MAHOLIDI nga visopa kweniso ngakucharu ngo ŵanthu anandi akondwere muvigaŵa vakupambanapambana vacharu nga m’Bayibolo cha. Nanga kumbi ngakwambiya pani? Asani ku chigaŵa cho muja kwe layibulale, muzizwengi kuwona vo ma buku ngakamba pa nkhani ya maholidi. Wonani vakuyeruzgiyapu vimanavi ivi.

 Isitala. Buku linyaki likamba kuti: “Palivi peposi M’chipanganu Chasonu po palongo kuti ŵanthu akondweriyanga phwandu la Isitala.” (The Encyclopædia Britannica) Kumbi Isitala yikwamba wuli? Yikwambiya kuchisopa chaboza. Chinanga kuti ŵanthu akamba kuti holidi iyi njakukumbukiya kuyuka kwaku Yesu kweni vakuchitika va mu nyengu ya Isitala va Chikhristu cha.

Sekeresu la Chaka Chifya. Zuŵa ndi vakuchitika va pa sekeresu la Chaka Chifya vituŵa vakupambanapambana malinga ndi charu chaki. Pakukonkhoska va sekeresu lenili, buku linyaki likamba kuti: “Fumu ya ku Roma Julius Caesar, yingujalikiska zuŵa la January 1, kuja zuŵa la chaka chifya mu 46 B.C. Pa zuŵa ili, Aroma akumbukiyanga Janus yo wenga chiuta wa mageti, makhomu ndi chiyambi cha vinthu. Zina la mwezi wa January likudanika kutuliya ku zina lakuti Janus, yo wenga ndi visku viŵi, chisku chinyaki chalereskanga kunthazi chinyaki kuvuli.” (The World Book Encyclopedia) Mwaviyo, masekeresu nga Chaka Chifya ngakutuliya ku chisopa chaboza.

Zuŵa la Valentine. Buku linyaki likamba kuti: “Zuŵa la Valentine likwambiya pa phwandu lakukumbuka ŵanthu ŵaŵi wo angubayika chifukwa cha Chikhristu wo adanikanga kuti Valentine. Kweni vo vachitikanga pa zuŵa ili . . . viwoneka kuti vikwambiya pa phwandu lakali la Chiroma lo ladanikanga kuti Lupercalia lo lachitikanga pa 15 February. Phwandu ili latumbikanga Juno yo wenga chiuta wa Aroma, wa anthukazi ndi nthengwa, kweniso Pan chiuta wa chilengedu.”—The World Book Encyclopedia.

Maholidi Nganyaki. Tingakambiskana maholidi ngosi cha ngo ŵanthu achita pacharu chosi chapasi. Kweni, Yehova wazomerezga cha maholidi ngosi ngo ngatumbika ŵanthu pamwenga mawupu nga ŵanthu. (Yeremiya 17:5-7; Machitidu 10:25, 26) Kumbukani so kuti, chiyambi cha maholidi nga visopa chingatiwovya kuziŵa asani ngakukondweska Chiuta pamwenga cha. (Yesaya 52:11; Chivumbuzi 18:4) Fundu za m’Bayibolo zo ze mu Mutu 16 wa buku ili zikuwovyeningi kuziŵa mo Chiuta wawone ŵanthu wo achita nawu maholidi ngo ngakutuliya ku chisopa chaboza.