Pa peji lakwamba la pa webusayiti yidu pasanirika nkhani kweniso ma vidiyo ngo chilatu chaki nkhuwovya ŵanthu kuti aje ndi mtima wakukhumba kuziŵa vinandi. (Mac 13:48) Peji ili likonkhoska nkhani zo zisanirika pa malu nga nkhani pamwenga vo ŵanthu aŵanaŵana kweniso kukamba.

Kumbi mungaligwiriskiya wuli ntchitu peji lakwamba la pa jw mu uteŵeti?

• Muserengepu kaŵikaŵi pa webusayiti. Muwonengi nkhani zo zaŵikikapu sonu ndipu muzigwiriskiyengi ntchitu kuti muwovyi munthu yo wakhumba kuziŵa vinandi. (Kuti muwoni vinthu vinyaki vo vaŵikikapu pambula kuswera pa peji lakwamba lenili, bofoni po alemba kuti “Wonani Vinandi.”) Kuwona nkhani zo zatuwa sonu pa webusayiti kungakuwovyani kuti mugwiriskiyengi ntchitu fundu zinyaki zasonu mu uteŵeti.

• Mugwiriskiyengi ntchitu nkhani ndi mavidiyo ngo ngasanirika pa peji lakwamba kuti muyambi kukambiskana ndi ŵanthu. Vinthu vo visanirika pa chigaŵa chenichi vingatiwovya kuziŵa vo ŵanthu a mu chigaŵa chidu aŵanaŵana.

• Muŵalongongi peji lakwamba la pa webusayiti yidu. Konkhoskani nkhani zo zisanirika pa peji ili ndipu mulongoni mo wangazisaniriya.

• Muŵatumiziyengi linki. Ŵanthu anyaki akhumba cha kukambiskana nasi masu ndi masu kweni akhumbisiska kusere pa webusayiti yidu. Mwaviyo, asani munthu wakhumba kuziŵa vinandi mungasweranga cha kumutumiziya linki ya peji lakwamba, nkhani yo munthu wakhumba kuziŵa pamwenga vidiyo yo yisanirika pa peji lenili.