FUNDU ZAKUKUMALIYA
Kumbi Mikaele Mura wa Angelu Ndiyani?
MIKAELE yo nchakulengeka chauzimu, wazumbulika kanandi cha m’Bayibolo. Kweni wazumbulika asani wachita chinthu chinyaki. Mu buku la Danyele, Mikaele waturwa nkhondu ndi angelu aheni; mu kalata yaku Yuda, iyu wapindana ndi Satana; ndipu mu Chivumbuzi, warwana ndi Diabolo ndi viŵanda vaki. Chifukwa chakumiya muwusu waku Yehova ndipuso kurwana ndi arwani ŵaku Chiuta, Mikaele wachita vinthu vakukoliyana ndi zina laki lo ling’anamuwa kuti, “Ndiyani Wayanana Ndi Chiuta?” Kweni kumbi Mikaele ndiyani?
Nyengu zinyaki ŵanthu aziŵika ndi mazina nganandi. Mwakuyeruzgiyapu, Yakobe waziŵikanga so kuti Yisraele ndipu wakutumika Petro wadanikanga so kuti Simone. (Chiyambo 49:1, 2; Mateyu 10:2) Mwakuyana waka, Bayibolo lilongo kuti Mikaele ndi zina linyaki laku Yesu Khristu lo waziŵikanga nalu wechendazi pacharu kweniso wati wawere kuchanya. Tiyeni tiwoni vifukwa va m’Malemba vo tikambiya viyo.
Mungelu mura. Mazu ngaku Chiuta ngakamba kuti Mikaele ndi “mungelu mura.” (Yuda 9) Mazu yanga ngang’anamuwa “mura wa angelu.” Wonani kuti Mikaele wadanika kuti mura wa angelu. Ivi vilongo kuti mungelu waviyo uyu walipu yumoza pe. Ndipu m’Bayibolo mazu ngakuti “mungelu mura” ngakamba za ŵanthu anandi cha kweni munthu yumoza pe. Kweniso Yesu ndiyu wayana kuja mura wa angelu. Pakukamba za Mbuya Yesu Khristu yo wanguyuskika, Lemba la 1 Ŵatesalonika 4:16, likamba kuti: “Ambuya ŵeneku ŵakasikanga kutuwa kuchanya ndi mdanu, ndi mazu nga mungelu mura.” Yapa mazu ngaku Yesu ngakonkhoskeka kuti nga mungelu mura. Mwaviyo, lemba ili lilongo kuti Yesu ndiyu Mikaele mungelu mura.
Mulongozgi Wankhondu. Bayibolo likonkhoska kuti “Mikaele ndi angelu ŵaki angurwana ndi nchalinda . . . ndi angelu ŵaki.” (Chivumbuzi 12:7) Ivi vilongo kuti Mikaele ndi Mulongozgi wa nkhondu wa angelu akugomezgeka. Lemba la Chivumbuzi likonkhoska so kuti Yesu ndi Mulongozgi wa gulu la angelu akugomezgeka. (Chivumbuzi 19:14-16) Ndipu wakutumika Paulo wazumbuwa mwakudunjika kuti “Ambuya Yesu” ndi “Angelu anthazi yaki.” (2 Ŵatesalonika 1:7; Mateyu 16:27; 24:31; 1 Petro 3:22) Bayibolo likamba vaku Mikaele ndi “angelu ŵaki” kweniso Yesu ndi “angelu ŵaki.” (Mateyu 13:41) Pakuti palivi peposi po mazu ngaku Chiuta ngakamba kuti kuchanya kwe magulu ngaŵi nga angelu akugomezgeka, limoza lakulongozgeka ndi Mikaele ndipu linyaki lakulongozgeka ndi Yesu, mphakwenere kukamba kuti Mikaele ndi munyaki so cha, kweni ndi Yesu Khristu pa udindu waki wakuchanya. *
^ ndimi 1 Wonani ukaboni wakuti zina lakuti Mikaele nda Mwana waku Chiuta mu buku la Chichewa la Samalani Ulosi wa Danieli! mapeji 204 mpaka 205, ndipuso la Chingelezi la Insight on the Scriptures Voliyumu 2, mapeji 393-4, mabuku yanga ngakupharazgika ndi Akaboni aku Yehova.
