akhumba kusambira vinandi kweniso wo tisambira nawu Bayibolu aluta panthazi asani ayamba ŵaka kuluta ku mawunganu.
MO TINGACHITIYA:
-
Mungasweranga cha kudaniya ŵanthu ku mawunganu. Mukhumbika cha kulindiza kuti muyambi dankha kusambira nawu Bayibolu.—Chiv. 22:17
-
Mukonkhosiyeni vinthu vo vichitika ku mawunganu kweniso vo mwamusambira. Vinthu vinyaki vo vingakuwovyani ndi ivi: kapepala kakudaniya ŵanthu ku mawunganu, vidiyo yamutu wakuti Kumbi ndi Vinthu Wuli vo Vichitika pa Nyumba ya Ufumu?, ndipuso kabuku ka Khumbu Laku Chiuta sambiru 5 ndi 7
-
Muwovyeni. Kumbi munthu yo wakhumba kumupingaku panjinga pamwenga pagalimotu? Kumbi wakhumba kumuwovya kusankha chakuvwala chamampha cho wangavwala? Mujengi nawu pamoza ku mawunganu, ndipu muwoniyengi limoza mabuku ngo mugwirisiya ntchitu. Muwovyeni kuti waziŵani ndi ŵanthu anyaki