FUMBU 3
Kumbi Ndingachita Wuli Kuti Ndikambisanengi Umampha ndi Apapi Ŵangu?
KUMBI MUNGACHITA WULI?
Ŵanaŵaniyani chakuchitika ichi: Pa chitatu usiku, Geoff wa vyaka 17 wamaliza kugwira ntchitu za panyumba ndipu wakhumba kupumuwa. Wajula TV ndipu waja pampandu wo watanja.
Pa nyengu yeniyi, Ada ŵaki asere pakhomu kweni akondwa cha.
“Geoffrey! Ntchifukwa wuli usuŵiliya waka kuwonere TV m’malu mwakuti umuwovyeku muvurwa waku kulemba homuweki? Nyengu zosi uchita cha vo ndakukambiya!”
Geoff walongoro chapasipasi ndipu awisi atuvwa vo wakamba, watiti: “Mwayambapu sonu.”
Awisi atuza pafupi, ndipu akamba kuti, “Utiti wuli?”
Geoff wamphonemphone waka masu ndipu wamuka mwamantha kuti, “Ndalongoropu cha ini.”
Awisi akwiya ukongwa. Ndipu atimukambiya mwakukalipa kuti, “Ungaziwelezangapu so cha kundikambiya mazu ngeningo!”
Asani imwi mwenga Geoff, kumbi mwatingi muchitengi wuli kuti muleki kuyambana ndi apapi ŵinu?
MUŴANAŴANIYENGEPU DANKHA!
Kukambisana ndi apapi ŵinu kuyanana ndi kwendesa galimotu. Asani msewu wajalizika ndi vinthu vinyaki, mukhoza kwenda nthowa yinyaki.
MWAKUYERUZIYAPU:
Msungwana munyaki zina laki Leah, wangukamba kuti, “Nditondeka kukambisana mwakufwatuka ndi ada. Nyengu zinyaki asani ndilongoro nawu, atanja kukamba kuti, ‘Pepa, kumbi ulongoro ndi ini?’”
LEAH WANGACHITA VINTHU VITATU IVI.
-
Kulongoro nawu mwaukali.
Leah walongoro mwakudaniliza, “Ada namwi, nkhani njakukhumbika ukongwatu iyi!”
-
Kuleka kulongoro nawu.
Leah waleka waka kukambiya awisi za suzu lo we nalu.
-
Walekeza dankha kuŵakambiya kuti waziŵakambiyi nyengu yinyaki yamampha.
Leah wakambisana nawu yija awisi pamwenga watiŵalembe kalata kuti waŵakambiyi za suzu laki.
Pa vinthu vitatu ivi, kumbi muwona kuti ntchinthu wuli cho Leah wakhumbikanga kuchita?
ŴANAŴANIYANI IVI: Awisi aku Leah avwa cha vo wakamba chifukwa chakuti atimbanyizika maŵanaŵanu ndi vinthu vinyaki. Asani Leah wangasankha Sachizu A, ndikuti awisi azizwengi kuti ntchifukwa wuli watiŵakalipiya. Ivi vingachitisa kuti awisi aleki kuvwa vo wakamba ndipu angawona kuti watiŵatumbika cha. (Ŵaefesu 6:2) Kukamba unenesa ivi vingawovya cha.
Nge po mungachitiya asani msewu wajalizika ndi vinthu vinyaki, mungasaniya so nthowa yinyaki yo yingakuwovyani kuti mukoliyanengi ndi apapi ŵinu
Chinanga kuti Sachizu B lingaja lambula kusuza kulilondo kweni ndakovya cha. Ntchifukwa wuli tikamba viyo? Chifukwa chakuti Leah wakhumbika kuŵakonkhose awisi kuti aziŵi suzu laki, ndipu ivi vingawovya kuti aziŵi mo angamuwovye. Mwaviyo, kuja cheti kungawovya cha chinanga nkhamanavi.
Chifukwa chakuti Leah wasankha Sachizu C, walekiyengi limu cha kulongoro ndi awisi. M’malu mwaki wayesengi kukambisana nawu nyengu yinyaki. Asani wangasankha kuŵalembe kalata, vimuwovyengi kuti wayambi kuvwa umampha mumtima.
Kulemba kalata kungamuwovya so kuti wakonkhosi chechosi cho wakhumba kukambiya awisi. Asani awisi aŵerenga kalata, aziŵengi vo mwana wawu wang’anamuwa, ndipu ivi viŵawovyengi kuziŵa masuzu ngaki. Mwaviyo Sachizu C ndakovya kwaku Leah kweniso awisi. Kwali wakambisanengi nawu yija pamwenga waŵalembiyengi kalata, vo wasankha vikoliyana ndi vo Bayibolu likamba kuti “tichitengi vinthu vo vingawovya kuti paje chimangu.”—Ŵaroma 14:19.
Kumbi ndi vinthu wuli vinyaki vo Leah wangachita?
Ŵanaŵaniyani vo wangachita ndipu lembani pa malu ngo mwapasika mumphata. Lembani vo vingachitika chifukwa cha sachizu lo mwasankha.
MUMUKENGI MWAULEMU
Mutenere kuziŵa kuti nyengu zinyaki vo mungakamba, apapi ŵinu angaviŵanaŵaniya munthowa yinyaki.
MWAKUYERUZGIYAPU:
Apapi ŵinu atikufumbani kuti, ‘Ntchifukwa wuli uwoneka kuti wakondwa cha?’ Imwi mutiŵamuka kuti, “Ndakhumba cha kuti tikambisani nkhani yeniyo.”
Kweni apapi ŵinu angawona nge mukamba kuti: “Ndingakukambiyani cha suzu langu chifukwa nditikugomezani cha. Ndamukambiya anyangu.”
Ŵanaŵaniyani kuti mwakumana ndi suzu ndipu apapi ŵinu akhumba kukuwovyani. Asani mungakamba kuti: “Kudandaula cha, ndimalanengi nalu ndija.”
-
Kumbi apapi ŵinu angawona nge mung’anamuwanji?
-
Kumbi mungamuka wuli mwaulemu?
Mungayanja Kuŵerenga so Nkhani Izi
MAVIDIYO NGAVITHUZI VAKUJAMBULA
Kumbi Ndingakambiskana Wuli ndi Apapi Ŵangu?
Kumbi mungachita wuli kuti mukambiskanengi umampha ndi apapi ŵinu chinanga kuti pa nyengu yo mukhumba cha kukambiskana ndi weyosi?
